Luk 20

F'anyéjne Yensa yikireŋ binaal ba bukawandinku jamaŋo

1Angu, ásibaŋo ámáráŋ nip, fo Yensa aŋane kawando a buteerehu Jaameŋo Adénno, angu ajellihineh jamaŋo Kúmbuuñaamo Kúnsuuminno ku Díino. Angu ayikyik bísiba, f'aŋane kawando, ñanlaameku alimaamaŋo ingi ñankeekihu Hañaañeno ingi ñanlaamero índukoŋo andéker anlahuntam na. 2Angu immereŋ bampútri, ammiih Yensa anyéj:

- Fi! A binaal beeraŋ guninkne inho h'oŋane bukaano inini? Hantaŋ abúuñurenne? Jaabir baŋ mint!

3-4Yensa ayéjeeniŋ:

- Inini, túyomuŋ baŋ k'imiihoonuŋ nuko: Eke Yaya gayiceyic jamaŋo? Angu Yaya, hantaŋ anéeremne binaalo bímár k'ayic jamaŋo? Karo maŋ Díino anéeremne binaalo bímár, karo jamaŋo annéeremne binaalo bímár? Jaabiyemuŋ baŋ angu!

5Angu, f'amiiheeniŋne nim, ankomb siññopunayo. Aññopunayeh immereŋ damankánin k'anyéjeh:

- Inini mintor, ínyejomoŋ neeraŋ? Agida aji ínyejoŋ: «Díino abúuñurne Yaya,» Yensa ayéjhineh mintor, «Inini, horaŋ akanne dómuroŋ ho Yaya alóbne?» 6Ki aji ínyejomoŋ mara Díino búuñuroŋ Yaya, maŋ jamaŋo ambúuñuremne! Hááy! Dajóon! Jamaŋo immi angikineh mintor bawaalo k'ambuj mintor, mara immereŋ anlahlah aliŋ maro Yaya anabiyoŋ no Díino faŋ abúuñurne.

Nim ñanlaamero gaññopunayehne.

7Angu baññopunayiñopunay anyéj Yensa:

- Mint pájiirimiŋ wúuro m'anéerne Yaya binaalo ba bukaano nim.

Angu banyéji nim, 8Yensa aŋoyindeeniŋ ayéjeeniŋ:

- Inini, me mees dijaabiyoonuŋ wúuro m'anéereemne binaalo ba bukaano inho h'ekanne.

Nim Yensa ajaabiyeeniŋne dam.

Fo Yensa acucunaane imbi ñanlaamero

9Angu, balóbi nim mees, Yensa aŋoolin a kawando n'aŋane gukawandinku jamaŋo, k'angu anéereeniŋ funaareŋo unfu. Ayéjeeniŋ:

- Ingah! Ayikyik údiigeen úduk m'arufun toolhu reseŋo. Angu ummu toolo, f'arufunne munreseŋo mees, ayéj ba mandéka gadékehne. Angu, bapájuli maro amiñekineh mandékaŋo, atíbila ñandóol ki ki immereŋ antopotodom toolhunom. Ayéjyej nim waathu bufathu reseŋo gabári, abúuñokuneh jamaŋ k'andék anjahátam gukibhinem. Angu, bayiki ñandóolo, ummu toolo abénneeniŋ na k'adék mandékaŋo amiñer bim.

10Angu fo waathu bufathu reseŋo abárne, ummu toolo abúuñ údoolhánom k'adék ajahátam gukibhinem imbi ñandóolhu toolhu reseŋo. Angu fo údiigeeno úmár apútne, ñandóolo anlaham ammalam fo ayaaŋam waw, k'antibaaram aŋoolin ingi halakánam hadéemo. Angu fo údiigeeno úmár aŋoolintne, atéekin ulaamekinem ummu toolo ho ñandóolhu toolhu reseŋo ankantemne. 11Angu, ulaamekinem afak aŋoolin abúuñ úduk. Úmár mees, bapúti, anlaham ammalam fo ayaaŋam waw, ansutunkom. Bambollay, antibaaram k'aŋoolin ingi halakánam hadéemo mees. Angu, úmár mees aŋooliner k'adék atéekin ulaamekinem h'ankantemne.

12Angu, ulaamekinem afak abúuñ ulallin. Ulallinno mees f'adékne, ñandóolhu toolo anlaham ammalam f'andújom dáde, k'antibatam a toolo ingi halakánam hadéemo mees. Ki úmár mees aŋooliner adék atéekin ulaamekinem h'ankantemne.

