USANG DAHA' ISRAEL 4
4
Tuhan ma'uk tingan men Musa
1Nyu'ei nah Musa, “Nuno' awi daha' em ngioh dahuk dahin em kelenghi aleng ek bara? Mina daha' kuma' nunih, ‘Nusi' Tuhan petula batung Na' men ika',’ ken daha' ké', seng nun dahuk?”
2Ken Tuhan nyu'ei iha', “Nun aleng alem usu ka' anan kurim du?” Iha' nah Musa kuma' “Hekun,” ken na'.
3Ken Tuhan, “Sayu im mesau na' té' tana.” Tegu iha' mesau na', pelalau hekun anan balui nyipa', Musa pah lap té' béh na'. 4Ken Tuhan men Musa, “Tei im nyekalet ikoh na',” pelalau en na' sekalet nah ikoh na' pelalau balui hekun nah la'an té' alem usu na'. 5Kuma' nah Tuhan, “Nunan nah im na, ja daha' nginah té' Akui aleng Tuhan Allah sepun daha', iha' tih Allah Abraham Allah Ishak dahin Allah Yakub, uh nei tula té' ika'.”
6Ken Tuhan men Musa la'an, “Im tei nah usu ka' alem basung ka'.” Pelalau en Musa tei nah usu na' alem basung na', en na' jat nah la'an, beka' usu na' perah malin, puti awi usan leju#4:6 USAN LEJU Alem Bahasa Kebangsaan, thalju. Anih pati, nyingem, seng awi usan bato', bi ha' lema, ngenek tua. Tegu ha' té' kahum nei legak té' tana, jadi' mahing nah. Tegu ha' ga' lasu' balui ata' la'an. dih. 7Ken Tuhan la'an, “Im tei nah usu ka' alem basung ka' la'an.” En na' tei nah usu na' la'an, uh anan en na' jat nah la'an, beka' sayu nah usu na' awi batung na' malei kah la'an. 8Ken Tuhan men Musa, “Awi daha' em nginah té' dahum dahin muau té' tada' aleng una' anan, mina daha' seng menglan té' tada' aleng kedua' anan. 9Awi daha' em menglan té' dua' tada' anih pah dahin em ngioh dahum, sayu im tei ala ata' hungei Nil im uak nah té' tana aleng megang. Ata' aleng im ala anan seng balui daha té' tana megang anan.”
10Ken Musa la'an men Tuhan, “U Tuhan kui, akui ji'ek nih ji kelunan aleng em peletu tugé' duan, menuna' pah nusi' té' lep'un ta' uh duan, ateng Ka' duan akui anih pah akui em haman duan, avin ita' ji'ek nih em té' daho', dahin em tugé' duan pah ita' ji'ek lahuh.”
11Ken Tuhan men Musa la'an, “Hi kah aleng na jelan kelunan? Hi aleng na kelunan mameng, hi kah aleng na kelunan madeng, na kelunan jam nyineng, na kelunan tei buta' lahuh? Nusi' ha' Akui, aleng Tuhan iah? 12Avin anan, tei nah im, Akui aleng seng pakei jelam dahin bara ika' nun aleng tekep im bara.”
13Bi ken Musa, “Tau nei, Tuhan, Im nyihu nah ji la'ung ha' béh aleng tekep Kurim, sayu kah,” ken na'.
14Bunget nah Tuhan na Musa nan, ken Na' “Té' kah Harun kelunan Lewi atih, harim aleng dekaya' té' ika', iha' pah aleng haman lan nengaran. Té' ha' uh nei kerei inih pala ika'. Tegu iha' jam ika', iha' pah melu lan kenep na'. 15Sayu im tengaran dahin na' dahin bara daho' aleng tekep en na' bara. Akui seng pakei jelam dahin pakei jelan na', dahin katuk kua' nun aleng tekep kua' na. 16Iha' nah aleng seng duan daha' men kua', iha' aleng seng pejoh dahum, ika' pah aleng seng itung awi Allah men kua'. 17Im geri nah hekun anih im gem, ja ika' pakei na' ngavam na tada' avan daha ngeniheng.”
Musa uli ha' Mesir
18Tei nah Musa pala Yitro taman divan na' bara iha', “Akui ji'ek seng ngenep tei jam dalo' harik ha' Mesir tih nah anih amei, tei nesek dalo', lung si' dalo' ji'ek té' loh murip. Mun ka' akui tei iah?” Yitro pah nyu'ei Musa, “Sayu kah anak, tei nah im, nyineng sayu ngavam tei.”
19Adang ha' uh té' kah dahun Tuhan men Musa tegu iha' té' ha' Midian dih lahuh, aleng kuma', “Uli nah im tei ha' Mesir, uh matei lim nah daha' aleng ngenep lematei ika' dih.” 20Men'uh anan en Musa bara nah hawan na' dahin lim anak aké' na', dahin metei dalo' hujung la'ung keledei, pelalau tei nah dalo' uli ha' tana Mesir, hekun Allah atih pa'en en na' gem alem usu na'.
21Ken Tuhan men Musa, “Tegu ika' tei uli ha' Mesir, sayu nah im hituk si', lim-lim tada'-tada' aleng uh Ek uk alem usu ka' anan, im na nah ha' unan Firaun. Bi kenep na' seng Ek na mahing, ateng iha' em mun mekoh daha' anan tei. 22Sayu im kuma' men Firaun, ‘Nunih nah dahun Tuhan: Israel anih nah aleng anak Kui lelan, anak Kui aleng una' loh-loh, 23#Us 12:29 Akui pah kuma' men ika', “Bei nah anak Kui anan tei, ja si' daha sebayang té' Akui.” Awi ika' em mun daha' tei, adang Akui seng lematei anak aké' ka' aleng una',’ kum men iha'.”
24Tegu dalo' tudu té' hang alan, nei nah Tuhan pala Musa ngenep seng lematei iha'. 25En Zipora ala nah ji iuh bato', pelalau nyunat anak aké' na', men'uh anan en na' asat nah anit sunat atih té' kudek Musa, dahin kuma', “Akui ngehawa' daha tua anih ngehawa' ika'.” 26Nusi' nah Tuhan lematei Musa. (Tegu anan nah Zipora kuma', “Akui ngehawa' daha tua anih ngehawa' ika',” avin tavit sunat anan dih.)
27Lun kuma' nah Tuhan men Harun, “Tei nah im pala Musa ha' tana ngahit atih.” Lun tei nah iha pelalau pepsuk dahin Musa ha' ngalang Allah, peparek nah dawa'. 28Iha' nah Musa bara Harun lim-lim dahun Tuhan aleng en Tuhan nyihu na' na, dahin bara iha' lim tada' aleng en Na' nyihu Musa na atih. 29Tei nah Musa dawa' Harun mepeng lim-lim daha' aleng dekaya' men daha' Israel. 30Lun en Harun bara nah dahun Tuhan aleng uh en Tuhan bara men Musa anan dih, dahin na tada'-tada' anan ha' unan daha'. 31Daha' anan pah nginah. Tegu daha' kelenghi Tuhan té' masi Israel nunan dahin uh jam katé' daha', pelalau nah daha' nyepukun dahin nukem meju Iha'.
Currently Selected:
USANG DAHA' ISRAEL 4: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
