Luk 18

Majaareŋ gukiinahu Díino, dahu uhotubahaŋ

1Angu afúrumi na, bísiba, Yensa asíibáásiib bujellihinku ñantaalibehinem mara ñantaaraŋaŋ anyohula, ñantaaraŋaŋ anhotuba a gukiinahu Díino. Aññantay ankiinaham waatowaat, bísiba bísiba. Ñantaaraŋaŋ anhotuba gukiinahánam. Angu, afúnnureeniŋ funaareŋo unfu, ayéjeeniŋ:

2- A saari adúk ayikyik údiigeen úduk m'alekehne balóbo. N'asúumemne galekehne balóbo. Úmár ii, gara abúuñah Díino haani hotir ingi mees gara abúuñah údinhinem uraagof. 3Angu, a saariŋo nómár afak ayik udikaam m'úpájul údiigenkinem, Díino adoohemdooh. Agida ayikyik wúur m'akaan udikaamo ho guyroŋ a binaal. Angu, abári bísiba, udikaamo mu údiigenkinem Díino adoone adék ba bukalanku wúuro imbi ulekhu balóbo. Bapúti, atéekinem ho wúuro úmár akaanemne. Babollay, ayéjem: «Bonkerer, kááñineem! Ku k'ukoñendeem, biki wúuro úmár afaŋunahaam. Me a munkonkum gigune. Ingah! Kandidem honj!»

Angu, gadéki imbi m'alekehne balóbo, ulekhu balóbo dajahárinem. Angu, adékdek wayasaŋ alabayeŋ ba imbi ulekhu balóbo ba bukalanku wúuro m'aŋayemne buyeheno. Gara ayohula deh! 4-5Angu abári bísiba, ulekhu balóbo ayéj: « Huh! Kanda me, udikaamo ummu alabalaba balób deh! Gayehenkumyehen fanfaŋ! Me, marigen, giri íbuuñah Díino. Giri íbuuñah údinhum uraagof, k'ikaanah h'asúumeemne. Kanda udikaamo úmár! Inini, túyor k'íneerem mukoŋhunom! Aji nim gireŋ dayohulineem!» Angu ulekhu balóbo, balóbi nim mees, akir adék akandur udikaamo h'akiinahemne.

6Umuyhintor banéeri mees funaareŋo, aŋoolin ayéj ñantaalibeŋo:

- Beneŋ baŋ jamméej! Údiigeeno úmár ingi bawúuhurihinem nip ingi ni búuñaaraŋne Umuyhintor nip, kanda adékiidek akankaan ho udikaamo akiinahemne.

7Yensa abocin ayéjeeniŋ:

- Angu, fi m'utohne imbi jamaŋo mi Díino acaabenne, fi úyeji Díino dakoñendo? Hóge abááhbááhinkineh ba bukoñendiken iniman ni ulekhu balóbo abááhbááhineh fanfaŋ? Wówo! Dabááhbááhin ineeŋ! Akoñendukuno was! Fégeŋ baŋ, Díino awúuhwuuh, te f'ummo na gukiinahánam báárig ingi jaket. Anakuno h'okiinahemne. 8Túyoreŋ k'íteekinoonuŋ; Díino dabááhbááhin a h'okiinahemeŋne. Akoñendukunoonuŋ was. Kanda ninkinan, guŋayeŋ gukiinahánam uñantaheŋ ufiyumemeŋ.

Yensa abocin ayéjeeniŋ:

- Inini túyoreŋ k'imiihoonuŋ honj: Hóge Údiigeeno M'acaabenaane, d'aŋoolinekinehne, alahuntakuneh jamaŋ m'anfiyumem a duniyaŋo inno? Karo dalahunar jamaŋ m'anfiyumem? Homár giŋane gumiihooraŋo.

Nim Yensa alóbne.

Wúuro, neeraŋ gañantane akaan ki k'ajóonin bajégenenkinem ingi Díino? A gutiirilinooraŋo ingi a búlokihu júnubonkánom.