13Angu fo ulallinno aŋoolintne, angu fam ummu toolo k'ayéjne: «Heey! Angu, me k'ikaan neeraŋ? Inini, k'íbuuñ úbákum. Huh! Hambaanihum ipokunempokun dáde. Kanda túyor k'íbuuñom ba imbi ñandóolo. N'agune úbákum, aji ñandóolo anfégem, gúduko anrokuneh k'antúyom, n'agune úbákum. Annékinem gukibhum.»

14K'angu abúuñ úbárám. Babúuñi úbárám, úbárám badasi toolo, ñandóolo baŋŋandentem n'adékirehne, anyéj: «Úbáku ummu toolo ummoŋone n'adékireh deh! Angu, mintor ba bukankánam neeraŋ? F'embujomoŋ, mara aji imbujomoŋ, angu úmár damuy toolo. Mara toolo inno, báábám aniirodir, maŋ úmár gadékehne ba bumuyhu toolo. Kanda aji imbujomoŋ, dayik m'amuyhunehne toolo. Mintor gíndokohoŋne ba bumuyo!» 15Angu, úbáku ummu toolo adék f'adék apút a toolo. Fam ganlahemne, ambáásinem anfúnnom a toolo, k'ambujom.

Nim Yensa anéerne funaareŋo. Babollay, amiihul m'aŋŋane bujantendikinem, ayéjeeniŋ:

- Inini ummu toolo, aji ayennehini maro ambujbuj úbárám, neeraŋ gadékehne ba bukaano? 16Eke úmár faŋo adékhineh baman maŋ na k'adék abuj ñandóolhu toolo nip, ki nim ajah toolo k'atibila ñandóol índukoŋ k'antopotodom faka toolo nómár? Nim gakankunehne deh!

Angu, Yensa balóbi nim anyéjem:

- Díin akaan biki hómár ayik!

17Angu Yensa aningeeniŋ caw k'ayéjeeniŋ:

- Ingah! Adék aguyhuneh maŋ ni aññaañne a Hañaañeno. Eke aññaaññaañ na anyéj:

Buwaalo bu ñanlódo andabunne k'anyéj búmár dajóon, adékiidek índukoŋo maŋ búmár gantotne k'anlódum dígo nómár, te f'ankanne nim, buwaalo búmár afaŋunumne n'ayik nafa a sínlodo,#20.17 Na Yensa aŋoolinkinne h'añaañaane a Líibárhu Bákimo 118.22 ingi mees a Líibárhu Anabila Esay 8.14,15 mara búmár alahne sínlodo k'awonn aliŋ.

Eke nim gaññaañne a Hañaañeno? 18Agida anfak aññaaññaañ anyéj mara moŋon moŋon anenumne buwaalo búmár ayebyebinaháneh k'akoom. Ki moŋon moŋon buwaalo anenumi alublubinaháneh.

Angu balóbi nim, Yensa amiiheeniŋ ayéjeeniŋ:

- Angu na, neeraŋ gansíibane balóbo?

19Angu fo Yensa anéerne funaareŋo a nintiku ñandóolhu toolo ñanjóndoŋo, ñankeekihu Hañaañeno ingi ñanlaameku alimaamaŋo m'aŋŋane bujantendikinem ampájul maro Yensa maŋ immereŋ ganlóbumohne. Yensa asíibáásiib búyejo mara immereŋ angune ñandóolhu toolo ñanjóndoŋo. Angu ansíiba bulakánam maŋ fam, kanda lahárom. Fégeŋ baŋ, pirendeŋeŋ k'anlaham maro jamaŋo imme na n'anrumun. Agida, ñanlaamero ambenuhbenuh ho jamaŋo andékehne ba bukankánin aji ammapuni Yensa.

