Luk 19

Ka ujutiŋo m'aretuhne Sake akúbulne jamméejhinem imbi Díino

1Angu, afúrumi na, Yensa ingi ñantaalibehinem aŋŋan a saariŋo nómár n'ayéjuhne Jeriko, k'aŋŋay guwusuna na ankokoh bi Jerusalem. 2Agida Jeriko, ayikyik na údiigeen úduk m'aretuh Sake. Angu, Sake, úmár ujuti. Úmár atohtoh imbi m'annohulinaane imbi ñanjutiŋo, te a gubaarhu hómár, úmár ummu kunyik. 3Angu Sake, biriman fam asíibáásiib búfeku Yensa. Angu, údiigeeno úmár, bayennehini mara Yensa adékunkuneh a saarihinem, adék ba bútibhinem. Kanda f'afégne barumuno b'ankolne Yensa, apájul mara dapiren k'afégem mara úmár Sake adohdoh. 4Angu, agír k'anohála barumuno k'adék aŋaf a sinoŋo, sinoŋ s'aretuhne sifigo, ki nim, Yensa gapútri, Sake apiren k'afégem. Angu, Sake baŋafi mees, aŋay bútuyhu Yensa k'aningeh binaalo.

5Angu adékiidek, Yensa apútor. Angu Yensa bapútri, awonn a búdupihu sinoŋo, afég Sake a raafo. Ayéjem:

- Sake! Kuculo was! Gub mint ba katiñaŋ a díken gídekeminne!

6Angu Sake, bayennehini mara ba katiñaŋ a díkinem gandékehne, asúumom dáde k'akucor was k'ayéj:

- Índokoŋ!

K'adooh Yensa ingi ñantaalibehinem k'adékureeniŋ ba a díkinem. 7Angu jamaŋo banfégi hómár, índukoŋo anhunhunineh anyéjeh:

- Yensa, neeraŋ gakankánehne k'adék ba a díku ummu m'úpájulne ummu jínuboŋ bareŋ? Ñantaaraŋ adék ba na mara hómár jóndoŋ!

Nim índukoŋo ganyéjehne.

8Angu dam, Sake akucunkucun jamaŋo hóbun, anéereeniŋ k'anyaahála. Adékiidek akeng k'adante ayéj Umuyhintor:

- Arafaŋ! Ingah! Me marigen, fam giyaahayaah jamaŋo. Kanda inini, gub, ificilahinkineh kunyikhum a jégeneŋo, k'idooh gúbido gúduko íneer ñanyikireŋo. Ingi mees, m'iyaahne bakodihinin, íneekineeniŋ, ki nim immereŋ moŋon moŋon ajah gukibhinem buruhu waasaŋ arenekeŋ h'eyaahemerne. Nim gídekehne bukaano.

9Angu na Yensa ayéjne:

- Ingah! Bísibaŋo bi gub ayikyik a dígo inno mu Díino apahunne a kunyoku júnubonkánom.

Ayéjeeniŋ:

- Ingah! Ummu m'úfegeŋne nanka, úmár mees, umaamalinku Ibrahiima dakat. Horaŋ akanne k'íyeji nim? Mara, maŋ ni maamankintor Ibrahiima afiyumne Díino, ummu mees maŋ nim gafiyumemne bísibaŋo bi gub.#19.9 Aji úfegi ni Díino apahunne Sake, mara Sake akúbulkubul jamméejhinem imbi Díino k'afiyumem, maŋ ni maamankánam Ibrahiima afiyumemne. Guyroŋ mara Díino apahunempahun mara a muhenku Ibrahiima gafúruntne. Ingi faka karo na Yensa asíibáásiib bujellihinku jamaŋo mara ñantaaraŋaŋ anseb Sake angu maŋ ni jamaŋo ansebehne ñanjutiŋo. Aññantay anlóki simbabayo ingi úmár.

10Yensa abocin ayéjeeniŋ:

- Aji úfegeŋ ni Údiigeeno M'acaabenaane adékirne ba a duniyaŋo, ba bútibhu m'annimne k'apahuneeniŋ. Hómár adooremne a duniyaŋo.

Nim Yensa alóbne.