9Agida ayikyik na jamaŋ índukoŋ m'anlah maro immereŋ anfaŋunumne n'antif Gúloku Díino. Immereŋ anyéjyej anwúuhwuuh imbi Díino. Angu immereŋ, ganfuuhurinoorafuuhurinoora k'ansebeh índinenkinin ñanraagofoŋo. Angu Yensa afúnnureeniŋ funaareŋo unfu. 10Ayéjeeniŋ:

- Janteneŋ baŋ k'íteekinoonuŋ! Ayikyik índiigeen inak; úduko ufarasi, úduko, úmár ujuti.#18.10 A jamaano nómár, ñanjutiŋo anguyguy jamaŋ mi jamaŋo anseb maro ganyaahumayaahum. Te faka ñanjutiŋo aññankayñankay ingi ñammi Rom. Gúmár akanne ansebeeniŋ. Angu, andék ba a Jaameŋo Adénno ba saliŋo. 11-13Angu, baŋŋani a jaameŋo ba saliŋo, ufarasiyo adék awonn gúbido goŋon k'aŋay saliŋo k'aramunah na Díino. Ujutiŋo, úmár mungu, aránjulo awonn beŋen a gubambaŋo gu jambiyaŋo. Angu, ufarasiyo aŋay saliŋo. Ayéj Díino ingi jamméejhinem: «Umuyhum, me mo bim n'iramunko dáde. Aji úfegi h'akanne iramunko, mara me mídimiŋ ingi jamaŋo índukoŋo, mara me giri iyahah wúur, me íwuuhwuuh, giri itifeh faka indikaam. Me gitifilinetifilin ho fi úlobne. Me, lóokum lóokum gisumosum ásibaŋ anakaŋ. Hoŋon hoŋon giyikne, gífunnofunn jako a gubaarhu fi fi. Me mo bim n'iramunko faka mara me mídimiŋ ingi ujutiŋo mu beŋen.» Nim ufarasiyo alóbne a jamméejhinem Díino f'aŋane saliŋo.

Angu ujutiŋo mungu, úmár aránjulo a gubambaŋo gu jambiyaŋo. Ajigun a jarooho a gubaarhu júnubonkunom ki yoofunaaraŋ haman hotir. K'amaloorah a hafithinem n'atifne mahar a jínuboŋo n'akanne. Ayéjeh Díino: «Umuyhum! Me ummu jínub. Ísiibáásiib k'uyik bankabaŋo a binaam k'uyaafuŋaam hójondoŋo h'ekanne.» 14Nim ujutiŋo alóbne Díino f'adék adét. Angu índiigeeno inako, ufarasiyo ingi ujutiŋo, f'ambollane saliŋo, moŋon moŋon aŋúñ ba a díkinem.

Yensa abocin ayéj:

- Inini, túyomuŋ baŋ k'imiihoonuŋ: Imbi immereŋ inako, hantaŋ afaŋunumne n'awúuh? Ingah! Ujutiŋo, úmár Díino alahne wúur m'awúuh. Afeero mara, úmár ii, jandiŋ bapútumne a dígo, Díino n'ayéj mees úmár wúur m'awúuh. Agida, ufarasiyo úmár mungu, jégenenkinem ingi Díino ni jóonindaa.

Abocin ayéj:

- Ingah! Fégeŋ baŋ, moŋon moŋon afuuhurinoorane, Díino adak atíirilinkinem, ki moŋon moŋon atíirilinoorane, Díino adak ayoofunkunom ki k'abúuñahaa.

Ka Yensa ayéjne aji úsiibay guŋaŋo a maasayahu Díino, gufiyinken Díino aññantay ammíir iniman ni jaraaho anfiyumemne

15Abári bísiba, jamaŋo andooh jaraaho, haani jaraaho jatigilinno, k'andékureeniŋ ba imbi Yensa ki k'alóbundeeniŋ halakánam agofonkánin k'aduwareeniŋ. Angu ñantaalibeŋo, f'anfégne hómár, angu ansekureh m'andékutne jaraaho. Anyéjeeniŋ:

- Ninkinan, horaŋ akanne k'udooroŋ jaraaho ba nanka?

16Yensa mungu, bafégi ni ñantaalibehinem ansekáreeniŋne, ahuyor jaraaho, ayéjeeniŋ:

- Ninkinan! Dókuloŋ!

K'angu andéker. Angu akir ayéj ñantaalibehinem:

Ninkinan! Bénteeniŋ k'andékuter jaraaho! Dahu usekáreeniŋ!

Abocin ayéj:

- Úpájuleŋ, jamaŋo m'angune a maasayahu Díino, ammírmiir ingi jaraaho inja. Fégeŋ baŋ, jaraaho ankaskas gufiyumo eke nim eh? Inini ninkinan mees, uñantaheŋ utiirilinoorahaŋ k'ufiyumeŋ Díino iniman wol k'upireneŋ uŋanaŋ a maasayahu Díino.. 17Janteneŋ baŋ k’íteekinoonuŋ marigeno! Ingah! Aji fi jaháro maasayahu Díino iniman ni wolo ajakunehne nómár, fi mungu, duŋanahar a maasayaŋo nómár.