K'antíbne bunenunku Yensa f'ammihemne a nintiku bahataŋo

20Angu, ñanlaameku alimaamaŋo ingi ñankeekihu Hañaañeno ingi ñanlaamero índukoŋo pirendeŋeŋ k'anlah Yensa maŋ fam, angu ambénnem k'adék. Angu, anningeh Yensa k'ankorosohom n'ankankánehne k'anlaham. Angu, andak antíbila jamaŋ k'ancaameeniŋ ki nim andék ba imbi Yensa ki k'antíb ki Yensa ayik kayúulen a nínloburonkánom. Agida immereŋ n'ansíiba ki Yensa ayik kayúulen imbi úgufánááro. Wola k'alób gúlob g'ópájul dasúum úgufánááro. Nim ungu, aji ayiki kayúulen ingi úgufánááro, immereŋ mingu ampiren andékirem a binaanam k'ambénnem a halakánam. Hómár gantíbehne, nim ungu karo úgufánááro ayéjhineh Yensa añantay abujaa.#20.20 Úpájuli Ñanyahudo, immereŋ yikireŋeŋ binaal ba bukitihu wúur k'ambujom. Agida, úgufánááro úmár údin Rom. Te ñammi Rom m'ammarahne Israyel a waato nómár, immereŋ bareŋ ampirenne ankiti wúur k'ambujom. Gúmár akanne ansíibay búdekuku Yensa ba imbi úgufánááro mu Rom. Gúmár akanne ansíibay ki Yensa ayik kayúulen ingi úgufánááro.

Angu, jamaŋo immereŋ m'ancaamaane andék f'andék anlahun Yensa. Banlahunem, ankaan ininkaman immereŋ ñanfiyinkinem m'antúyoh Díino, agida n'ansíiba bukanku feereŋ ki Yensa alimor a balókunom. 21Angu banlahunti Yensa, anyéjem:

- Arafaŋ, afefeer mint maro fi maŋ marigeno bareŋ gúlobohne. Fi wúur m'ahat bukawandinku jamaŋo, te kawandhan awúuhwuuh lip. Guru ubeniheh ho jamaŋo anlóbohne. Guru ucaabeneh wúur. Umurunahinmurunahin jamaŋo nip. Ingah! Fi, marigeno a nintiku binaahu Díino gúteekinehne jamaŋo. Hómáráŋ nip afefer imbi mint.

22Angu banlóbi nim, aŋŋoolinkin ammiihem anyéjem:

- Inini fi arafaŋ, neeraŋ gunuk úyejne a nintiku bahataŋo? Luwaŋankintor nuko, neeraŋ galóbne a gubaarhu bahataŋo? Karo iññantahoŋ ínneeroŋ umaasaŋo údenno Sesar m'agune Rom bahataŋo? Hóge hómár agune a binaalo? Karo nuko luwaŋo no mintor Ñanyahudo nédeŋ mintor k'incaamomoŋ ii? Fi nuko, horaŋ gunuk úpájulne na?

23Angu bammiihem nim, Yensa afég mara buninkikinem káb gaŋŋane k'antíbeh bucikinem. Angu ayéjeeniŋ:

24- Inini, nétemuŋ gukodi k'ífeg.

K'anfúnn gukodiŋo gu kodiforo, annéerem. Angu bajahi gukodiŋo, úmár amiiheeniŋ ayéjeeniŋ:

- Inini gukodiŋo ungu, bigoku hantaŋ agune na? Ingi gurethu hantaŋ gaññaañne na?

Angu immereŋ aŋŋoyindem anyéjem:

- Bigoku umaasaŋo údenno m'ayéjuhne Sesar agune na ingi gurethinem.

25Angu na, Yensa ayéjeeniŋ:

- Inini balóbo adétdet! Néteŋ Sesar h'amune, úneereŋ Díino h'amune.

26Nim ganrifne bucikinem a balókunom a barumuno, kanda pirendeŋeŋ. Immereŋ nip ankota si. Agida, ho Yensa aŋoyindeeniŋne abineeniŋbin tor. Angu pájiireŋeŋ n'aññantane aŋŋoyindem.

Hóge m'anniirone ankengunkunuh a biniirohánin?

27Angu, afúrumi na, ayikyik bísiba, índukoŋo m'antohne a dayrahu Ñansaduseyaŋo andék anlahun Yensa. Agida dayraŋo nómár, n'anyéjuhne Ñansaduseyaŋo, immereŋ anlahlah maro, aji wúur aniiroy, wúuro úmár ayímyim maŋ ni kuulo. Angu, dakengahar a biniirohunom. Nim ñansaduseyaŋo anlahne.

28Angu dam, bampútri imbi Yensa, ammiihem anyéjem:

- Arafaŋ, eke Anabila Musa anéneer luwaŋo n'ayéjne: «Aji údiigeeno aniiroy ni yikireŋ wol ingi udikankánam, údoonom añantane ajah udikaamo ki nim abosur údoonom m'aniirone wol.» Eke maŋ nim luwahu Musa amiihulne?

