USANG DAHA' ISRAEL 9
9
Tulah kelima': Hulung matei
1Lun en Tuhan duan pah Musa la'an, “Tei nah im bara Firaun Dahuk nih, ‘Nunih nah dahun Tuhan Allah daha' Ibrani: Bei nah daha' pahu Kui anan tei, ja daha' sebayang té' Akui. 2Awi ika' pa'en ma'eng daha' nunan dahin em mun daha' anan tei, 3lim-lim hulung ka', iha' tih guda', keledei, unta', sapi', kading dahin duba ka', seng ga' perah pegei aleng mahnga' lelan, iha' tih perah aleng Ek nei. 4Akui seng nelesen hulung daha' Israel men anun kam Mesir, ji-ji pah em té' aleng seng matei aleng anun daha' Israel anih,’ kum men iha'.” 5Avin en Tuhan petneng nah jaka' na' lahuh, avin ken Tuhan, “Jima tih, iha' nah Akui seng menei perah anan té' daléh anih.”
6En Tuhan nei lan nah perah anan té' dau aleng kurin Musa anan, lim-lim hulung daha' Mesir anan pah matei, bi hulung daha' Israel ji-ji pah em té' aleng matei. 7En Firaun nyihu nah daha' tei nyineng hulung daha' Israel, beka' ji hulung daha' pah em té' aleng matei. Bi Firaun pa'en mahing kenep em mun daha' Israel nan tei.
Tulan kenem: Perah tuku
8Lun en Tuhan duan pah Musa dawa' Harun la'an, “Ala nah ji hegem uning men alem avo', ja Musa murah na' bau ha' unan Firaun. 9Uning anan pah ngelepup tei té' ji-ji daléh Mesir, kelunan dahin hulung-hulung pah ga' perah aku aya' anan kenan uning anan. Ngepu'an ngebelirik tua nah perah anan té' daha' daléh Mesir anan.” 10#K Tula 16:2 En dawa' ala nah uning men alem avo', pelalau tei pala Firaun, en Musa urah nah uning anan bau, pelalau tuku nah kelunan dahin hulung, uh anan balui paho' aya' lan nah ket atih té' daha'. 11Lim daha' aleng haman basa'-basa' anan dih pah em tahen nekring ha' unan Musa avin daha' uh tuku, avin tuku atih uh té' té' daha', nunan pah té' lim-lim daha' Mesir lahuh. 12Sa'-sa' en Tuhan na mahing pah kenep Firaun la'an, nusi' loh ka iha' kaséh ngioh dahun Musa dawa', awi aleng uh en Tuhan bara men Musa atih dih.
Tulah ketusu: Usan bato'
13En Tuhan duan pah Musa la'an, “Ma'un nah im sepangen jihima pelalau tei nekring ha' unan Firaun, im bara nah Dahuk nih men iha', ‘Nunih nah dahun Tuhan Allah daha' Ibrani: Bei nah daha' pahu Kui anih tei, ja daha' sebayang té' akui. 14Ji hangun anih Akui seng menei lim tingan tulah té' ika', dahin té' lim daha' aleng ida ka' anan lahuh, nurei pah té' lim kelunan alem daléh anih, ja ika' jam té' ji usun tana anih nusi' nah té' aleng awi Akui. 15Java' nah Akui ngioh kenep Kui lan, uh men hiran nah Akui mivi usu Kui lematei ika' dahin daha' alem daléh anih té' perah pegei, dahin madé' ikam té' usun tana anih. 16#Rom 9:17 Bi anih nah tavit na' Akui pekurip ika', ja akui bara tu'a Kui men ika' dahin ja aran Kui en daha' pedengah ji usun tana anih. 17Pa'en loh kah ika' ma'eng daha' kelunan Kui, dahin em mun daha' tei. 18Lan, tegu jaka' nunih jima, Akui seng menei usan bato' aleng lalé' bavah, nusi' payan té' usan bato' aleng awi nunan uh men'a té' daléh Mesir anan, men menaring ateng dau anih pah em té' ket nunan. 19Avin anan, lim hulung ka' dahin ketanum aleng ha' luma', im peng nah té' avan aleng dena' sayu. Lim kelunan dahin hulung aleng ha' luma' aleng em uli huma seng matei ga' usan bato' anan,’ kum men Firaun,” ken Tuhan. 20Té' balei daha' aleng té' ida Firaun atih takut té' dahun Tuhan, en daha' nyihu nah dipen-dipen daha' dahin hulung daha' tei uli huma, 21bi daha' aleng mua té' dahun Tuhan atih melek dipen daha' dahin hulung daha' ha' luma' tua.
