USANG DAHA' ISRAEL 3
3
Tuhan muvui Musa
1Musa pa'en pian hulung kading dahin duba Yitro#3:1 Té' dua' aran taman divan Musa, iha' tih Rehuel (tulan 2:18), dahin Yitro. Jam na', ji aran aleng aran na' lan, ji aleng bara iha' kelunan aya' té' alem daléh. taman divan na', laké imam ha' daléh Midian anan, tei nah iha' geri kading dahin duba atih ha' pedah atih tana ngahit atih, ateng nah iha' ha' ngalang Allah, iha' tih ngalang Horeb. 2#HST 7:30-34 Tinan nah Meliket Allah nei tula té' iha' té' alem kelat apui nei men alem ji kelukung uleng. En na' nyineng nah kelat apui anan nei musang men alem kelukung uleng atih, beka' nusi' ha' tutung. 3Lun kuma' nah Musa, “Sayu kui tei nyineng jeleng lepek arin, ket nun si' aleng selap anan. Avin na' nun kelukung uleng atih em tei tutung?”
4Kitan Tuhan nah iha' nei jeleng nyineng, pelalau en Allah duan nah iha' men alem kelukung uleng anan, ken Na' men iha', “U Musa, Musa.”
Lun ken Musa, “Akui kah anih Tuhan.”
5Iha' nah Tuhan kuma' la'an, “Meng im nei jeleng hinih, im uéh nah kasut ka' men kudek ka' anan, avin tana aleng ngavam nekring anan tana aleng ma'ang.” 6Ken Tuhan la'an, “Akui nah Allah tamam, Allah Abraham, Allah Ishak, dahin Allah Yakub.” Pelalau nah Musa madet neng na' avin iha' takut nyineng Allah.
7Lun ken Tuhan Allah men iha', “Akui uh jam lim-lim katé' daha' pahu Kui aleng ha' Mesir. Uh Kelenghek nah angih daha' avin kenan ji'ek kelunan aleng geri daha' nyadui atih. Kitak lan-lan nah katé' daha'. 8Avin anan nah Akui nei ngiléh ngenep makau daha' atih men usu kelunan Mesir, dahin geri daha' musang men daléh anan, tei ha' ji daléh aleng sayu dahin aleng layang, ji daléh aleng penu té' telang uso' dahin nyihun na', ha' ngavan kelunan Kanaan, kelunan Het, kelunan Amori, dahin kelunan Feris, kelunan Hewi dahin kelunan Yebus. 9Kerei inih té' Kui kelenghi angih bengsa' Israel atih, dahun daha' uh nei ateng ha' Akui, nurei pah Kitak lim-lim kah katé' daha' kenan kelunan Mesir atih lahuh. 10Kerei inih, Akui nyihu ika' tei pala Firaun ja ika' tei geri daha' pahu Kui atih, iha' tih geri daha' bengsa' Israel anan musang men daléh Mesir nan.”
11Ken Musa nyu'ei Allah, “Nusi' kui tekep tei pala Firaun dahin tei geri daha' bengsa' Israel nih musang men daléh Mesir nan.”
12Iha' nah Allah kuma', “Bareng si' Akui em té' dahim iah? Anih nah tada' aleng Ek uk men ika' ja ika' jam Akui aleng nyihu ika' tei, iha' tih tegu ika' uh geri bengsa' Israel anan musang men daléh Mesir na'a, ikam seng sebayang té' Akui ujung ngalang anih.”
13 #
Us 6:2-3
Ken Musa men Allah, “Iha' akui tei pala daha' Israel atih na'a, iha' akui kuma' men daha' nunih, ‘Allah sepun kam aleng nyihu akui nei pala ikam anih,’ kek men daha', mina daha' seng nyu'ei akui, ‘Nun aran Na'?’ ken daha' pah, seng nuno' nah tuk hu'ei ta' men daha'?”
14 #
K Tula 1:4,8 Ken Allah nyu'ei Musa, “Anih nah aran Kui: AKUI KAH ALENG ATEK-ATEK ALLAH LAN-LAN.” Ken Na' la'an, “Nunih dahum men daha' Israel atih, ‘AKUI KAH ALENG ATEK-ATEK ALLAH LAN-LAN ken Na' nurei dih Iha' aleng nyihu akui nei pala ikam nih,’ kum.” 15Ken Allah men Musa la'an, “Nunih dahum men daha' Israel atih, ‘Tuhan Allah daha' sepun kam atih, iha' nah aleng Allah Abraham, Allah Ishak, dahin Allah Yakub lahuh, Iha' nah aleng nyihu akui nei pala ikam anih,’ kum men daha'. Anan nah aran Kui pa'en-pa'en, aleng seng en lim-lim tebin kelunan tut ateng hiran-hiran tih.
16“Tei nah im, peng nah ketu daha' aleng dekaya' men hang daha' Israel atih, im bara nah men daha', ‘Tuhan aleng Allah daha' sepun tam dih, iha' tih Allah Abraham, Ishak, dahin Yakub, uh petula batung Na' men akui, dahin kuma', “Kitak pah-pah nah nun-nun aleng jadi' té' ikam ha' daléh Mesir atih. 17Anih nah Dahuk men ikam, Akui ngenep geri ikam musang men alem katé' Mesir anan dahin geri ikam ha' daléh kelunan Kanaan, kelunan Het, kelunun Amori, dahin kelunan Feris, kelunan Hewi dahin kelunan Yebus, geri ikam ha' ji daléh aleng penu té' telang uso' dahin nyihun na' atih.” ’
18“Tana' daha' uh kelenghi dahum anan, uh anan sayu im mavéh daha' aleng dekaya' aleng geri daha' Israel tei pala laja' Mesir. Sayu kelo' kuma' nunih men iha', ‘Tuhan Allah kelunan Ibrani uh nei tula té' kamé', iha' nah kamé' nei anih akei kamé' lim tei ha' tana ngahit, su na' telo' dau anau na' men inih, ja kamé' nevek ket en amé' uk bara bun usu amé' men Tuhan Allah amé',’ ken kelo'. 19Adang Kitak kah laja' Mesir anan peletu em mekoh ikam tei leka', bi iha' tei peden kenan usu aleng ningan tua kah iha' seng mekoh ikam tei. 20Bi Akui seng mejei usu Kui nyaman daléh Mesir nan té' kuri-kuri tada' aleng selap aleng seng Ek na té' hang daha', uh anan nuréh nah iha' mekoh ikam tei.
21 #
Us 12:35-36
“Akui seng na daha' Mesir pasi kenep nyineng daha' pahu anih, ja tegu ikam tei musang, nusi' nah ikam musang halah tua. 22Sayu ha'ut la'ung daha' doh akei té' daha' Mesir aleng peji uma dahin na' dahin aleng peji murip dahin na' lahuh, akei pirek dahin met dahin balun-balun lahuh en daha' anak aké' dahin anak kam aleng doh té', ja ha' té' ket en daha' té'. Nunan nah tuk ikam nyilé' kelunan Mesir anan.”
Currently Selected:
USANG DAHA' ISRAEL 3: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