Ka Yensa ayéjne kunyikhu duniyaŋo apiren akaan ki wúuro daŋan arjanna

18Angu ayikyik údiigeen úduk imbi Ñanyahudo m'ayik búdoob. Angu údiigeeno úmár adék amiih Yensa ayéjem:

- Arafaŋ ! Ingah! Me afeereemfeer mara fi wúur újooni. Inini, neeraŋ gikankánehne k'iyik kanjébo ka bandór?

19Angu na Yensa ayéjemne:

- Ingah! Yikireŋ wúur m'ajóon. Díino bareŋ gupirenkinehne úyej ámár ajónne. Angu fi! Horaŋ akanne k'úyeji me wúur újooni?

20Yensa abocin ayéjem:

- Inini fi, eke úpápájul Luwaŋanku Díino? «Dahu ukaan basango. Dahu ubuj údinhen uraagofo. Dahu údugi. Dahu úseediya gúlob gu wúur kandaŋ. Búuñar ñamboshon.» Eke úpápájul luwaŋaŋo nómáráŋ nip?

21- Arafaŋ! Luwaŋaŋo nómáráŋ nip gíbuuñabuuña biriman f'eroŋne wol.

22Angu na Yensa ayéjemne:

- Inini, ayikyik ho fanti bukaan. Juliyar h'oyikne nip! Gujuliyay mees, udooh bakodiŋo bámár úneer mi yikireŋeŋne. Ingah! Aji ukaani nim, baraaj atúyhuno arjanna. Angu, gubollay búneku mi yikireŋeŋne, uŋooliner úduk utifilineem.

23Angu, fo Yensa alóbne nim, aléerum údiigeeno dáde. Agida úmár ummu kunyik, te lóokiiireŋ gujuliyahu kunyikhinem. Angu, údiigeeno adék adoona. 24Yensa aféfeg h'alóbne aléerumleerum údiigeeno úmár. Angu, ayéj:

- Ingah! M'anyikne kunyiko, guŋankánin a maasayahu Díino aléerhineh deh! 25Eke úfegeŋfeg ñonkomo? Angu, ñonkomo guŋankánam a kosunku bendaŋo aléerihineh fanfaŋ! Guŋanku ñammi kunyiko arjanna aléerhineh deh! Ingah! Guŋanku m'anyikne kunyiko a maasayahu Díino afaŋununkuneh n'aléer guŋanku ñonkomo a kosunku bendaŋo.

26K'anyéjem:

- Hom! Arafaŋ! Aji angu ñammi kunyiko aléerumeeniŋ guŋano a maasayahu Díino, Díino apahunkuneh jamaŋ immeraŋ?#18.26 Aji úfegi n'ammiihne nim Yensa, immereŋ anlahlah mara, m'anyikne kunyiko anyikyik barakehu Umuyhintor. H'ankanne a duniyaŋo asúsuum Díino, gúmár akanne anéereeniŋ kunyiko. Aññantañanta aŋŋan arjanna. Nim ganlahne a waato nómár. Agida, guyroŋ nim. Díino apokunpokun mi yikereŋeŋne mees, te apahunkuneh immereŋ mees a gubaarhu gufiyumo g'anfiyumne ámár Díino.

27Ayéjeeniŋ:

- Ingah! Uraagofoŋo dapiren k'apahun ñankindenkinem. Hómár dapiren k'ayik. Díino bareŋ apirenne apahun uraagofoŋo.

28Ki Piyer ayéjem:

- Arafaŋ! Angu mint m'íbennáriminne honjoronkint nip k'itifomiŋ, hóge mint iyikhinemiŋ kanjébo ka bandóro?

29-30Ayéjeeniŋ:

- Heh! Ninkinan túyoreŋ baŋ k'íteekinoonuŋ marigeno: Ingah! Moŋon moŋon úbennárne honjoronkon, k'utifeem a gubaarhu maasayahu Díino, Díino acaamháno h'afaŋ h'óbennárne. Nim agune, aji úbennári díken, ubénner udikankan a dígo, úbenner índoonenenken, úbenner indimaanankan, úbenner nunkon ingi bááhán, úbenner dimbayankan nip a dígo#18.29-30 Inho nip h'alóbaane guyroŋ úbennhineh bádinken nip ingi udikankan bandór. Gúduk ungo na wúur adékhineh mandéekaŋo a gubaarhu butifilinku Díino. ba dohohu Díino, ingah, Díino acaamhuno h'afaŋ hómár h'óbennárne. Ingah! Díino acaamhuno h'afaŋ jup h'óbennárne. Faka, uguyhuneh a kanjébo ka bandór a duniyaŋo awunkulo n'adékekinehne.

