BAROMA 14

Ubufisalyoyo kubonywa ndwitiko

1 # Kolos 2.16 Uyu linga monywa ulwitiko, yo mumwambililege; komma ukukanikana nagwe pali isi ikwinogona umwene. 2Yumo ndwitiko lwake ikulya fyosa itolo, uyungi mbonywa bwake ikulya Iyene liliseke lya mani. 3Umwene uyu ikulya, yo angansyokelaga uyu atikulya; loli yope uyu atikulya, angandongaga uyu ikulya, buno Kyala amwambilile umwene. 4Gwani gwe gwati undongege umbombi gwa yungi? Napa linga ikwima pamo ikugwa, syosa sili mu muntwa gwake; loli isakwimaga, papo uNtwa yo amenye ukumpelela ukwima.

5Yumo ikulyimika ilisiku limo ukukinda ilingi, uyungi ikugimika amasiku gosa ikuti gafwene itolo; fikuti umundu gwesa sinkolege fiyo munyinogono syake yuyo. 6Uyu linga ikulyimika ilisiku limo, yo ikumwimikila yu Ntwa; na uyu ikulya, yo ikulila mu muNtwa, buno ikugwa ulupi kwa Kyala; umwene uyu atikulya, yo ikufipikila ifyakulya mu muNtwa, yope ikugwa ulupi kwa Kyala. 7Buno akayamo yumo mmyitu uyu ubumi bwake mwene, kangi akayako yumo uyu ikwifwila mwene. 8Namanga apa tuliko kubumi, po tuli bumi mu muNtwa; napa tukufwa tukufwila mu muNtwa; bunobuno lelo napa tuli bumi, napa tukufwa, tuli ba yu Ntwa. 9Namanga syo sisyo Kristi afwilile nukuya mumi, ukuti ayege Ntwa gwa bafwe nabumi. 10#2 Kor 5.10Loli ugwe ngimba kundonga fiki ugwamyinu? Nugwe gwe yungi ngimba kunsyokela fiki ugwamyinu? Buno twesa muno tuyilile, tukwakwimaga nkyeni nkikota kya bulongelo bwa Kyala. 11#Yes 45.23Namanga lisimbigwe ili likuti,

“UNtwa ikuti Bwila bondiko, abandu bosa bisakufugamaga nkyeni mmyangu,

po umundu gwesa isakunjobaga une ukuti ne Kyala.”

12Bunobuno lelo twesa itolo muno tuyilile, tukwakwiyobelaga kwa Kyala uyu isyake uyu isyake.

13Popapo lelo atulekege ukulongana; isyene loli inunupo ukulonga syo sya kuti, Nayumo angampelelaga ugwamyabo simo isya kufulala mundumbula nisya kungwisya. 14Une menye, kangi singolile muNtwa Yesu, ukuti fikayako fimo ifi pafyene finyali itolo; fyene fifyo linga gwe mundu kufinogona ukuya finyali, fyo fikuya finyali. 15Loli linga ugwamyinu fikumpelela ukufulala mundumbula ifyakulya ifi kulya, bo ulekile ukwenda ndugano. Ungamonangaga nifyakulya fyako ifi kulya, uyu Kristi alimfwilile. 16Popapo lelo akandu akanunu aka muli nako, kangayobigwaga ububibi. 17Buno ubutwa bwa Kyala bukaya bwa fyakulya mma pamo bwa fyakunwa, loli ubwene bo bugolofu, nulutengano, nulusekelo mu mwa Mbepo Mwikemo. 18Namanga uyu linga ikumbombela Kristi muli sisisi, yo ikunkyela itolo Kyala, yo bope nabandu bikumwitikila. 19Popapo lelo atusikongege imbelalutengano, na si sya kuyengana twe babo batupu. 20Komma ukupangula imbombo ya Kyala panongwa ya fyakulya ifi kulya. Naloli fyosa ifyakulya finunu itolo, loli fikwipela ukuya fibibi linga fikumpelela yumo ukufulala mundumbu la. 21Kununu ukusitakulya inyama nukusitakunwa ubwalwa bwa mafilu, nafyosa ifi linga fikumpelela ugwamyinu ukufulala mundumbula. 22Ulwitiko ulu uli nalo, lo uyege nalo gwimwene nkyeni mwa Kyala. Nsangalufu uyu linga atikwibona ububibi apa ikubomba isi ikusisubila ukuya nunu. 23Loli uyu linga ikwilamwa bo ikulya, yo Kyala antobisye ukuya mbibi, papo atikulila ndwitiko; loli kosa aka linga kakaya ka ndwitiko, bo butulanongwa itolo.

Currently Selected:

BAROMA 14: NNBII

Highlight

Compare

Copy