USANG DAHA' ISRAEL 16
16
Mana dahin manuk tepikung
1Lun leka' nah lim peng daha' Israel anan men Elim, ateng nah daha' ha' tana ngahit Sin atih, aleng té' hang Elim dahin ngalang Sinai, iha' tih té' pulu-lima' dau bulan aleng kedua' tegu daha' uh musang men tana Mesir atih. 2Pekelebeng tua nah lim peng daha' Israel na Musa dawa' Harun ha' tana ngahit anan. 3Ken daha' men dawa', “Ya'ah, pulang sayu kamé' matei kenan usu Tuhan ha' tana Mesir dih, tegu kamé' melo' té' béh taring aleng penu té' dapi dahin luti aleng na ita' besoh hitih. Na' nun kua' nei geri kamé' ha' tana ngahit anih ngenep seng lematei lim kamé' pelien tua nunih?”
4 #
Yoh 6:31
En Tuhan duan nah Musa, “Akui seng menei luti men ikam, nei awi usan men langit. Sayu daha' tei ngavang na' ha'ut-ha'ut dau ala aleng sukup men daha' alem ji dau. Akui seng pesek daha', nuno' seklung si' daha' ngioh dahin em ngioh katuk Kui. 5Tegu dau nem, sayu daha' na peksak ket aleng uh kelan daha' atih, sayu daha' ngavang dua' hangun kahum men'uh aleng mengalei en daha' ngavang alem kuri dau-dau aleng uh.”
6Uh anan kuma' nah Musa dawa' Harun men daha' Israel, “Levi anih jam nah ikam Tuhan aleng uh geri ikam musang men daléh Mesir. 7Jihima jima ikam seng jam aren Tuhan, avin Iha' uh té' kelenghi dahun kam pekelebeng tua na Iha'. Kawa' anih seng hi aleng kawa' kurin kam, ja ikam meté' ngelebeng na kawa' nunan?” 8Ken Musa nah la'an, “Ikam pah jam, adang ha' Tuhan kah aleng ma'uk sin tulan men ikam tegu levi, dahin ma'uk luti aleng ngebesoh ikam tegu jihima, avin uh kitan Na' lan nah kelebeng kam na Iha' nunan. Kawa' anih seng hi kah aleng kawa'? Nusi' kam ngelebeng na kawa' anan, ikam ngelebeng Tuhan aleng anan,” ken dawa'.
9Ken Musa men Harun, “Im bara nah lim daha' Israel nan, ‘Nei nah ikam jeleng ha' unan Tuhan, avin uh kelenghen Na' nah kelebeng kam anan.’ ” 10Alem Harun bara daha' Israel nunan dih, en daha' nyineng nah ha' tana ngahit atih beka' tula nah aren Tuhan alem avun. 11Kuma' nah Tuhan men Musa, 12“Akui uh kelenghi dahun daha' Israel pekelebeng tua. Im bara nah daha', ‘Tegu levi dau ikam seng kani sin tulan, tegu jihima ikam seng besoh kani luti, ikam pah seng jam Akui nah Tuhan Allah kam.’ ”
13Tegu levi nei nah peng-peng manuk tepikung ha' ngavan daha' Israel anan dih, hangan tua nah ngavan daha' na lepau anan, tegu jihima ké', té' nah ep teliling ngavan daha' anan. 14Tegu ep anan tei padé' la'an, beka' té' ket bela'ung ujung tana, ngenek uk-iduk jam na'. 15#1 Kor 10:3 Tegu daha' Israel jam ket anan, kuma' nah daha' men ji-ji, “Ket nun anih ré'?” ken daha' kah. Avin nusi' payan daha' jam ket nunan men'a.
En Musa bara nah daha', “Anih nah luti en Tuhan uk men ikam jadi' kanen kam. 16Nunih dahun Tuhan, ‘Sayu nah ha'ut-ha'ut la'ung tei ngavang na' ala aleng sukup men iha', dua' supek anun ji la'ung, no' pah kahum la'ung daha' té' alem amin, nunan kah en daha' ala en daha' kani.’ ”
17Nunan nah daha' Israel na tegu daha' tei ngavang na', té' aleng kahum té' kah aleng kanya. 18#2 Kor 8:15 Tegu daha' nuka' na' pakei supek, daha' aleng mepeng kahum atih, nusi' pah té' huwin na', nurei pah daha' aleng ala kanya nusi' pah iha' em sukup. Ha'ut-ha'ut la'ung ngavang sukup men iha'.
