1 यूहन्ना 2
2
येशू हमर साहायक
1मेरे छोटे बालका, मए जा बात तुमके जहेमारे लिखत हओं, कि तुम पाप मत् करओ, और अगर कोइ पाप करैगो कहेसे दौवा परमेश्वरके ठिन हमर एक साहायक येशू ख्रीष्ट हए जो धर्मी हए। बा हमर पापके माफी करन ताहीं परमेश्वरसे बिन्ती करत हए। 2और हमर पाप क्षमा करनके ताहीं, ख्रीष्ट एक बलिदान बनिगओ: और हमर ताहीं इकल्लो नाए बल्कि पुरो संसारके आदमीनको पापके ताहीं हए।
परमेश्वरकी आज्ञा
3अगर हम परमेश्वरको आज्ञाके मानंगे, तओ जासे हम जानलेमंगे, कि परमेश्वरके सँग हमर संगती हए। 4जो कोइ जा कहात हए, “मए बाके जनिगओ हओं,” पर बाकी आज्ञाके नाए मानत हए कहेसे बो ठग रहो हए, और बो परमेश्वरके सच्चाईके अनुसार नाए जीइत हए। 5पर जोकोइ परमेश्वरको बचन मानत हए, कहेसे बो नेहात्तओ परमेश्वरके प्रेम करत हए। हमके जहेसे पता चलत हए, कि हम बामे हएं। 6परमेश्वरमे हओं, कहान बारो आदमी ख्रीष्ट जैसो जीबन जीइनके पणत हए।
सबनसे प्रेम करओ
7हे मेरे प्यारे सँगीउ, मए तुमके कोइ नयाँ आज्ञा नाए लिखत हओं, पर बहे पुरानो आज्ञा लिखत हओं, जो सुरुसे चलो भओ पुरानो आज्ञा हए, जब तुम ख्रीष्टमे बिश्वास करे रहओ। 8तहुँफिर मए तुमके नयाँ आज्ञा लिखत हओं, काहेकी जाको सच्चाई ख्रीष्टमे और तुममे फिर दिखाइ देतहए, काहेकी दुष्ट मिटरहो हए, और सच्चो उजियारो अच्छो और सिद्ध कता चमक रहोहए। 9जो कोइ जा कहात हए, कि मए उजियारोमे चलरहो हओं, पर अपनो बिश्वास करन बारो भइयाके हेल्हा करत हए कहेसे बो अभएतक फिर दुष्ट जीबन जीइ रहो हए। 10जो कोइ अपनो भइयाके प्रेम करत हए, बो उजियारोमे चलरहो हए, बोमे अइसो कोइ चीज नैयाँ जौनके पाप करबान बारो कारण बनए। 11पर जौन अपन भइयाके हेल्हा करैगो, बो दुष्ट जीबन जीइ रहो हए, और दुष्टमे चलरहो हए। और बो नाए जानत हए कि बो कहाँ जाएरहो हए, काहेकी दुष्ट बोके अन्धरा करदइ हए।
चिट्ठी लिखनको कारण
12मेरे प्यारे बालकओ, मए तुमके जाकेमारे लिखत हओं, कि येशू ख्रीष्टके नाउँसे तुमर पाप क्षमा भओ हए। 13हे दौवओ, मए तुमके जाकेमारे लिखत हओं, कि तुम ख्रीष्टके चिनत हओ, जो संसारके सुरुसे हए। हे जवानओ, मए तुमके जाकेमारे लिखत हओं, कि तुम शैतानसे जितीगए हओ। हे बालकओ, मए तुमके जाकेमारे लिखो हओं, कि तुम दौवा परमेश्वरके चिनडारे हओ। 14हे दौवओ, मए तुमके जाकेमारे लिखत हओं, कि जा पुरो संसारको सृष्टिसे पहिले बचन रहए, तुम बोके जानीगए हओ। हे जवानओ, मए तुके जाकेमारे लिखत हओं, कि तुम बलवान हओ, और परमेश्वरको बचन तुमर भितर रहतहए, और तुम बो शैतानसे जीतीगए हओ।
संसारके बारेमे चेतावनी