22En Tuhan duan nah Musa, “Ju im hekun ka' anan ha' langit, ja usan bato' anan nei legak té' ji usun tana Mesir anih, dahin legak té' kelunan dahin hulung dahin té' tuvuh-tuvuh lim lahuh.” 23Lun en Musa ju nah huken na' anan dih ha' langit, en Tuhan na nah belaré aya', nei nah usan bato', bekilet pah nei lahuh té' tana Mesir anan. Nunan nah Tuhan menei usan bato' ha' daléh Mesir. 24#K Tula 8:7; 16:21 Nei nah usan bato' dahin bekilet aleng ngelepajat tua, aleng peklet usan bato' atih, kelalau lalé' nah bavah na', nusi' payan té' ket aleng nunan uh men'a nei té' tana Mesir anan, men aring-aring daha' tei jadi' ji bengsa' ateng kerei inih pah em té' ket nunan. 25Usan bato' anan pah nasa' nun-nun ket aleng té' ha' luma' ha' tana Mesir, nurei kah kelunan dahin hulung lim lahuh, tuvuh-tuvuh ha' luma' pah belepuk kenan usan bato' anan dahin lim bua-bua daha' pah berung. 26Bi ha' ngavan daha' Israel, iha' tih ha' Gosyen, iha' dep kah aleng em té' usan bato'.
27Pelalau en Firaun uvui nah Musa dawa' Harun, ken na' men dawa', “Sala lan nah akui ji hangun anih, Tuhan atih teneng kah Iha', bi akui dahin daha' kelunan alem daléh anih aleng sala. 28Sebayang nah kua' té' Tuhan, usan bato' dahin bekilet aleng mahnga' lelan anan uh deng nah anan, mekoh nah akui ikam tei, meng nah ikam dara-dara la'an.”
29Ken Musa men Firaun, “Tegu akui musang men uma anih akui seng meju dua' usu kui nih men Tuhan, belaré' anan pah seng em duan, usan bato' anan pah seng em té' nei la'an, ja ika' jam usun tana anih Tuhan aleng hipun na'. 30Bi jam kah akui ika' dahin lim daha' aleng té' ida ka' anan, nusi' payan kam takut té' Tuhan Allah.”
31Luba dahin parei hagit uh pah tasa' lim nah, avin parei hagit atih uh mali dahin luba atih uh ngepidang. 32Bi parei dahin agun aleng em tasa' avin em payan jaka' urip na' tubu.
33Leka' nah Musa dawa' men béh Firaun pelalau musang men alem uma na' anan. En Musa ju nah dua' usu na' men Tuhan, belaré' dahin usan bato' anan dih pah pelalau ngeta', usan pah em té' la'an. 34Bi tegu Firaun jam usan dahin usan bato' dahin belaré' uh ngeta', pelalau na sala nah iha' la'an, iha' pa'en na kenep mahing, nurei pah daha' aleng hida na'. 35Avin kenep Firaun mahing nunan, nusi' nah iha' mun daha' Israel anan tei, awi aleng uh en Tuhan bara men Musa dih.
Currently Selected:
USANG DAHA' ISRAEL 9: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