Ka Yensa ajoofunne ñantaalibehinem Haalaŋo ingi Inako a gubaarhu h'adékehne buyikhinem Jerusalem

31Angu afúrumi na, Yensa ahuy ñantaalibehinem m'anyéjuhne Haalaŋo ingi Inako. Ayéjeeniŋ:

- Ingohulahoonuŋ ba naŋan k'íteekinoonuŋ honj.

Angu bangohulay, ayéjeeniŋ:

- Inini, mintoroŋ ba Jerusalem gíndokhoonuŋne. Inini, aji ímputoŋ Jerusalem, ho anabiyoŋoŋo aññaañne fam gu Údiigeeno M'acaabenaane, hómár nip gadékehne ba buyiko.

32Janteneŋ baŋ, anabiyoŋoŋo aññaañaañ mara Ñanyahudo andokuneh Údiigeeno M'acaabenaane andékirem a halaku mi guyroŋoŋne Ñanyahud. Angu, annéerdir mi guyroŋoŋne Ñanyahud, anyehenkinem dáde. Immereŋ anyeefihinem, ansutunkunom, anlotunkunom, 33ammahánam ingi ñanhonjo.#18.33 Ñanhonjhu ñammi Rom gayikeyik h'aguy na akaan iniman barubáleŋo ki gammali wúuro adujom. Ammalamdir ingi ñanhonjo mees ambujhunom. Angu, aji ambujem, ayikdir ásibaŋ alallaŋ a réeŋo, akenghineh a biniirohunom k'ajéb ingi bumburunku arinkinem nip. Maŋ hómár nip ho anabiyoŋoŋo aññaañne gadékehne buyikhum aji ímputoŋ Jerusalem.

34Angu, fo Yensa alóbne nim, ñantaalibehinem Haalaŋo ingi Inako wuturoŋoŋ h'alóbne. Wuturoŋoŋ haani. Akaan iniman ho Yensa alóbne funaare fumenuhi a binanin.

Ka Yensa ajébunne úpiminno

35Angu afúrumi na, Yensa ingi ñantaalibehinem anfak anlah binaalo k'ankokoh bi Jerusalem. Angu andék, f'andék andas bukoor búduk b 'aretuh Jeriko. Agida ayikyik a bukooro búmár údiigeen úduk m'apím. Angu dam, úpiminno úmár anoonooh a bakaranku binaalo k'aŋay gukiinahu sada. 36Angu, fo Yensa ingi ñantaalibehinem andasne bukooro búmár, úpiminno ayennehin jinanku barumuno b'andékirehne ingi Yensa ingi ñantaalibehinem. Angu úpiminno, bayennehini jinaŋo ayéj:

- Ninkinan, horaŋ ayikne?

37Ayik m'aŋoyindem ayéjem:

- Yensa mu Nasaret, úmár aŋane guwusunaŋo.

38F'anyéjemne maro Yensa aŋane guwusunaŋo, angu maŋ na úpiminno alób wolaŋ ayéjeh:

- Yensa! Fi, Umaasaŋo mu Díino Acaabenne, m'úfuruntne a muhenku umaasaŋo Dawuda! Bonkerer k'uyik bankabaŋ a binaam!

39Angu, f'alóbne nim m'annohne a barumuno anyéjehem:

- Hey! Kotar!

Angu na úpiminno afaŋunum n'apeej ayéjeh:

- Fi, Umaasaŋo mu Díino Acaabenne, m'úfuruntne a muhenku Umaasaŋo Dawuda! Bonkerer k'uyik bankabaŋ a binaam!

Angu alóboh wolaŋ aŋoolinkineh.

40Yensa ayennehin k'awonn. Angu bawonni ayéj:

- Doohutomuŋ údiigeeno m'apímne!

K'andoorom. Bapútri Yensa amiihem ayéj:

41- Inini, horaŋ gúsiibane k'ikanduro?

Úmár ayéjem:

- Arafaŋ, me ísiibáásiib k'ukaanaam k'ífeg!

42- Ninger! Újebjeb angu a gubaarhu n'ufiyumeemne.

43Agida, fo Yensa ayéjne údiigeeno «Ninger!», angu údiigeeno afég maŋ fam. Bajébi aramunah Díino, atifilin Yensa. Angu dam, barumuno nip, immereŋ mees anramunah Díino.

Currently Selected:

Luk 18: GD

Highlight

Copy

Compare