15संसार और संसारके चीजके प्रेम मत् करओ। कोइ संसारके चीजसे प्रेम करैगो कहेसे बो, दौवा परमेश्वरके प्रेम नाए करत हए। 16संसारमे भए चीज शरीरको खराब इच्छा, आँखीसे देखन बारी चीज चाहनो और जो करत हए बोमे घमण्ड करनो, बो दौवा परमेश्वरसे नाए आओ हए। जे त संसारके चीज हएं। 17संसार और संसारके खराब इच्छा नष्ट हुइके जामंगे, पर परमेश्वरको इच्छाके अनुसार चलन बारे आदमी सदिमान रहो रहाबैगो।
ख्रीष्ट बिरोधीनके बारेमे चेतावनी
18हे बलकाओ, ख्रीष्टके लौटके आनके ताहीं जा अन्तिम समय हए। और जैसे तुम सुने हओ, कि ख्रीष्टके बिरोधी आन बारे हएं, बाके अनुसार अभौफिर बहुतसे ख्रीष्टके बिरोधी आइगए हएं; जासे हम जानत हएं, कि जा अन्तिम समय हए। 19बे ख्रीष्ट बिरोधी हमर सँग छोडके चलेगए, पर बे अपने नाए रहएं। अगर बे हमरे अपने हुइते, तओ बे हमरी सँग हुइते। बे चलेगए, जोसे जा दिखात हए, कि बिनमे कोइ फिर हमर अपनो नाए रहए। 20पर ख्रीष्टके द्वारा तुमके पबित्र आत्मा दओगओ हए, और तुम सब सत्यके जानत हओ। 21तुम सत्यके नाए जानत हओ कहिके मए नाए लिखो हओं, पर तुम सत्यके जानत हओ कहिके लिखो हओं। सत्यसे झुठ नाए निकरत हए कहान बारी बात फिर तुमके पता हए। 22झुठ कौन हए? झुठ बहे हए, जौन येशू ख्रीष्ट मुक्ति देन बारो राजा नाए हए कहिके अस्वीकार करत हए। और ख्रीष्ट बिरोधी बहे हए; जो दौवा परमेश्वरके और लौंणाके अस्वीकार करत हए। 23लौंणाके अस्वीकार करन बारेनके दौवा परमेश्वर फिर अस्वीकार करत हएं; जौन लौंणाके मानैगो, बोके दौवा परमेश्वर फिर मानैगो।
24बो सच्चो सन्देश जो तुम सुने हओ, जब तुम ख्रीष्टमे बिश्वास करे, अगर सच्चो सन्देश तुमर मनमे रहाबैगो; तओ तुम फिर लौंणामे, और दौवा परमेश्वरमे रहाबैगे।
25और परमेश्वर हमके प्रतिज्ञा करीहए, कि बा हमएं कभी फिर नाश नाए होन बारो जीबन देबैगो। 26मए तुमके बे आदमीनके बारेमे चेतावनी दइ रहो हओं। जो झुठी शिक्षाके द्वारा तुमके धोखा देनके कोसिस करनडटे हएं। 27तुमर ताहीं ख्रीष्टके द्वारा पबित्र आत्मा दओगओ हए, और बा तुमर भितर रहात हए। तुमरमे पबित्र आत्मा रहानतक कोइ फिर तुमके सत्यके बारेमे नाए सिखान पणैगो, काहेकी पबित्र आत्मा तुमके सब बात सिखात हए। बाको सिखाइ बात सच्चो होत हए, पर झुठो नाए होत हए। जहेमारे ख्रीष्टके सँग एकजुट हुइके बने रहाओ, जैसेकी पबित्र आत्मा तुमके करन कही हए।
परमेश्वरको सन्तान
28छोटे बालकओ, ख्रीष्टके सँग एकजुटमे सदिमान बने रहाओ; ताकी जब बा फिरसे दिखाइ देबैगो, तओ हम हिम्मत पामएं, और आन बारो बो दिनमे बाके अग्गु हम लज्जित नाए होमएं। 29अगर तुम जनत हओ, कि ख्रीष्ट धर्मी हए, तओ जा फिर जनत हओ, कि जो कोइ धार्मिक काम करत हएं; बे परमेश्वरके सन्तान हएं।
Currently Selected:
1 यूहन्ना 2: THRNT
Highlight
Copy
Compare
Share
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
