USANG DAHA' ISRAEL 20
20
Pulu Tebara en Tuhan ih
Kel d M 5:1-21
1Nunih nah dahun Tuhan duan daha',
2“Akui nah Tuhan, Allah kam, aleng uh geri ikam musang men tana Mesir, men ngavan kam jadi' dipen arei dih.
3“Meng kam sebayang té' ket tung-tung aleng dep men'uh Akui.
4 #
Us 34:17; Lewi 19:4; 26:1; Kel d M 4:15-18; 27:15 “Meng kam na hudo' ngioh awi ju ket nun-nun aleng ha' langit aleng hujung, nunan pah aleng ha' tana aleng hida lahuh, nunan pah aleng té' té' alem hungei behida tana lahuh. 5#Us 34:6-7; Kah d Is 14:18; Kel d M 7:9-10 Meng kam nyepida tei ngetalau té' ket nunan, meng seng nyeluk té' iha', avin Akui nah aleng Tuhan Allah kam, Allah aleng mi'en. Akui nyulei sala taman tei ateng ha' anak-anak daha', ateng ha' tebin na' aleng ketlo' dahin aleng kepat men daha' aleng heléh té' Akui nutih. 6Bi Akui bara halam Kui aleng em tei ketapah men libu'-libu' kelunan aleng nyalam té' Akui dahin aleng gem pa'en tebara-tebara Kui.
7 #
Lewi 19:12
“Meng kam metut aran Tuhan Allah kam tung-tung, avin Tuhan té' nyineng sala kelunan aleng metut aran Na' tung-tung nutih.
8 #
Us 16:23-30; 31:12-14 “Hituk nah ikam té' Dau Kelarah ja kam na na' ma'ang. 9#Us 23:12; 31:15; 34:21; 35:2; Lewi 23:3 Nem dau dara na' ikam nyadui dahin na nun-nun hadui kam, 10bi dau aleng ketusu anan nah Dau Kelarah, en kam na men Tuhan Allah kam. Meng seng na nun-nun hadui té' dau anan, sayu pah ika', nurei pah daha' anak-anak ka' aleng laké', nurei pah daha' anak-anak ka' aleng doh, nurei pah panyin ka' aleng laké', nurei pah panyin ka' aleng doh, nurei pah hulung ka', nurei pah daha aleng nyakei té' alem amin ka'. 11#Ar Kel 2:1-3; Us 31:17 Avin alem nem dau dara na' Tuhan na langit dahin usun tana anih nurei pah banget dahin lim-lim huang na' atih, melo' nah Iha' té' dau aleng ketusu, aleng ketusu anan nah en Tuhan na Dau Kelarah, adahin ngem'ang na' men Iha' lahuh.
12 #
Kel d M 27:16; Mat 15:4; 19:19; Mk 7:10; 10:19; Lk 18:20; Ef 6:2 “En kam ju nah taman kam dahin hinan kam, ja urip kam aru té' tana aleng en Tuhan Allah kam uk men ikam.
13 #
Ar Kel 9:6; Lewi 24:17; Mat 5:21; 19:18; Mk 10:19; Lk 18:20; Rom 13:9; Yak 2:11 “Meng kam lematei kelunan.
14 #
Lewi 20:10; Mat 5:27; 19:18; Mk 10:19; Lk 18:20; Rom 13:9; Yak 2:11 “Meng kam nuyang.
15 #
Lewi 19:11; Mat 19:18; Mk 10:19; Lk 18:20; Rom 13:9 “Meng kam nakau.
16 #
Us 23:1; Mat 19:18; Mk 10:19; Lk 18:20 “Meng kam na teksi' aleng pamoh men kelunan.
17 #
Rom 7:7; 13:9 “Meng kam ngivah uma daha' ha' béh, meng kam ngivah hawan daha' ha' béh, nurei pah panyin na' aleng laké', nurei pah panyin na' aleng doh, nurei pah sapi' na', nurei pah keledei na', nurei pah ket nun-nun aleng anun daha' ha' béh.”
Daha' Israel takut
Kel d M 5:22-33
18 #
Ib 12:18-19
Tegu lim daha' bengsa' atih té' jam dahun tekip belaré, dahin kejet bekilet, nurei pah dahun selingut ba, nurei pah ngalang anan ngelisun tua, ngetiwet tua nah daha' bengsa' atih takut, nekring men su tua nah daha'. 19Ken daha' men Musa, “Sayu nah ika' dep tua aleng nengaran men kamé', ju en amé' kelenghi kah dahum, bi meng ha' Allah aleng bara kamé', matei kamé' na'a.”
20Bi Musa kuma' men daha' atih, “Meng takut, avin Allah uh nei ngiléh ngenep pesek ikam ja ikam takut pa'en té' Iha', ja ikam em na sala.” 21Lim daha' atih nekring men su tua, bi Musa sa' tei jeleng avun aleng ngelidem tua atih, iha' tih ha' ngavan Allah té' nei ngiléh atih.
Tebara marung na avo'
22Lun kuma' nah Tuhan men Musa, “Im bara nah Dahuk nih men daha' Israel, “Ikam pah aleng uh jam Akui té' nei tengaran dahin kam men ujung langit. 23Avin anan meng nah ikam na ket nun-nun en kam ketalau té' unan Kui, meng kam na hudo' pirek dahin hudo' met en kam ketalau lahuh.
24“ ‘Sayu nah ikam ala tana, na avo' kam atih men Akui. Té' ujung na' nah ikam ma'uk lim bun usu kam en kam tevek en kam pahun men Akui, dahin bun usu aleng en kam uk aleng avan kam pahlung Dahik, iha' tih duba dahin sapi' kam. Té' ha'ut-ha'ut ngavan aleng Ek petneng anan nah ikam na, ja pehituk ikam té' aran Kui, Akui pah seng nei ha' ikam ja ma'uk asi men ikam. 25#Kel d M 27:5-7; Yos 8:31 Bi awi ikam ala bato' na avo' atih men Akui, meng kam na na' men bato' aleng uh en kam melebu, tana' pah ikam na na' té' bikung, ikam demasep na' tua nah anan. 26Nurei pah lahuh, meng kam pakei san tei pala avo' Kui atih, bahi ikam awi utoh jam kam atih.’
Currently Selected:
USANG DAHA' ISRAEL 20: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