Funaareŋo a gubaarhu údoolo m'asebne ulaamekinem ki lókiireŋ búdohokunom

11Afúrumi na, Yensa ingi ñantaalibehinem anfak anfaalen hadéko ba Jerusalem. Angu, andékdek f'andék andas bukooro. Agida índukoŋo imme na n'ankokayeh ingi Yensa. Angu, a waato nómár, ñanlabahi anlah karo Yensa, aji apúti Jerusalem, Díino awonnunkuneh maŋ fam maasayahu ámár Díino a duniyaŋo. Nim ñanlabahi anlahne. Angu, Yensa asíibáásiib bujellihinkinin mara h'adékehne buyiko Jerusalem daguy iniman ni immereŋ anlahne. Angu, afúnnureeniŋ funaareŋo unfu ba bukeerkirikinin h'adékehne buyiko. 12Ayéjeeniŋ:

- Ayikyik údiigeen úduk m'atoh a bádinku umaasaŋo. Agida údiigeeno úmár añantane ajah maasayaŋo. Kanda úmár ii, jandiŋ bajahum maasayaŋo, añantay adék a didiira díduk diŋaantini. Apútudir a didiiraŋo dímár, anrakáneh ingi umaasaŋo údenno. Inini, umaasaŋo údenno úmár, úmár gadékehne ba búnekinem maasayaŋo a didiirahánam d'afúruntne. Anéeremdir maasayaŋo, aŋoolinekineh ba a didiirahánam k'adék aguy na umaasaŋo. Nim údiigeeno añantane akaan jandiŋ bajahum maasayaŋo. 13Angu fo údiigeeno aparene ba hadéko imbi umaasaŋo údenno, atot imbi ñandóolhánom ñandóol haala. Batoti ñandóolo haalaŋo, akibeeniŋ moŋon moŋon gukodihu sano úngonduk.#19.13 Agida jandiŋ buyikum gukodi úngonduk gu sano údoolhuneh buruhu ásibaŋ keme . Ayéjeeniŋ:

- Inini, me ba mandéka gídekehne. Kanda imiñekineh. K'udoohoŋ gukodiŋo ungu, k'údoolumoŋ ki nim gukodiŋo ungu abos. Nim gísiibane k'ukaanaŋ.

Údiigeeno balóbi nim adék adoona.

14Agida údiigeeno úmár, jamanku didiirahánam anfoyemfoy. Angu fo údiigeeno awusunane, angu ñammi didiirahánam anyéjeh: «Háh! Kanda mintoroŋ, eke lókiiroŋoŋ ki úmár aguy umaasahintoroŋ?» Angu banlóbi nim, ambúuñ jamaŋo ba imbi umaasaŋo údenno. Andék anyéjem mara immereŋ lókiireŋeŋ ki údiigeeno úmár aguy umaasahu didiiraŋo. 15Angu immi m'anlóbne, umaasaŋo údenno ayennehinyennehin, kanda maŋ nim ganéerne údiigeeno maasayaŋo.

Afúrumi na, údiigeeno aŋooliner ba a didiirahánam. Angu bapútri, ahuyor ñandóolo m'anéerne bakodiŋo úmánduk úmánduk ba bumikinem. Agida n'asíiba búpájulo bakodihinem buruhu neeraŋ gabosne. 16Angu, uliiho apútor. Bapútri ayéjem: «Umaasa! Ingah! Gukodiŋo g'óneereemne abosbos f'apút wayasaŋ haala.»

17Angu na umaasaŋo ayéjem: « Iyoo! Fi kama údool úde! Inini, íneerenneer honj hotir, údool f'adék aguy honj hóde. Angu, fi, ínekuno buruhu akooroŋ haala k'umararaam, mara fi údool úde.

18Unakinno apútor. Bapútri ayéjem: «Umaasa! Ingah! Gukodiŋo g'óneereemne abosbos f'apút wayasaŋ amákilaŋ!»

19«Iyoo! Inini ínekuno k'umararaam akooroŋ amákilaŋ!»

20Angu, údool úduk apútor ayéjem:

- Umaasa! Ingah! Gukodiŋo g'únereemne ungoŋe. Igubingubin k'inink na 21mara me ibenuhbenuh fi. Aji ídeki inimun gukodiŋo, úñuumihineh ingi me mara fi, yikuro bankabaŋ. F'ummo bim n'ujahah bakodi b'ópájul fi dóoláro. Fi haani kantígo ka dóolárone, fi údekhineh k'úduk ufac na k'udooh. Nim gukaanahne. Angu, a gubaarhu hómár me bollendi k'imapun gukodiŋo. Gúmár akanne ídek inink gukodihen.

22Balóbi nim, badétuni, umaasaŋo ayéjem: «Hah! Fi, údool gireŋ! Eke úyejyej me yikiri bankabaŋ? Uŋoolin úyej me mo bim n'ijahah bakodi b'ópájul me dóolári, ingi mees, ka dóolárine, me ídekhineh k'ídek ifac na k'idooh. Eke nim gúyejne? Angu, fi n'úlobohne inini, fi wúur újondoŋ! Ingah! Ítuyakuno a h'ólobne. 23Angu, aji nim gímiirne, horaŋ akanne doohuro gukodiŋo údek uninkiteem a banko ki nim biŋoolinimer ilahunar gukodiŋo n'abos?

