USANG DAHA' ISRAEL 8
8
Tulah kedua': Buneng
1Ken Tuhan la'an men Musa, “Tei nah im pala Firaun la'an, bara Dahuk nih men iha', ‘Nunih nah dahun Tuhan: Bei nah daha' pahu Kui anan tei leka', ja si' daha' sebayang té' Akui. 2Awi ika' em mun daha' tei, Akui seng menei tulah té' lim tana ka' anih, menei peng-peng buneng. 3Hungei Nil seng hangan kenan buneng, daha' seng nei ma'un nei alem uma ka' dahin tei alem tilung ka', tei hujung tilem ka', alem uma daha' aleng nyadui té' ida-ida ka' anan lim lahuh, dahin alem amin kelunan alem daléh ka' anih dahin tei alem uma avo' ka' dahin tei alem bisin ngavan kam ngelugau luti lim lahuh. 4Buneng-buneng anan nei té' ujung ka', nei té' ujung kelunan alem daléh ka' anih dahin té' ujung daha' aleng té' té' ida ka' anan lahuh,’ kum men iha'.”
5Ken Tuhan men Musa la'an, “Sayu im ara Harun, ‘Im jei nah usu ka' dahin hekun ka' anan nyelibau hungei aleng dekaya', nurei kah té hungei uk dahin nyelibau ata' bawang, dahin nyihu nah buneng anan tei ji-ji tana Mesir anan.’ ” 6Lun en Harun jei nah usu na' nyelibau lim-lim ata' ha' Mesir nan, buneng pah pelalau putat ji-ji tana Mesir. 7Bi daha' aleng haman basa'-basa' anan dih pah na nunan lahuh pakei ugé' daha', na buneng tei té' ji-ji usun tana Mesir nan.
8Iha' nah Firaun muvui Musa dawa' Harun, ken na', “Sebayang nah té' Tuhan, akei Iha' mebet buneng-buneng anih men akui dahin men lim-lim kelunan alem daléh kui anih, akui pah seng mekoh daha' Israel anan tei, ja daha' ma'uk bun usu daha' men Tuhan.”
9Ken Musa men Firaun, “Sayu im bara akui, hiran ka' ngenep akui sebayang men ika', men daha' aleng ida ka' anan lahuh, dahin men daha' aleng alem daléh ka' anih, ja buneng-buneng anan em té' té' ika' dahin alem uma-uma ka' lahuh, bi alem hungei Nil tua nah daha' té'.”
10Ken Firaun, “Jima.”
“Sayu kah awi dahum nan, ja ika' jam, amei, avin nusi' nah té' aleng awi Tuhan Allah amé' atih. 11Lim buneng anan pah seng em té' té' ika' dahin em té' té' daha' aleng té' ida ka' dahin em té' té' lim kelunan alem daléh anih, bi ha' hungei Nil dep kah daha' seng té'.” 12Uli nah Musa dawa' Harun men Firaun, akei asi lelan nah Musa té' Tuhan marung buneng aleng en Na' nei ha' Firaun anan dih. 13Tuhan pah nyu'ei sebayang Musa awi dahun na' anan, matei nah lim-lim buneng alem uma, ha' latan, ha' luma'. 14En kelunan peng-peng nah patei buneng anan, ngepu'an bu butung tua nah daléh anan. 15Bi tegu Firaun jam daléh anan uh sayu, mahing nah kenep na' la'an, dahin em ngenep kelenghi dahun dawa', awi aleng dahun Tuhan atih dih.
Tulah ketlo': Hamuk
16Tuhan pah duan Musa la'an, “Im bara nah Harun, ‘Ju nah hekun ka', nyaman nah tana nan, ja ha' balui hamuk si' té' usun tana Mesir anih.’ ” 17Lun en dawa' na nah nunan, en Harun ju nah hekun na' pelalau nyaman tana, pelalau té' nah hamuk tei nelekep té' kelunan dahin té' hulung-hulung lim. Lim pup tana balui hamuk té' ji-ji usun tana Mesir anan. 18Daha' aleng haman basa'-basa' alem daléh Mesir nan pah ngenep na hamuk nunan lahuh, pakei ugé' daha', bi nusi' daha' deng na. Tei nah hamuk-hamuk anan nelekep té' kelunan, nunan pah té' hulung lahuh. 19#Lk 11:20 Ken daha' aleng haman basa'-basa' anan men Firaun, “Anih nah ket en Allah na,” ken daha'. Bi kenep Firaun mahing, em kaséh ngioh dahun daha', awi aleng dahun Tuhan atih dih.
