USANG DAHA' ISRAEL 1
1
Daha' Israel katé' ha' Mesir
1 #
Ar Kel 46:8-27
Anih nah aran daha' anak Yakub aleng pahu Israel atih, iha' tih lim-lim daha' panak-panak alem amin daha' aleng tei leka' pegak-pegak ha' Mesir: 2Ruben, Simeon, Lewi dahin Yehuda, 3Isakhar, Zebulon dahin Benyamin, 4Dan, Naftali, Gad dahin Asyer. 5Lim daha' pahu Yakub nan té' tusu-pulu la'ung, bi Yusuf uh té una' ha' Mesir tegu anan. 6Alem daha' té' hinan nah Yusuf matei, nurei pah lim daha' harin na' dahin daha' ha' béh aleng piah tebin na' atih lahuh. 7#HST 7:17 Men'uh anan daha' Israel pah nei nganak lim, nurei pah sau-sau daha' lahuh, daha' pah pi'at nei-nei katan dahin sa'-sa' nei kapan dahin tugé', ateng daléh anan penu tua kenan daha'.
8 #
HST 7:18
Men'uh anan té' nah ji laja' maring la'an gem daléh Mesir, laja' anan nusi' ha' jam Yusuf. 9Kuma' nah laja' anan men daha' kelunan Mesir, “Daha' Israel anih sa'-sa' nei kahum lelan, kelalau kapan nah daha' men'uh itam anih. 10#HST 7:19 Sayu nah itam na aken na daha', ja si' daha' em sa'-sa' nei kapan la'an. Awi tegu ayau nei perang lawan itam ji hangun tih, ujung daha' anih pah aleng tei pakat dahin daha' ayau tam atih, ujung daha pa nei lawan itam la'an, pelalau tei lap men daléh anih,” ken na'.
11Iha' nah daha' Mesir mili kuri-kuri la'ung jadi' dekaya', ja geri daha' Israel na hadui aleng katé' lelan, en daha' nyihu nah daha' na dua' uma aya' men Firaun, iha' tih Pitom dahin Raamses, ja ngavan na' melo' nguyo' na'. 12Lan pah daha' Mesir sa' pekaté' daha' Israel nunan, bi sa'-sa' nei kapan pah daha', putat tua nah daha' alem daléh Mesir anan, daha' Mesir pah takut tua' té' daha' Israel nan. 13Sa' en daha' Mesir ngepden pah daha' Israel nyadui bahat la'an. 14Sa' en daha' na huwi katé' pah urip daha' Israel nan la'an, ngepden nyihu daha' na hadui aleng kelalau bahat, iha' tih ngalit tana na bato' bata, dahin na kuri-kuri hadui aleng bahat lahuh ha' luman daha'. Lim-lim hadui aleng bahat-bahat en daha' Mesir nyihu daha' na.
15Kuma' pah laja' Mesir anan men dua' doh bidan aleng masi-masi daha' doh Ibrani atih, aran ji Sifra, aran ji Pua, 16ken na' men dawa', “Tegu kua' masi doh daha' Ibrani atih aveng daha' nganak, sayu kua' nyineng anak daha' tana' ha' laké', en kua' lematei nah iha' tua, bi tana' ha' doh, bei nah iha' murip.” 17Bi dawa' bidan anan takut té' Allah, nusi' nah dawa' ngioh dahun laja' Mesir anan dih, en dawa' pekurip nah lim anak aké lahuh. 18En laja Mesir uvui nah dawa' bidan anan la'an dahin kuma' men dawa', “Na' nun kua' na nunan, pekurip anak aké' daha' tih?”
19En dawa' nyu'ei nah Firaun, “U amei, avin nusi' doh daha' Ibrani piah kamé' doh Mesir anih. Avin sayu lan daha' doh Ibrani anan nganak. Men em payan kawa' ateng tei masi daha' beka' uh nganak nah daha',” ken dawa'. 20Avin anan Allah pah na sayu té' dawa' bidan anan. Sa'-sa' pi'at nah daha' bengsa' Israel nei katan, dahin kelalau tu'a pah daha' lahuh. 21Avin dawa' bidan anan takut té' Allah, en Na' ju nah alem amin dawa', ma'uk kuri-kuri anak men dawa'. 22#HST 7:19 Lun kuma' nah Firaun men daha' lim alem daléh na' atih, “Sayu nah mesau lim-lim anak laké' daha' Ibrani anan alem hungei Nil, bi bei nah lim anak doh daha' murip.”
Currently Selected:
USANG DAHA' ISRAEL 1: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