19Ken Musa men daha', “Nusi' deng ji la'ung seng melek la'an na' ateng jihima.” 20Bi té' pah daha' aleng em kelenghi dahun Musa tih, en daha' lek pah la'an daha' ateng jihima, beka' pah ngulen tua pah, bu ji'ek lelan. Bunget lan nah Musa na daha' anan. 21Ha'ut jihima nah daha' ngavang na', ha'ut la'ung ngavang ala sukup men iha', bi tegu dau uh hanit nusi' nah té' ket anan la'an té' tana.
22Tegu dau nem ha'ut la'ung ngavang dua' hangun kahum men'uh aleng uh en na' ngavang tegu dau aleng ha' béh, iha' tih pat supek anun ji la'ung. Nei nah daha' kelunan aya' aleng mayak daha' Israel anan bara Musa. 23#Us 20:8-11 Musa pah kuma' men daha anan, “Anih nah aleng kenep Tuhan. Jima Dau Kelarah nah, dau aleng ma'ang men Tuhan. Ket aleng kenep kam seng en kam nyihei, na nah dau anih, dahin nun aleng kenep kam seng en kam pesak, na nah dau anih. Lim aleng huwi en lo' nah ateng jihima.” 24En daha' lo' nah ateng jima, awi dahun Musa anan dih, nusi' pah iha' bu ji'ek nusi' pah té' ulen na'. 25En Musa bara nah daha' la'an, “Kani nah anan dau anih, avin dau anih nah Dau Kelarah men Tuhan, nusi' nah ikam jam ket anan té' tana dau anih. 26Nem dau dara na' ikam ngavang na', dau aleng ketusu anan nah Dau Kelarah, nusi' té' ket anan tegu dau anan la'an.”
27Tegu dau aleng ketusu, tei nah daha' balei men daha' atih ngenep ngavang la'an, beka' nusi' té' kelan daha'. 28Avin anan kuma' nah Tuhan men Musa, “Kuri dara kah la'an ikam em kaséh ngioh Dahuk dahin tebara Kui? 29Pelemana' nah, Akui uh petneng dau Kelarah anih men ikam, iha' kah Akui ma'uk luti sukup kanen alem dua' dau men ikam tegu dau nem anan dih. Melo' nah ikam té' avan kam lim-lim, ji la'ung pah meng seng tei musang men ngavan na' té' dau aleng ketusu anan.” 30Lun ngelarah nah daha' té' dau aleng ketusu anan.
31 #
Kah d Is 11:7-8
En daha' Israel na nah aran ket anan mana, lah na' puti awi lah uang lengo' dih, kani na' piah kani dinuh aleng en daha' na peklet nyihun. 32Ken Musa pah la'an, “Nunih nah dahun Tuhan, ‘En kam lo' nah dua' supek ket anih ja daha' pahu kam aleng baya tih jam luti aleng Ek uk ikam en kam kani ha' tana ngahit anih, iha' tih tegu Akui geri ikam musang men daléh Mesir arei dih.’ ” 33#Ib 9:4 Lun kuma' nah Musa men Harun, “Im ala ji pasau, im tuvu nah mana dua' supek halem na', en lo' pa'en ha' unan Tuhan men tebin-tebin anak sau kam ateng baya.” 34Harun pah ngioh dahun Tuhan aleng en Musa bara, lun tei nah iha' melo' tajau uk anan ha' unan Pati Avan Jaji Tuhan atih, ja melo' na' pa'en-pa'en. 35#Yos 5:12 Daha' Israel kani mana anan alem pat-pulu duman, ateng daha' ateng ha' tana aleng ngavan kelunan aleng ha' béh atih, mana anan tua nah kanen daha' en daha' kani ateng daha' tei ateng té' hang tana Kanaan. 36Dua' supek anan nah ji tulan men tulan pulu men iung ingen daha'.
Currently Selected:
USANG DAHA' ISRAEL 16: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
