USANG DAHA' ISRAEL 10
10
Tulah kesaya': Paho' parei
1Lun en Tuhan duan pah Musa la'an, “Tei nah im pala Firaun la'an, avin kenep na' dahin kenep daha' aleng hida na' uh Ek na mahing pah la'an, ja Akui na kuri-kuri tada' aleng Ek na anih té' hang daha' anan, 2té' pah ja ika' bara anih men anak kam, dahin men sau-sau kam lahuh, nuno' tuk Akui peluvat daha' Mesir ana té' kuri-kuri tada' aleng uh Ek na té' daha', ja ikam jam Akui anih nah Tuhan.”
3Tei nah Musa dawa' Harun pala Firaun dahin kuma' men iha', “Nunih nah dahun Tuhan, Allah daha' Ibrani, ‘Seng kuri dara kah la'an ika' seng em mun ngeliva kenep ka' ha' unan Kui? Bei nah daha' pahu Kui anih tei, ja daha' sebayang té' Akui. 4Awi ika' em mun daha' pahu Kui anih tei, jima Akui seng menei paho' alem daléh ka'. 5Paho' anan seng hangan tua ji-ji daléh ka', ateng kelunan em jam tana'. Paho' anan pah seng kani lim tuvuh dahin lim bua aleng melek tegu usan bato' arei dih, lim-lim tuvuh nun-nun seng en paho' anan kani. 6Uma ka' dahin uma daha' aleng té' ida ka' atih, nurei pah lim uma alem daléh Mesir seng penu kenan paho' anan. Nusi' payan té' aleng awi nunan alem urip taman kam dahin sepun kam men'a ateng-ateng dau anih,’ ken Tuhan.” Uh anan uli nah Musa dawa' men Firaun.
7Men'uh anan lim daha' aleng té' ida Firaun pah meteng iha', “Kuri dara kah kelunan anih seng jadi' hatoh té' itam? Bei nah daha' tei, ja daha' sebayang té' Tuhan Allah daha'. Nusi' payan ka' jam Mesir anih uh tasa' iah amei?”
8Nei nah daha' geri Musa dawa' Harun ha' uma Firaun la'an, en Firaun bara nah dawa', “Tei nah ikam sebayang té' Tuhan Allah kam anan. Hi lim aleng seng tei anan du?” ken na'.
9Ken Musa nyu'ei iha', “Lim kamé' tegak-tegak aleng seng tei anih. Nusi' té' kelunan seng té' melek, ateng kading, duba, dahin sapi' en amé' geri, avin kamé' seng na ji dau aya' men Tuhan hitih.”
10Bi ken Firaun men dawa' la'an, “Adang Tuhan té' dahin kam awi akui mun ikam tei paget anak kam nunan! Uh tula nah kua' mehuk kenep ji'ek kua' té' akui. 11Nusi' peletu akui mun ha' nunan! Bei nah ikam laké' dep aleng tei. Sebayang nah ikam té' Tuhan kam, avin anan nah aleng en kam akei.” En daha' uga nah dawa' men unan Firaun.
12En Tuhan duan pah Msua la'an, “Im jei nah hekun ka' anan ha' tana Mesir ja si' paho' nei hangan té' tana Mesir anan, nei kani tuvuh-tuvuh daha' aleng melek kenan usan bato' arei dih.” 13Pelalau en Musa jei nah hekun na' nyelibau tana Mesir, en Tuhan nei nah dih men matan dau pa'un medih ji dau ji malem dara na' alem daléh Mesir anan. 14#K Tula 9:2-3 Paho' anan pah nei nelekep té' ji-ji tana Mesir, nei té' ha'ut-ha'ut daléh na', kahum lelan nah paho' anan, nusi' payan té' paho' aleng awi nunan uh men'a, nunan pah aleng seng la'an lahuh. 15Ngepu'an tedah tua nah paho' anan té' tana Mesir, pitem tua nah tana anan kenan daha'. Paho' anan pah kani lim tuvuh dahin lim bua aleng melek kenan usan bato' arei dih. Ji itun bua pah em té' la'an té' bua dahin té' tuvuh-tuvuh aleng té' alem daléh Mesir anan, pah ma'ang nah ket atih en paho' kani.
16Petimah tua nah Firaun tei muvui Musa dawa' Harun la'an, ken na', “Akui uh na sala té' Tuhan Allah kam, té' kua' pah lahuh. 17Avin anan, masi nah akui té' sala kui ji hangun anih arin, sebayang nah té' Tuhan Allah kam atih, ja Iha' mebet katé' patei anih té' akui.” 18Leka' nah Musa dawa' men béh Firaun, pelalau sebayang nah dawa' té' Tuhan. 19En Tuhan nei nah dih aleng mahnga' la'an men pedah matan dau uli ja miyun paho' anan tei alem Banget Teberau. Ji-ji paho' pah em té' aleng melek ha' tana Mesir nan la'an. 20Bi en Tuhan na mahing nah kenep Firaun la'an, nusi' loh kah iha' mun daha' Israel anan tei leka' la'an.
Tulah kepitan: Lidem
21Lun en Tuhan duan pah Musa la'an, “Ju im usu ka' anan pala langit ja si' lidem nei ha', tana Mesir anan, ja kelunan pekakap-pekakap tua alem lidem.” 22#NDI 105:28; K Tula 16:10 En Musa ju nah usu na' pala langit, pelalau lidem uta'-uta' nah ji-ji usun tana Mesir nan alem telo' dau dara na'. 23Ji la'ung pah em jam ji la'ung aleng ha' béh, ji la'ung pah em deng pasan men ngavan na' alem telo' dau anan, bi tebei malah ha' uma daha' Israel tih.
24En Firaun uvui nah Musa la'an ken na', “Tei nah ikam, sebayang té' Tuhan, daha' doh dahin anak-anak kam en kam geri kah daha' dahin kam lahuh, bi kading, duba dahin sapi' kam meng kam geri na'.”
25Bi ken Musa, “Nusi' deng ka' em mekoh hulung amé', ja iha' té' en amé' tevek dahin en amé' mahun men Tuhan Allah amé'. 26Lim-lim hulung amé' en amé' geri, ji pah em té' en amé' lek, avin hulung anan nah en amé' ala ngavan kamé' sebayang té' Tuhan Allah amé', avin nusi' payan kamé' jam lahuh té' nun kamé' sebayang té' Tuhan men em payan kamé' ateng hitih.”
27Bi en Tuhan na mahing pah kenep Firaun la'an, nusi' loh kah iha' mun daha' Israel anan tei leka'. 28Ken Firaun men Musa, “Lap nah im men béh kui. Hituk sayu-sayu im, meng im seng nei ha' akui la'an. Awi ika' nei adang ika' matei.”
29Musa nyu'ei iha', “I, lan, nusi' nah akui nei jam ika' la'an, awi dahum anan.”
Currently Selected:
USANG DAHA' ISRAEL 10: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