Tulah kepat: Langau
20En Tuhan duan pah Musa la'an, “Ma'un nah im sepangen jihima, tei nah im penga Firaun tegu jaka' kalei na' tei hungei, bara Dahuk nih men iha', ‘Nunih nah dahun Tuhan: Bei nah daha' pahu Kui anih tei, ja daha' sebayang té' Akui. 21Awi ika' em mun daha' pahu Kui anih tei, Akui seng menei kap langau nei té' ika', nurei kah té' daha' aleng ida ka' atih lahuh, té' lim daha' alem daléh ka' atih lahuh, té' lim daha' alem daléh ka' anih dahin alem lim uma-uma kam. Alem lim-lim uma kelunan Mesir anan, penu tua kenan langau, nurei kah ha' tana lahuh. Hino'-hino' ngavan kelunan té', hinan pah langau té' lahuh. 22Bi tegu dau anan Akui mukéh daléh Gosyen, ha' ngavan daha' pahu Kui melo', nusi' seng té' langau tinan, ja ika' jam Akui aleng Tuhan té' ha' daléh anih. 23Avin Akui seng petula dep na' té' daha' pahu Kui dahin daha' bengsa' ka'. Jima tada' anan seng jadi',’ kum men iha'.” 24Lun en Tuhan na nah awi aleng kurin Na' anan. Ngepu'an metengut tua nah peng-peng langau nei alem uma Firaun dahin alem uma daha' aleng té' ida na' atih, dahin alem lim daléh Mesir, daléh anan pah tasa' kenan langau anan.
25En Firaun uvui nah Musa dawa' Harun, dahin kuma' men dawa', “Tei nah ikam ma'uk bun usu kam aleng kurin kam anan men Allah kam alem daléh anih tua.”
26Bi Musa nyuéi iha', “Nusi' tekep kamé' na nunan, avin ket aleng seng en amé' uk men Tuhan Allah amé' atih, ji ket aleng ji'ek lelan anan kurin daha' Mesir nih. Awi kamé' ma'uk ket aleng ngavan daha' heléh anan, adang daha' nyeparik bato' té' kamé'. 27Tuken kamé' tei ha' tana ngahit atih kah, tei su telo' dau anau na' men inih, uréh kamé' ma'uk bun usu amé' men Tuhan Allah, amé' hitih, awi dahun Na' men kamé' dih,” ken Musa.
28Ken Firaun, “Sayu kah, mun kah akui ikam tei ja ma'uk ket nunan men Tuhan Allah kam, ha' tana ngahit anan, bi sukun kam em tei su lan. Sebayang nah men akui lahuh.”
29Ken Musa, “Tei nah kawa' uli arin, sebayang kah kawa' men ika', ja si' langau anih tei em té' té' ikam jima, meng nah té' daha' pehungo' ika' dahin daha' aleng ida ka' dahin lim daha' kelunan té' alem daléh ka' nih. Bi meng im pamoh la'an em mun daha' bengsa' anih tei ja ma'uk bun usu daha' men Tuhan sikah.”
30Lun leka' nah Musa dawa' men béh Firaun, pelalau nah dawa' sebayang té' Tuhan. 31Tuhan pah nyu'ei sebayang dawa', langau-langau aleng té' té' Firaun, nurei kah té' daha' aleng ida na' dahin té' daha' alem daléh na' anan, en Tuhan uga, ji-ji pah em té' aleng melek. 32Bi kenep Firaun mahing loh, nusi' loh kah iha' mekoh daha' bengsa' anan tei.
Currently Selected:
USANG DAHA' ISRAEL 8: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