24Angu umaasaŋo balóbi nim, badétuni, ayéj índukoŋo m'anwonnáne na: «Ingah! Jahareŋ gukodiŋo imbi údiigeeno ummu k'úneereŋ m'adóolne f'abos wayasaŋ haala!» 25Angu jamaŋo anyéjem: «Umaasa! Ingah! Úmár ayikyik horoŋ hakodihu sano f'abár ñómár haala! Ufak udooh bakodiŋo ba bubocindikinem?!

26Na umaasaŋo ayéjeeniŋ: «Ninkinan! Túyoreŋ k'íteekinoonuŋ: Me nuko, aji ífegi wúuro m'amarahne kunyikhum hóbun, ibocindikinem h'añantane amararaam. Kanda aji fi ufoyeemfoy, ki lókiiro k'iguy ulaameken, ki lókiiro ki bakodihum abos, te faka maraaro kunyikhum hóbun, me ba bujaku kunyikhum nip k'agune a halakan gídekehne. 27Inini, a gubaarhu m'anfoyeemne, mi lókiireŋeŋne k'iguy umaasaŋo, immereŋ mingu, doohutomuŋ ki k'úbujeeniŋ a sigihum, immereŋ nip!» Nim umaasaŋo alóbne.

Na angu funaareŋo fu Yensa anéerne dam amukne.

Fo jamaŋo ambendine Yensa Jerusalem

28Angu Yensa, f'abollane búneku funaareŋo, anfak anlah binaalo ba hadéko ba Jerusalem ingi ñantaalibehinem. Angu Yensa anoh. 29Angu, andék f'andék anjuj saariyeŋ anakaŋ n'antéejayne, Betafase ingi Betani. Agida saariyeŋo nómáráŋ antéejateeja montaaño n'ayéjuhne Montaaño Olifo. Angu, f'antéejane saariyeŋo nómáráŋ, Yensa afúnn ñantaalibe inak, 30ayéjeeniŋ:

- Inini ninkinan, údekhineŋ ba a saariŋo inno inini. Aji úputeŋ na, maŋ fam ulahunkunaŋ na kofali k'ahobaa. Kanda wúur ŋafahadaŋ a kofaliŋo kómár. Inini aji úputeŋ uhoobulomoŋ k’udootomuŋ.

31Abocin ayéjeeniŋ:

- Kanda aji wúur amiihoonuŋ: «Ninkinan, horaŋ akanne k'uhoobuloŋ kofaliŋo?» úyejemeŋ: «Umuyhintor abúuñurne mint. Ahaajahaaja kofaliŋo.» Nim gúdekeheŋne ba bujaabihinem.

32-34K'angu Yensa babúuñeeniŋ mees, ñantaalibeŋo inako andék f'andék aŋŋan a saariŋo. Maŋ ni aŋŋanne, anlahun na kofaliŋo k'andék aŋŋay buhoobihinem. F'aŋŋane buhoobihinem, angu ñammuyom anyéjeeniŋ:

- Ninkinan, kofaliŋo inko ba horaŋ?

Immereŋ anyéjeeniŋ:

- Umuyhintor ahaajane kofaliŋo.

Na gambéndureeniŋne k'andooh kofaliŋo. Angu úfegeŋ, ho Yensa alóbeeniŋne, maŋ hómáráŋ nip ganlahunne na a saariŋo. 35Angu, immereŋ andoohor kofaliŋo k'aŋŋooliner ba nanka imbi Yensa. F'ampúturne, andooh kaalankánin k'anleef a mángáku kofaliŋo. Bambollay ampemb Yensa k'aŋaf a kofaliŋo, k'angu andékeh ba Jerusalem. 36-37Angu, fo Yensa ingi ñantaalibehinem aŋŋayrine jankuco a Montaaño Olifo, jamaŋo jup ambendiyemne, k'anworom a bájegenenkinin k'anleefikem kaalaŋaŋo a binaalo. K'angu immereŋ nip anwaliŋeh ba Jerusalem. Baŋŋay hadéko, ñantaalibehinem ingi ñantifilinkinem nip ankomb buramunku Díino. Agida, immereŋ anfégfeger tamaseereŋo no Yensa akanne. Angu f'anfégne Yensa dam, asúumeeniŋsuum fanfaŋ k'anlóboh wolaŋ anramunah Díino, anfuuhurinkem a gubaarhu hómáráŋ nip, k'anyéjeh:

38- Ingah! Umaasaŋo ummu, mu Umuyhintor Díino abúuñurne, akandurenkandur barake báde! Ummu agune m'adootne mintor básunkintor ingi Díino. Inramunoonuŋ Díino Amánduko n'agune arjanna! Infuuhurinoonuŋ ámár Díino n'amune sembeŋo nip!

Nim jamaŋo ganlóbohne dam f'aŋŋane bubendihu Yensa.