29Ambocin anyéj Yensa:

- Angu inini, aji ayiki ñandonkay immereŋ índiigeen ímákila ingi inak, ki údiigeeno uliiho ajah udikaamo, kanda bajahem údiigeeno aniiro ni yikireŋeŋ wol, 30ki údoonom m'ambedayne aŋoyin udikaamo. Angu, údiigeeno úmár mees aniiro ni yikireŋeŋ wol. 31Angu, m'ambedayne ingi ummu m'afak aniirone aŋoyin udikaamo, mum mees aniiro ni yikireŋeŋ wol, ki údinem mu úmár abedne aŋoyin udikaamo aniiro ni yikireŋeŋ wol. Ki hómár adék f'adék apút imbi ubiyaamo, ki mum mees aniiro ni yikireŋeŋ wol. 32K'adék fo udikaamo mees aniiro.

33Angu, Ñansaduseyaŋo ambocin anyéjem:

- Angu mint, h'ésiibaminne búpájulo, immereŋ nip ankengunadir a biniiroŋo, imbi índonkayo immereŋ ímákilaŋo ingi inako, hantaŋ gadékehne ba buguyhu údiigenku udikaamo, mara immereŋ índiigeeno nip anjahemjah?

34K'ayéjeeniŋ:

- Ingah! A duniyaŋo inno índiigeeno ingi indikaamo ganjahayejahay. 35Kanda m'anniirone k'ambár guŋano arjanna, immereŋ mingu, Díino akenginkineeniŋ a biniirohánin. Kanda ingah! Na danguy iniman n'amíirne a duniyaŋo inno. Fégeŋ baŋ, arjanna, údiigeen datíb udikaam, te udikaam datíb údiigeen. Immereŋ mingu danjahay mara arjanna sinjahay yikireŋ. 36Úpájuli, immereŋ ii, anguyhuneh iniman maleekaŋaŋ. Hómár ingine arinenkinin damíir ingi arinenkintor no imbi duniya. Arinenkinin mingu danniiro. Immereŋ mingu angune jaraku Díino. Te n'ankengunaane a biniirohánin, immereŋ anguyhunehne ingi Díino angu bandór.

Angu, na Yensa aŋoolin ayéj ñansaduseyaŋo:

37- Ingah! Aji ukaraŋi gu Musa a Hañaañeno, na mees úfekineh mara m'anniirone gankengekeng a biniiroŋo. Inini, túyomuŋ baŋ k' íteekinoonuŋ n'aññaañne na gu jankengo a biniiroŋo. Ku k'ulentálahaŋ anabila Musa! Eke, Musa añaaññaañ a nintiku waato n'afégne bufito n'ajakaane? Añaañaañ ho Díino alóbemne a waato nómár. Fégeŋ baŋ, dam, Musa ayennehinyennehin síngiirhu Díino. Angu Díino, neeraŋ gayéjemne dam? Díino ayéjemyej: «Me ingine Díino no tala Ibrahiima ingi tala Siyaka ingi tala Yankuba antúyohne.» Eke nim Díino ayéjne Musa dam?

Yensa abocin ayéjeeniŋ:

- Kanda ingah, na Díino yéjireŋ mara ámár agune Díino no immereŋ antúyoherne fam. Wówo! Díino yéjireŋ nim. Ayéjyej: «Me ingine Díino no tala Ibrahiima ingi tala Siyaka ingi tala Yankuba aŋŋane bútuyo.» Eke nim Díino alóbne?

Yensa abocin ayéjeeniŋ:

- Angu, hómár ingine, a maŋ waato no Díino alóbne nim ingi Musa, agidagida ni Ibrahiima ingi Siyaka ingi Yankuba, immereŋ ilallo n'ankeng a biniiroŋo k'aŋŋay bútuyhu Díino arjanna. Angu, na a Hañaañeno gímpájuloorumoŋne arenn maro a waato no Díino alóbne ingi Musa, immereŋ ilallo ankengunaakengun a biniiroŋo k'aŋŋay bútuyhu Díino arjanna.

38Yensa abocin ayéjeeniŋ:

- Fégeŋ baŋ, agááráŋo dampiren k’antúy Díino. Ñanraagofoŋo m'anjébne, immereŋ ampirenne antúy Díino.

Nim Yensa ajellihinne ñansaduseyaŋo mara, ka immereŋ anyéjne «uraagofoŋo, aji uniiroy, dukeng a biniiroŋo,» na immereŋ ñansaduseyaŋo anlimorlimor.

