USANG DAHA' ISRAEL 2
2
Kanak Musa, iha' pah en daha' pekurip
1Té' nah ji laké' men pahu Lewi, ngehawa' nah iha' ji doh men pahu Lewi lahuh. 2Lun mali nah doh anan, lun nganak nah iha' ji anak laké'. En doh anan nyineng nah anak na' anan, kajau lan pah jam iha', pelalau en na' huk nah iha' telo' bulan dara na'. #HST 7:20; Ib 11:23 3Tei dara-dara, nusi' nah iha' deng mahuk anak anan la'an, en na' ala nah ji pati bulu tup pelalau ngeluwin na' té' keluwin, en na' tei nah anak na' anan halem na' dahin melo' pati anan té' bahé' hungei Nil atih, té' hang temadau. 4Tei nah harin laké' uk anan aleng doh aleng dekaya' té' iha' atih penga iha' men su, nyineng nuno' tuk-tuk harin na' atih dih.
5Lun nei nah anak Firaun aleng doh atih duh ha' hungei Nil, dahin daha' nyemdoh aleng bakéh-bakéh na' lahuh. Panau-panau nah dalo' té' bahé' hungei anan, beka' kitan anak Firaun aleng doh anan nah pati aleng té' bahé', té' hang temadau anan dih, en na' nyihu nah ji doh bakéh na' atih tei ala na'. 6En na' luba' nah ben na' ké', beka' té' ji anak aké' halem na', anak anan pah nangih. Kenep anak Firaun anan pah masi lelan nyineng anak anan, dahin kuma', “Adang anak daha' Ibrani anih,” ken na' kah.
7Lun kuma' nah doh aleng harin laké' uk anan men anak Firaun aleng doh anan, “Nuno' kurim, ngenep ka' akui tei duan ji doh Ibrani ja mo' iha' dahin tuboh anak anih men ika' iah?” ken na'.
8Nyu'ei nah anak Firaun anan, “Sayu kah, tei nah im.” Pelalau nah doh uk anan tei duan hinan anak anan dih. 9Kuma' nah anak doh Firaun nan men hinan anak anan, “Im ari nah anak anih, tuboh nah iha' men akui, ek uk kah gaji ka'.” En doh anan ari nah anak anan dahin tuboh iha' sayu-sayu. 10#HST 7:21 Tegu anak atih uh dekaya', en na' aten nah iha' pala anak Firaun anan dih, iha' pah mamung anak anan jadi' anak na'. En na' na nah aran na' Musa, alem na', “Avin akui uh ala iha' men alem hungei.”
Musa tei lap ha' Midian
11 #
Ib 11:24
#HST 7:23-28 Men'uh anan dih, nei-nei dekaya' nah Musa. Tegu iha' uh dekaya' lun tei nah iha' panau' ngenep jam daha' harin-harin na', iha' pah nyineng daha' alem daha' na hadui aleng bahat lelan atih. Alem iha' panau-panau, kitan na' nah ji kelunan Mesir nukun ji kelunan Ibrani, ji kelunan bengsa' na'. 12En Musa nyineng nah hiréh hitih, nusi' té' kelunan kitan na', pelalau nah iha' lematei laké' Mesir anan dih, en na' tanem nah patei na' alem hit. 13Tei nah iha' dau malah ji la'an, kitan nah pah dua' la'ung kelunan Ibrani alem dawa' pano'. Kuma' nah iha' men ji aleng sala atih, “Avin na' nun ka' meté' bakéh ka' anan?”
14Pelalau nah laké' atih nyu'ei, “Hi kah aleng na ika' kelunan aya', ja ka' mano' kawa' nunih? Ika' kuma' nunan ké' avin ika' ngenep lematei akui awi ika' lematei laké' Mesir dehalem dih anan iah?” Pelalau takut nah Musa tegu anan, avin iha' pelemana', “Adang uh kitan daha' nah hadui kui dehalem dih kurik,” ken na'. 15#HST 7:29; Ib 11:27 Tegu laja' Firaun jam tuk aleng nunan, pelalau nah iha' ilau alan ngenep lematei Musa. Bi Musa tei lap Firaun, tei ha' daléh Midian, melo' nah iha' hinan té' béh ji lesung.
16Té' pah ji imam ha' daléh Midian anan, imam anan té tusu dalo' anak doh na'. Nei nah dalo' leva ata' men kading dahin duba dalo', dahin mesoh ata' alem bungan hulung-hulung laké' aya' aleng taman dalo' anan. 17Beka' nei nah kuri-kuri la'ung dalo' aleng pian duba muga dalo' tinan. Pelalau tei nah Musa biti tei masi dalo' doh atih, ma'uk ata' men kading dahin duba dalo' anan. 18Tegu dalo' doh anan ateng ha' taman dalo', iha' tih laké' Rehuel atih, ken na' meteng dalo', “Na' nun kelo' salet uli dau anih?”
19Nyu'ei nah dalo', “Té' ji laké' Mesir nei masi kalo' tegu daha' aleng pian duba atih nei muga kalo', iha' pah masi kalo' leva ma'uk ata' men kading dahin duba lahuh.”
20Ken Rehuel men dalo' anak na' anan, “No' ha' sikah? Na' nun kelo' melek kelunan anan? Duan nah iha' nei huma nih kuman.”
21Musa pah sayu lan kenep melo' alem amin anan, en Rehuel ih nah anak na' Zipora men Musa jadi' hawan na'. 22Lun nganak nah dawa' ji anak aké', en Musa na nah aran anak na' Gersom, avin ken na', “Avin akui anih awi ji kelunan hakei alem daléh anih.”
23Kuri-kuri duman men'uh anan matei nah laja' Mesir anan dih. Menghui tua nah daha' Israel dahin pepdéng tua, avin katé' lelan nah daha' té' hadui daha, angih daha' pah ateng ha' unan Allah. 24#Ar Kel 15:13-14 Kelenghen Allah nah ha'ui daha' atih, hituk nah Iha' té' jaji Na' dahin Abraham, nurei pah dahin Iskak, nurei pah dahin Ishak, nurei pah dahin Yakub dih lahuh. 25En Allah nyineng nah daha' Israel anan, kitan Na' pah katé' daha'.
Currently Selected:
USANG DAHA' ISRAEL 2: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
