USANG DAHA' ISRAEL 21
21
Daha' nyam Ibrani aleng jadi' dipen
Kel d M 15:12-18
1“Anih nah tuk-tuk adet aleng im tira té' unan daha' lim-lim. 2#Lewi 25:39-46 Tana' ji la'ung melé' ala kelunan Ibrani jadi' nyam alem amin, sayu nah iha' nyadui alem nem duman, alem duman aleng ketusu ké', sayu nah iha' en akau ja' iha' murip dep dahin em té' bayen nun-nun legah na' musang. 3Awi iha' ji la'ung tua aring ha' nei, en akau kah iha' dep nutih tua, awi iha' té' doh na' tegu iha' nei, en akau kah dawa' lim. 4Awi laké aleng ala iha' jadi' dipen anan ala doh men iha', iha' doh na' anan nganak, awi iha' laké', awi iha' doh kah anak na', sayu nah doh na' anan dahin anak anan melo' pa'en alem amin laké' aleng melé' iha' anan dih, laké' na' atih dep kah en akau. 5Awi laké' aleng jadi' dipen atih lan kuma', ‘Halam kui té' laké' aya' kui nih, té' doh kui dahin té' anak kui nih lahuh, nusi' kui ngenep seng takau murip dep awi daha' aleng uh en akau aréh,’ iha' ken na', 6sayu nah laké' aya' na' anan tei geri iha' pala Allah. Sayu iha' geri iha' pala ketamen, ha' jihé' ketamen tih lahuh sayu lim kah, sayu laké' aya' na' anan ngeluvang iling na' uk pakei ket aleng nyi'et bulan na', nuréh laké' anan deng nyadui pa'en men laké' aya' na' anan ji iung urip na'.
7“Iha' té' kelunan mebet anak doh na' jadi' dipen, nusi' nah iha' deng en akau awi jam tuk daha' laké' aleng dipen atih. 8Awi laké' aya' aleng ala iha' anan em nuno' ngenep té' doh dipen aleng uh na' ala men iha' anan, sayu nah laké' aya' na' anan mekoh iha' en daha' melé' uli la'an. Meng laké' aya' anan mebet iha' té' daha' bengsa' ha' béh, avin iha' uh em ngioh jaji na' té' doh anan. 9Awi laké' aya' anan ngenep doh anan hawan anak aké' na', sayu nah laké' aya' anan itung doh anan anak na' la'ung-la'ung. 10Awi iha' ala doh ha' béh, meng ha' ma'uk belaja' doh anan kanya, nunan pah kanan na' lahuh, nusi' ha' deng em tudu dahin na' lahuh. 11Awi laké' aya' anan em na telo' tuk anih té' doh anan, sayu nah iha' makau doh anan tua, meng té' bayen nun-nun legah na'.
Tebara marung tuk hadui ji'ek kelunan
12 #
Lewi 24:17
“Hi aleng nukun kelunan ateng ha' matei, iha' pah seng en lematei. 13#Kah d Is 35:10-34; Kel d M 19:1-13; Yos 20:1-9 Tana' iha' em kep'ung lematei kelunan atih, bi ha' ket Kenak tua kah ket atih, Akui seng nujo' ji ngavan men ikam, hinan nah ikam tei lap. 14Iha' ji la'ung kep'ung tua lematei bakéh na', avin kenep adang nyekitem pa'en ngenep lematei iha', en kam ala nah iha' tua ha' unan avo' Kui atih, en kam lematei nah iha' tua.
15“Hi aleng nukun taman na', hinan na' kah, iha' adang en ukum matei lahuh.
16 #
Kel d M 24:7
“Hi aleng nakau kelunan, sayu pah iha' uh tei belé iha' té' daha' ha' béh, mina iha' té' loh dahin na' kah, iha' pah adang en ukum matei tua lahuh.
17 #
Lewi 20:9; Mat 15:4; Mk 7:10 “Hi aleng nunu taman hinan na', iha' pah en ukum matei tua.
18“Iha' té' kelunan pano' ateng ji la'ung nukun ji pakei bato', awi mukut iha' kah, lan pah iha' em matei bi iha' ngeluven tua té' avan na' tudu, 19meng mukum kelunan aleng nukun iha' anan, iha' tih awi ji la'ung aleng ga' atih deng nei panau-panau hawang pakei hekun. Bi sayu laké' aleng meté' iha' atih bayen itung lugi na' té' hadui na' tua, dahin navah iha' dahin puboh iha' ateng iha' magéh lan.