39-40Agida dam, ayikyik na ñankeekihu Hañaañeno, te immereŋ mees anjantenjanten ho Yensa aŋane búteekinku ñansaduseyaŋo. Angu biriman da Yensa alóbeeniŋne nim, wúur bollendeŋ k'amiihem níntig. Angu, na anfant anyéjem:

Iyoo! Arafaŋ! Ukeekulkeekul hóbun!

Ka Yensa alóbne a gubaarhu ni umaasaŋo Dawuda ahuyne Umaasaŋo mu Díino Acaabenne «Umuyhum»

41Angu, afúrumi na, Yensa ammiiheeniŋ ayéjeeniŋ:

- Ninkinan, eke a Hañaañeno aññaaññaañ a gubaarhu Umaasaŋo mu Díino Acaabenne? Eke na aññaaññaañ anyéj mara úmár afúrumokuneh a muhenku Umaasaŋo Dawuda? Te maŋ nim. Hómár marigen. Angu, horaŋ akanne k'anyéji nim? Ingah! Afak añaañaa a Hañaañeno maro Dawuda fankánam ahuyhuy Umaasaŋo mu Díino Acaabenne «Umuyhum»? Hómár neeraŋ gapirenkinehne k'aguyorum? Aji Umaasaŋo mu Díino Acaabenne ummonayer n'ajéb a jamaanihu Dawuda, neeraŋ gapirenkinehne k'aguy faka wúur m'afúrumor a muhenkinem? Ingi faka, hóge uraagofoŋo ahuyhuneh wúur m'afúrumor a muhenkinem «Umuyhum»? Kanda, ningeŋ baŋ, nim Dawuda akanne!

42Yensa abocin ayéjeeniŋ:

- Ingah! Aññaaññaañ a Jabuuro f'amiñi ni Dawuda fankánam alóbne ayéj:

- Umuyhintor Díino ayéjyej Umuyhu me, Dawuda: «Dókulo k'údek unooh a jiyakum k'immarahoŋ jamaŋo. 43Noohor nanka maro ba bufaŋánahu m'anfoyenne gídekehne k'ikucuneeniŋ k'upiren újegimeeniŋ.

Eke nim Díino alóbne ki Dawuda añaañ a Jabuuro?

44Angu inini, túyomuŋ baŋ k'ifak imiihoonuŋ: Eke na Dawuda ahuyhuy Umaasaŋo mu Díino Acaabenne «Umuyhum»? Angu neeraŋ faka gakankánehne ki úmár afak aguy wúur m'afúrumor a muhenku úmár Dawuda?

Nim Yensa amiihne Ñansaduseyaŋo ingi ñankeekihu Hañaañeno dam.

Fo Yensa atengane ñantaalibehinem ki biki antifilin hakaananku ñankeekihu Hañaañeno

45Angu dam, jamaŋo imme na n'anrumun bujantenku Yensa. Angu, Yensa anuurula imbi ñantaalibehinem k'ayéjeeniŋ:

46- Ninkinan! Káánunteŋ! Dahu úduk úmiireŋ maŋ ni ñankeekihu Hañaañeno.

Ayéjeeniŋ:

- Ingah! Immereŋ ampokunpokun gukaanahu dinsolo díndenno k'andékeh a binaalo ingi a marseŋo, ki gaŋŋay hadéko, antíbeh ki jamaŋo anramunkeeniŋ buramun b'apút k'ambúuñaheeniŋ dáde. Faka, gandéki a jaameŋo, immereŋ ñankeekihu Hañaañeno antíbeh k'annooh ka índenno annoohohne. Ingi mees, aji gújuŋo ayiki, andék ki gampúti, anwúuh andék annooh a banoohunku índenno. 47Faka, gúduk ungo na, andékhineh imbi indikaamo mi índiigeenenkinin anniirone k'anjodjodineeniŋ fo indikaamo andék annink kuyikhinin a halakánin k'anyaaháheeniŋ. Ki, a barumuno, ansaliyeh sali no gara adéteh ki nim jamaŋo anyéj immereŋ jamaŋ m'anwúuh. Nim gankaanahne.

Ayéjeeniŋ:

- Ingah! Immereŋ, Díino ayehenkineeniŋ guyehen g'ayik sembe deh. Te, guyeheno g'adékehne ba buyehenkinin damíir ingi g'adékehne ba buyehenku índukoŋo. Angu ninkinan, dahu úduk úmiireŋ maŋ ni immereŋ ñankeekihu Hañaañeno.

Currently Selected:

Luk 20: GD

Highlight

Copy

Compare