USANG DAHA' ISRAEL 15

Nyanyi en Musa na

1 # K Tula 15:3 Tegu atih Musa dahin daha' Israel na nyanyi anih mahek Tuhan, ken nyanyi atih,

Sayu nah akui nyanyi men Tuhan avin Iha' kelalau maren.

Guda' dahin daha' aleng hujung na' en Na' sau alem banget.

2 # NDI 118:14; Yes 12:2 Tuhan nah aleng u'a kui dahin aleng ek hek,

Iha' nah aleng pa'un urip kui,

Iha' nah aleng Allah kui, aleng ek hek lelan,

Iha' nah aleng Allah tamak, aleng ek ju lelan.

3Tuhan atih na aleng kepala' perang,

Tuhan, anan nah aran Na'.

4“Kelita' Firaun dahin seladu na' en Na' sau alem banget.

Lim daha' aleng tu'a aleng en daha' mili, daha' anan nah en Na' jem alem Banget Teberau.

5Daha' uh lenyep kenan ata' banget,

daha' uh ngenei awi bato',

daha' ngenei ha' hungei aleng dalem.

6“Tuhan, usu Ka' bah ta'o maren avin tingan Ka'.

Tuhan, usu bah ta'o Ka aleng lemhik ayau.

7Avin Ika' kelalau maren, Ika' pah pekalah hi-hi aleng nei peju lawan Ika'.

Ika' uh menei apui unget Ka', aleng nei nutung daha' awi nutung tungun jelei.

8Té' dih Hengam tua lim ata' banget tei petelesen.

Ata' aleng nei ban atih pelalau tepaka' awi bato' ung.

Hungei aleng dalem atih jadi' mahing ha' belua banget tih.

9“Iha' nah daha' ayau kuma', ‘Sayu tam livoh, ja itam behi'a daha'.

Sayu tam nyilé' ketanun daha', tuken tam bara hengan tam kah men daha'!

En tam sek si' ian malat tam té' daha', en tam lemayo' daha' lepek!’ ken daha' kah.

10Bi Ika' mahen daha' té' bahui aya' Ka', banget pah lemnyep daha'.

Daha' ngenei alem ungei awi jam tuk bato'.

11“U Tuhan, hi kah aleng awi Ika', té' hang ket en daha' ketalau?

Hi kah aleng maren awi Ika'?

Avin Ika' kelalau ma'ang,

avin hadui Ka' aleng kelalau dengah,

Ika' na hadui ngavan ta' ngeniheng lahuh.

12Ika' mejei usu Ka' bah ta'o,

usun tana anih pah pelalau nyelu daha'.

13“Té' halam Ka' aleng em tei ketapah atih Ika' uh mayak daha' pahu Ka' aleng uh Im akau.

Té' tu'a Ka' Ika' uh mayak daha' ha' Ngavam aleng ma'ang atih.

14Tegu bengsa' ha' béh kelenghi tuk anan na'a, adang daha' pelalau ngetiwet takut,

akut pah nada' té' daha' ha' tana Filistin atih lahuh.

15Tegu anan ngihau tua nah lim kepala' daha' ha' Edom.

Akut aleng pekelalau lalé' pah nei té' daha' aleng geri daha' ha' Moab atih,

ngepu'an ngetiwet tua nah lim kelunan ha' Kanaan.

16Akut dahin kihau nei té' daha'.

Avin kenan tingan usu Ka', daha' menjep pelalau tua awi bato',

ateng daha' pahu Ka' pah deng tei lawat, u Tuhan,

daha' pahu Ka' aleng uh Im melé' pah deng tei lawat.

17Ika' aleng geri daha' halem, dahin nuvuh daha' ha ngalang Ka',

té' ngavan aleng uh Im na Ngavam melo', u Tuhan,

té' Avan aleng Ma'ang aleng kenan usu Ka', u Tuhan.

18Tuhan aleng gem pa'en ateng-ateng baya.”

Nyanyi en Miryam na

19Tegu guda' Firaun dahin kelita na' dahin daha' aleng pakei guda' uh tei alem ungei, pelalau Tuhan mekep banget anan lemnyep daha', bi daha' Israel panau té' avan aleng megang men belua banget.

20Pelalau Miryam, nabi doh atih, aleng harin doh Harun, ala tuvung na', nei nah lim daha' doh jeleng iha' dahin dak tuvung daha', pelalau nyivan. 21Miryam aleng mayak daha' nyanyi,

“Nyanyi nah men Tuhan, avin Iha' aleng kelalau maren,

guda' dahin daha' aleng pakei guda' en Na' sau alem banget.”

Ata' pa'i jadi' mih

22En Musa geri nah daha' leka' men Banget Teberau, tei ha' tana ngahit Syur. Telo' dau daha' panau alem tana ngahit atih em té' ata' en daha' du'i. 23Ateng nah daha' ha' Mara, nusi' daha' deng du'i ata' aleng ha' Mara anan, avin pa'i. Anan nah tavit na' daha' na aran tinan Mara. 24Lun pekelebeng tua nah daha' Israel na Musa, ken daha', “Seng ket nun en amé' du'i?” 25Iha' nah Musa sebayang té' Tuhan, iha' nah Tuhan bara ji utuh kayo', en Musa sau nah kayo' anan alem ata' anan, pelalau mih nah ata' anan.

Tinan nah Tuhan petneng ji daho' dahin ji tebara men daha', tinan pah Tuhan pesek daha' anan. 26Ken Na' men daha', “Awi ikam tangen lelan ngioh Dahuk, aleng Tuhan Allah kam, dahin na ket aleng teneng ha' unan Kui, dahin meting iling kam kelenghi Dahuk bara katuk-katuk Kui anih, dahin tangen ngioh lelan lim tebara Kui, nusi' nah Akui seng menei nun-nun perah aleng Ek tei té' daha' Mesir dih, avin Akui nah Tuhan aleng petagéh ikam.”

27Men'uh anan ateng nah daha' ha' Elim, tinan lahuh té' pah pulu-dua' itung ata' dahin tusu-pulu iung bua korma, lun en daha' na nah lepau daha' tinan té' banghé' hungei.

Currently Selected:

USANG DAHA' ISRAEL 15: TDK1990

Highlight

Copy

Compare