39Agida fo jamaŋo anlóbohne nim, ayikyik ñanfarasiyaŋ ímpiinam m'anguy na a barumuno. K'angu immereŋ anyéjem:

- Arafaŋ! Yéjer ñantaalibehen ankota! Dahi anlób ineeŋ!#19.39 Agida, immereŋ ñanfarasiyaŋo dómároŋoŋ maro Yensa agune Umaasaŋo mu Díino Acaabenne. Hómár akanne anyéji Yensa alób ingi ñantaalibehinem k'ankota buramunku Díino b'aŋŋane.

40K'ayéjeeniŋ:

- Dajóon k'íyejeeniŋ ankota! Túyoreŋ k'íteekinoonuŋ; Haani immi ankota, kanda bawaalo nip anramunkuneh Díino!

Angu, antifeh binaalo ba hadéko ba Jerusalem.

Fo Yensa akulne a gubaarhu baléero b'adékehne buyikhu Jerusalem

41Angu, bantéejay bukooro, Yensa pirendeŋ k'alah munkulhunom. Aningeh bukooro akuloh k'ayéjeh:

42Hey Jerusalem! Masa! Masa! Ingah! Irifrif bujellihinkinan h'adotokunoonuŋne básuumo. Hómár gihaamine ba bujellihinkinan, kanda ninkinan haamiroŋ guwuto h'ésiibane balóbo. Ninkinan! Baman manini úpimeŋpim.

Ayéjeeniŋ:

- Wúturoŋ haani hotir. 43Agida me ípápájul h'adékehne ba buyikhinan. Oo Jerusalem, masa! Ninkinan, úfekineŋ baléer deh. Ingah! Ñanrumukánan andékekineh k'andooh honj k'ankol bukooro k'anrokoonuŋ na a tonkoŋo arenekeŋo nip. Angu, anrokdir mees ankir aŋŋan a bukooro 44k'aññaamálinoonuŋ k'ambujoonuŋ. Ingah! Ambujhunoonuŋ nip. Anyebyebinkineh bukooro nip f'adék aguy angu bujunoob. Nim gandékehne ba bukankánan. Angu, horaŋ akanne ki Díino abénneeniŋ k'ankaanoonuŋ nim? Ingah! Díino, fo abénneeniŋ k'ankaanoonuŋ nim, mara Umaasaŋo M'Acaabenne adékridek ba a bukokánan ba bupahunkánaner, kanda ninkinan lókiiridomoŋ, ufoyemeŋfoy.

Nim Yensa alóbne dam a gubaarhu h'adékehne buyiko Jerusalem.

Fo Yensa asekurne ñanjuliyaŋo a jaameŋo adénno

45Angu afúrumi na, Yensa adék f'adék aŋan a buteerehu Jaameŋo Adénno. F'aŋantne a buteereŋo, alahunteeniŋ n'aŋŋayne na gujuliyaŋo.#19.45 Agida, immereŋ imme na gujuliyahu ininkaman abónoŋo ba leeyaŋo, k'anyaahumah. Agida a buteereŋo búmár ñantaaraŋaŋ anjuliya na. Angu Yensa, f'apútne akombeeniŋ bútibaaro 46k'ayéjeh:

- Ninkinan! Ingah! Aññaaññaañ a Hañaañeno mara, Díino ayéj díkinem ba buguy díg k'anfuuhurinehne ámár Díino ingi k'ankiinahamne. Eke nim Díino alóbne a Hañaañeno? Kanda ningeŋ ba h'okaaneŋne! Ninkinan udooheŋdooh díku Bááhum Díino ukaanaŋ k'anjuliya! Agida jaameŋo, kantíku gujuliya gireŋ. Faka, ninkinan guyakaŋyak jamaŋo! A gubaarhu hómár bukanku nanka kantíg kanjóndoŋ guŋayeŋne!

Nim Yensa alóbne ñanjuliyaŋo dam a Jaameŋo Adénno.

47Angu afúrumi na, ásibaŋo nómáráŋ nip, Yensa gadékedek ba a buteerehu Jaameŋo Adénno ba bukawandinku jamaŋo. Agida ñanlaameku alimaamaŋo ingi ñankeekihu Hañaañeno ingi ñanlaamero índukoŋo, immereŋ imme na n'antíbeh n'ankankánehne ba bubujhu Yensa. 48Kanda pájiireŋeŋ n'ankankánehne. Úpájuli, bísiba bísiba, Yensa, aji aŋay gukawando, jamaŋo ganrumunorumun na tip k'anjantendem ingi jamméej. Angu, gúmár akanne immi pájiireŋeŋ feere nooraŋ gankankánehne k'ambuj Yensa.

Currently Selected:

Luk 19: GD

Highlight

Copy

Compare