1 यूहन्ना 3
3
1बिचार करओ, कि दौवा परमेश्वर हमसे कैसो प्रेम करीहए, बाको प्रेमको कारण हम परमेश्वरके सन्तान कहेगए हएं। पर जौन आदमी जा संसारके आदमीसे सम्बन्ध बनात हएं, बे नाए जानत हएं, कि हम परमेश्वरके सन्तान हएं। काहेकी बे दौवा परमेश्वरके नाए चिन्हत हएं। 2मेरे प्यारे सँगीउ, अब हम परमेश्वरके सन्तान हएं, और अबतक जा प्रकट नाए भओ हए, कि हम कैसे होमंगे! इतकए जानत हएं, कि जब येशू ख्रीष्ट आबैगो; तओ हम फिर बाके हानी होमंगे। काहेकी बाके उइसीयए देखंगे, जैसो बा हए। 3और जोकोइ ख्रीष्टमे जा आसरा करत हए, बो अपनएके पबित्र करत हए, जैसो बा पबित्र हए।
पाप और परमेश्वरके सन्तान
4अगर कोइ पाप काम करन नाए छोडत हए कहेसे बो परमेश्वरको नियम कानुनके पालन करनसे अस्वीकार करत हए, और पाप करनो कहोक नियम कानुनके भंग करनो हए। 5और तुम जानत हओ, कि येशू ख्रीष्ट पापनके हटानके ताहीं आओ, और बामे कोइ पाप नाए हए। 6जो कोइ ख्रीष्टमे हए, बो पाप करत नाए रहात हए। जो कोइ पाप करत हए, बो जा नाए बुझत हए, कि ख्रीष्ट कौन हए, और नए त बो बाके चिन्हत हए।
7मेरे प्यारे बालकाओ, कोइ आदमी तुमके छल नाए पाबए। जौन धार्मिकताके काम करत हए, बहे ख्रीष्ट जैसो धर्मी हए। 8जौन पाप लगातार करत रहतहए, बो शैतानको आदमी हए, काहेकी शैतान सुरुसे पाप करत आओ हए। शैतानको कामके नष्ट करनके ताहीं परमेश्वरको लौंणा आओ हए। 9जौन परमेश्वरको सन्तान हए, बो पाप नाए करत हए। काहेकी परमेश्वरको जीबन उनमे हए, और बो पाप नाए करपात हए। काहेकी बो परमेश्वरको सन्तान हए। 10जहेसे परमेश्वरके सन्तान और शैतानके सन्तान जाने जात हएं। बे आदमी जो धार्मिक काम करत हएं बे परमेश्वरके घेनसे हएं, और बे आदमी जो अपने भइयासे प्रेम करत हएं बे परमेश्वरके घेनके हएं।
एकदुस्रेसे प्रेम करओ
11एकदुस्रेसे प्रेम करन पणत हए कहान बारी बात तुम पहिलीयएसे सुने हओ। 12और आदमको लौंणा कयिनके हानी नाए बनएं, जो शैतानसे रहए, और जौन अपनो भइया हाबिलके हत्या करी। बो अपन भइयाको हत्या काहे करी? जाकेमारे कि बोको काम ठिक नाए रहएं, और बोको भइयाके काम ठिक रहएं। 13हे बिश्वासी ददाभइया, अगर जा संसारके आदमी तुमके हेल्हा करत हएं कहेसे अचम्मो मत् मनियओ। 14हम जानत हएं, कि हम मृत्युकी शक्तिसे पार हुइगए हएं, अब हमर ठिन कभी फिर नाश नाए होन बारो जीबन हए। काहेकी हम बिश्वासी ददाभइयनसे प्रेम करत हएं। जो प्रेम नाए करत हए, बो मृत्युकी बन्धनमे रहात हए। 15जौन अपन भइयाके हेल्हा करत हए, बो हत्यारा हए। और तुम जानत हओ, कि कोइ फिर हत्यारामे, कभी फिर नाश नाए होन बारो जीबन नाए होत हए। 16येशू ख्रीष्ट हमर ताहीं अपनो प्राण दइ। जहेमारे हम प्रेमके बुझे हएं और हमके फिर अपने बिश्वासी ददाभइयनके ताहीं अपनो प्राण देन पणत हए। 17संसारको धनसम्पति होन बारे आदमी अपनो भइयाको जरुरत देखके फिर दया नाए दिखात हए कहेसे कैसे उइसो आदमी परमेश्वरके प्रेम करैगो? 18हे मेरे प्यारे बालकओ, हम मुँहुँ और बातसे इकल्लो प्रेम नाए करएं, हमर प्रेम सच्चो होन पणत हए। अइसो प्रेम काम द्वारा इकल्लो दिखात हए।
परमेश्वरके अग्गु सहास
19-20जब हम दुस्रेनसे प्रेम करत हएं, तओ जहेसे हम जान पामंगे, कि हम सत्यमे हएं। जब कभी फिर हमर मन हमके दोषी ठहिरात हए, तओ हम अपने मनके परमेश्वरको उपस्थितिमे बिश्राम दए सकत हएं, काहेकी परमेश्वर हमर मनसे बडो हए, और बा सब कुछ जानत हए। 21प्रिय, हमर मन हमके दोष नाए देहए तओ परमेश्वरके अग्गु हमके हिम्मत आत हए। 22और जो कुछ हम परमेश्वरसे मागत हएं, बो हम परमेश्वरसे पातहएं, काहेकी हम बाकी आज्ञा मानत हएं। और बाके मन पणन बारो काम करत हएं। 23परमेश्वरको आज्ञा जहेहए, कि परमेश्वरको लौंणा येशू ख्रीष्टको नाउँमे बिश्वास करनो और जैसे ख्रीष्ट आज्ञा दइ हए, उइसीयए एक-दुस्रेके प्रेम करनो। 24और जो परमेश्वरको आज्ञाके पालन करत हए, बो परमेश्वरके सँग और परमेश्वर बोकेसँग एकजुटमे रहात हए। और पबित्र आत्मासे जो बा हमके दइ हए, हम जानत हएं, कि पबित्र आत्मा हमर सँग और हम पबित्र आत्माके सँग एकजुटमे रहात हएं।
Currently Selected:
1 यूहन्ना 3: THRNT
Highlight
Copy
Compare
Share
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