20“Iha' té' ji la'ung nukun dipen na' aleng laké' nurei pah aleng doh lahuh ateng iha' matei, iha' en kam nyulei lahuh. 21Awi dipen na' atih murip alem ji dua' dau, meng nyulei iha', avin dipen na' atih kah aleng kelunan na'.
22“Iha' té' kelunan pano', iha' ji men dawa' tei mega' ji doh aleng mali, awi anak alem butit na' anan leruh, bi doh anan em té' ga' tusah nun-nun, kelunan anan pah ga' ukum bayen ngioh kahum aleng en hawan doh anan akei té' iha', dahin bayen ngioh awi aleng kurin daha' hakim lahuh. 23Bi awi doh anan ga' tusah aya', ukum kelunan anan dih adang henga' kalui henga', 24#Lewi 24:19-20; Kel d M 19:21; Mat 5:38 mata' kalui mata', ipa' kalui ipa', usu kalui usu, kudek kalui kudek, 25keleso' kalui keleso', ga' kalui ga', betung kalui betung, nunan nah tuk na'.
26“Iha' ji kelunan nujek matan panyin na' aleng laké', panyin na' aleng doh kah, iha' matan na' peso', sayu nah kelunan anan makau panyin na' anan tua itung kalui matan na' aleng peso' anan. 27Awi iha' mukut ba dipen na' aleng laké', dipen na' aleng doh kah, iha' ipen dipen na' atih pebet, sayu nah iha' makau panyin na' anan tua itung kalui ipen na' aleng puéh anan.
Ket aleng en daha' aleng hipun hulung na
28“Awi té' sapi' malo' kelunan, iha' kelunan anan matei, sayu nah nyeparik bato' té' sapi' anan ateng iha' matei, bi meng kani sin na', kelunan aleng hipun sapi' anan, nusi' kah iha' tekep ga' ukum. 29Bi awi sapi' anan uh té' malo' kelunan men'a, laké' aleng hipun sapi' anan pah uh en daha' duan lahuh, awi iha' em jaga sapi' na' anan, iha' sapi' anan malo' kelunan la'an, sayu nah nyeparik bato' té' sapi' anan ateng iha' matei, laké' aleng hipun sapi' anan pah en ukum matei lahuh. 30Awi iha' en nyihu bayen ligit, sayu nah iha' bayen lim aleng en daha' nyihu iha' bayen atih itung kalui hengan kelunan anan. 31Awi sapi' anan malo' daha' nyam pah lahuh, nunan lim kah ukum na' té' laké' aleng hipun iha' atih. 32Awi sapi' anan malo' kelunan aleng dipen pah, laké' kah doh kah lahuh, sayu nah laké' aleng hipun sapi' anan bayen telo' atuh gram#21:32 TELO' ATUH GRAM iha' tih ji unang kati'. pirek men laké aleng hipun dipen atih dih, sapi' anan pah en separik bato' ateng iha' matei.
33“Iha' té' kelunan na lesung dahin na luvang tana tei melek na' tua em na ben na', iha' té' sapi', awi keledei kah tei legak halem na' avin iha' em meben hungun na' nutih, 34sayu kelunan aleng hipun lesung anan ngalui na', bang lugi laké' aleng hipun sapi' anan, tei bayen legah hulung na' anan men laké' aleng hipun iha', laké aleng hipun lesung anan pah ala patei hulung anan. 35Awi sapi' ji kelunan malo' sapi' ji kelunan ha' béh ateng ha' matei, sayu mebet sapi' aleng murip anan, sin legah na' en petulan dua', sapi' aleng matei anan pah lahuh en petulan dua'. 36Bi awi sapi' anan uh kitan kelunan adang sapi' anan sapi' selanguk malo' kelunan men'a, iha' laké' aleng hipun iha' anan em jaga iha' pah, adang ha' bayen legah na' lim, iha' tih sapi' kalui sapi', sayu laké' aleng bayen atih ala patei hulung atih.”
Currently Selected:
USANG DAHA' ISRAEL 21: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
