USANG DAHA' ISRAEL 19
19
Daha' Israel ha' ngalang Sinai
1Uh telo' bulan men'uh daha' Israel uh musang men tana Mesir, tepet-tepet té' dau anan, ateng nah daha' ha' tana ngahit Sinai. 2Tegu daha' leka' men Rafidim atih, ateng nah daha' ha' tana ngahit Sinai, tinan nah daha' na lepau, nelunga' ngalang anan.
3Lun tei nah Musa ma'un ngalang anan pala Allah. Tuhan pah duan Iha' men ujung ngalang anan, “Nunih dahum men daha' Israel aleng men pahu Yakub anan. 4‘Matan kam lan-lan pah aleng uh nyineng ket aleng uh Ek na té' kelunan Mesir arei dih, dahin muno' tuk Akui uh ngelameng ikam geri ikam madang awi nyiho' dih, nei geri ikam pala Akui. 5#Kel d M 4:20; 7:6; 14:2; 26:18; Tit 2:14 #1 Pet 2:9 Kerei inih, iha' ikam lelan ngioh Dahuk dahin gem jaji Kui, ikam seng jadi' ji daven aleng Ngavak halam lelan men hang lim bengsa'. Akui aleng gem lim usun tana anih, 6#K Tula 1:6; 5:10 bi ikam nah aleng seng jadi' ji peng imam men Akui dahin ji bengsa' aleng ma'ang.’ Anan nah Dahuk im bara men kelunan Israel nan.” 7Lun en Musa uvui nah daha' aleng dekaya'-dekaya' men hang daha' Israel anan, pelalau bara daha' aleng dahun Tuhan aleng en Na' bara iha' atih. 8Lim daha' atih pah nyu'ei, “Kamé' ngioh dahun Tuhan anan kah anih.” En Musa bara na hu'ei daha' bengsa' atih men Tuhan.
9Lun kuma' nah Tuhan men Musa, “Akui seng nei pala' ika té' alem ji avun aleng kapan lelan, ja daha' bengsa' anan kelenghi Dahuk tengaran dahim, ja si' daha' menglan ika' pa'en.” Uh anan en Musa bara nah dahun daha' atih men Tuhan.
10Kuma' nah Tuhan men Musa, “Tei nah im ha' daha' bengsa' atih, nyihu nah daha' ngem'ang batung daha' dau anih, nurei pah jima lahuh, sayu daha' mesup kanan daha'. 11Té' dau aleng ketlo' sayu nah daha' mengan, avin té' dau aleng ketlo'anan Akui seng nei ngiléh ha' ngalang Sinai ha' unan daha' anan. 12#Ib 12:18-20 Avin anan, sayu nah im mejoh tada' hang telikin ngalang anan, dahin kuma', ‘Mengan sayu-sayu, meng peletu kam tei ma'un ngalang anan, tei ha' pa'un na' pah em deng lahuh, avin hi-hi aleng tei ga' ngalang anan, adang iha' en ukum matei. 13Meng ji la'ung gem kelunan anan, bi sayu iha' en separik bato', en nimek té' langa' jelut kah; ateng iha' matei, sayu pah tulan sayu pah iha', kelunan, meng seng pekurip iha'.’ Nunan dahum bara Dahuk men daha'. Tegu ikam jam dahun selingut ba aleng aru-aru dahun na', iha' tih selingut aleng men uheng duba, uréh nah daha' deng tei jeleng ngalang anan,” ken Tuhan.
14Lun ngiléh nah Musa men ujung ngalang anan nei pala daha' Israel, en na' nyihu nah daha' ngem'ang batung daha', dahin nyihu daha' mesup kanan daha' lahuh. 15Iha' nah iha' kuma' men daha', “Mengan nah té' dau telo' na'a, meng ji la'ung men hang kam laké' tei peji tudu dahin daha' doh.”
16 #
K Tula 4:5
#Kel d M 4:11-12 Tegu jihima pesun-pesun, té' dau aleng ketlo' anan, duan nah belaré, bekilet pah té' lahuh, nurei pah avun aleng kapan nei meluk ujung ngalang anan, dahin dahun selingut ba uheng duba pah hawen tua, lim daha' aleng ha' lepau anan dih pah ngetiwet tua. 17En Musa geri nah daha' anan musang men alem lepau daha' tei pala Allah. Nekring nah daha' ha' pa'un ngalang anan. 18Nei nah lisun meluk té' ngalang Sinai anan, avin Tuhan té' nei ujung na' té' alem apui. Lisun anan pah ngebeluluk tua awi lisun luma' tu'an en daha' havet dih, ngalang anan pah tegen tua. 19Sa' dara sa' mihet tua pah dahun selingut uheng duba atih. Lun duan nah Musa, en Allah nyu'ei nah iha' tegu belaré' nei duan. 20Nei nah Tuhan ngiléh hujung ngalang Sinai, ha' ujung ujet na', en Tuhan uvui nah Musa tei ma'un ujet ngalang anan. Tei nah iha' pelalau ma'un. 21Men'uh anan kuma' nah Tuhan men Musa, “Ngiléh nah, im pehituk daha', ja meng daha' mutam kelahen anan dih, bahi daha' ngenep jeleng Akui seng nyineng, ujung-ujung kahum daha' matei na'a. 22Daha' imam pah aleng mengalei nei jeleng Akui, sayu nah daha' ngem'ang batung daha', bahi Akui pelalau mukum daha'.”
23Musa kuma' men Tuhan, “Mina nusi' kah daha' bengsa' anan nei jeleng ngalang Sinai anih, avin Ika' uh té' pehituk kamé' dih, ‘Joh nah tada' hang telikin ngalang anan bara deng aleng uh Ek na ma'ang,’ Kum dih.”
24Tuhan kuma' men iha' la'an, “Tei nah im ngiléh, ma'un kah kua' Harun la'an, bi meng mun daha' imam dahin daha' aleng bangu atih mutam kelahen anan seng ngenep nei jeleng Akui, ja daha' em ga' ukum.” 25Iha' nah Musa tei ngiléh bara lim tuk anan dih men daha'.
Currently Selected:
USANG DAHA' ISRAEL 19: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
