USANG DAHA' ISRAEL 14
14
Daha' lawat Banget Teberau
1En Tuhan bara nah Musa la'an, ken Na', 2“Bara nah daha' Israel ja daha' tei pasan tei na lepau jeleng Pi-Hahirot tih, té' hang Migdol dahin banget nan. Sayu nah ikam na lepau kam nelunga' Baal-Zefon té' bahé' hitih lahuh. 3Firaun pah seng kuma' marung tuk ikam kelunan Israel anan, ‘Daha' uh lingo' ha' daléh anih nah anih, daha' uh tana ngahit tih uleng nah anan,’ ken na' na'a. 4Alem nunan pah Akui seng na kenep Firaun mahing la'an té' ikam, ateng iha' ngenep nei livoh ikam. Bi akui seng petula aren Kui té' ujung Firaun dahin té' ujung daha' seladu na', ja lim kelunan Mesir nan jam Akui aleng Tuhan.” Men'uh anan tei pasan nah daha' Israel men inan, awi dahun Tuhan.
5Tegu daha' bara men Firaun laja' Mesir daha' Israel uh lap, nei pekuli nah kenep na' dahin kenep daha' aleng hida na' atih marung daha' Israel, iha' nah daha' kuma', “Seng na' nun pah kenan tam mekoh kelunan Israel anan tei leka' di lo? Seng hi nah dipen tam la'an?” ken daha' nah pehili. 6Iha' nah Firaun nyihu petmei kelita' na dahin geri lim kelunan alem daléh na' anan tei leka' lahuh. 7En na' geri nah nem atuh kelita' aleng sayu-sayu, té' pah lim kelita' aleng ha' béh lahuh aleng ha' Mesir nan, dahin lim na' hangan seladu lim. 8Nunan nah tuk Tuhan na kenep Firaun laja' Mesir anan mahing, pelalau tei leka' livoh daha' Israel anan dih. Bi daha' Israel pelalau pejoh panau dahin melu lelan kenep daha' avin kenan tingan Na' aleng geri daha'. 9Lun nei nah kelunan Mesir anan dih. Lim guda' dahin kelita' Firaun dahin daha' aleng panau pakei guda' dahin daha' seladu-seladu pah nei livoh daha' Israel nan, dahin behi'a daha' ha lepau daha' ha' bahé' banget, jeleng Pi-Hahirot, aleng nelunga' Baal-Zefon atih.
10Tegu Firaun daha' nei-nei jeleng, nyili nah daha' Israel anan dih, kitan daha' nah kelunan Mesir atih nei livoh daha'. Takut lelan nah daha' Israel, pelalau medéng Tuhan. 11Daha' pah kuma' men Musa, “Nusi té' liang ha' Mesir didu, ja ka' nei geri kamé' seng lematei kamé' ha' tana ngahit anih? Ika' na nun kamé' nah anih, ja ka' nei geri kamé' musang men Mesir atih dih? 12Iha' kah kamé' kuma nunih men ika' ha' Mesir dih, ‘Meng im petusah kamé', bei nah kamé' nyadui men daha' Mesir nih tua,’ ken amé' dih.
13Iha' nah Musa kuma' men daha' Israel, “Meng peletu-letu ikam takut, petneng nah kenep kam tua dahin ineng nah urip aleng men Tuhan aleng seng en Na' uk men itam dau anih. Kelunan Mesir aleng kitan kam dau anih anan, nusi' peletu kam seng nyineng daha' la'an. 14Tuhan aleng seng perang men ikam, bi ikam seng tepaka' tua,” ken Musa.
15En Tuhan duan nah Musa la'an, “Na' nun ka' medéng-medéng Akui nunan? Bara nah daha' Israel nan, ja daha' tei leka'. 16Im ju nah hekun ka' anan dih, dahin meju usu ka' nyelibau ata' banget, ata' banget anan pah seng tei petat, daha' Israel anan pah deng tei panau megang tua men belua banget. 17Akui kah aleng na kenep daha' Mesir anan mahing, ja daha' nei livoh daha' Israel, avin Akui seng petula aren Kui men Firaun dahin men lim daha' seladu na', dahin men kelita' na' dahin men lim daha' seladu na' aleng pakei guda' atih lahuh, 18ja si' daha' Mesir anan nei jam akui aleng Tuhan tegu Akui petula aren Kui men Firaun, men kelita' na', dahin men lim kelunan aleng ujung guda' lahuh.”
19Lun leka' nah meliket Allah aleng panau una' ha' unan daha' Israel anan dih, tei ha' la'ung daha', pelulo' avun atih dih pah lahuh pasan men unan daha' tei ha' la'ung daha' atih lahuh. 20Pelulo' avun anan pah negreng té' hang seladu daha' Mesir dahin daha' Israel. Pedah daha' Mesir anan lidem, pedah daha' Israle malah, nusi' nah daha' Mesir deng tei jeleng daha' Israel anan pahmalem anan.
21Iha' nah Musa meju usu na' nyelibau banget anan, malem anan petat nah ata' banget atih kenan bahui aleng mahnga' aleng nei men pedah matan dau pa'un, jadi' megang nah tatah ata' banget aleng tei petat atih. 22#1 Kor 10:1-2; Ib 11:29 Lun tei nah daha' Israel panau men alem belua banget té' ngavan aleng megang atih, ata' atih pah té' bah ulei dahin bah ta'o daha' awi jam liding sepipah daha'. 23Tei nah kelunan Mesir anan livoh daha' Israel, lim-lim guda' Firaun dahin kelita' na' dahin lim daha' aleng pakei guda' lahuh tei lim ateng belua banget atih. 24Tuhan nyineng nah lim daha' seladu Mesir anan men alem beluluk apui dahin pelulo' avun anan dih, lun en Na' pebisau nah kenep daha' Mesir, na kenep daha' em tuman loh-loh. 25En Tuhan na ji'ek nah anau ilin kelita', na na' hilet em deng pivek, em tu'a panau la'an. Iha' nah daha' Mesir kuma', “Aya, nepulet nah itam tua! Tuhan aleng perang men daha' anih aleng lawan itam anih.”
26Tuhan pah kuma' men Musa la'an, “Ju im usu ka' anan nyelibau banget, ja si' ata' banget lemnyep daha' seladu Mesir anan, lemnyep kelita' daha' dahin daha' aleng pakei guda' atih lim lahuh,” ken Tuhan. 27Lun en Musa ju nah usu na' nyelibau banget atih, tegu jihima ata' banget anan pah pekep la'an, alem-alem seladu daha' Mesir anan ha' belua banget atih Nunan nah tuk na' Tuhan na daha' Mesir lenyen ha' belua banget. 28Lim kelita' dahin daha' aleng pake guda' dahin lim daha' seladu Firaun pah lenyen tegu daha' livoh daha' Israel alem banget anan, avin banget uh tei pekep la'an nunan, ji la'ung pah em té' aleng murip men daha'. 29Bi daha' Israel panau tebau tua té' aleng tegang men belua banget anan, avin ata' atih awi jam tuk liding sepipah daha' bah ulei dahin bah ta'o lahuh.
30Nunan nah tuk na' Tuhan pekurip daha' Israel dau anan men usu daha' Mesir. Daha' Israel pah nyineng daha' Mesir matei té' bahé' banget anan. 31Tegu daha' Israel jam tingan Tuhan tei maté' daha' Mesir anan dih, takut lelan nah daha' té' Tuhan, lim daha' pah nginah té' Tuhan nurei pah té' Musa aleng panyin Allah atih.
Currently Selected:
USANG DAHA' ISRAEL 14: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
