BAROMA 13

Isya kubabombela abalagili ba kisu

1Umundu gwesa ilambikege kubalagili aba bali pamwanya pamyake; buno bukayako bumo ubulagili ubu bukafuma kwa Kyala; ubulagili bosa ubu buliko bo bwimikigwe na yu Kyala. 2Popapo lelo uyu linga ikukindana nabalagili, bo ikulwa na isi Kyala imike; abene loli aba bikulwa nabalagili, bo bisakwambililaga ubulongi. 3Namanga abalagili bakaya ba kubapelela ulutende aba bikubomba inunu, loli aba bikubomba imbibi. Bule kali kulonda ukuti ungayaga nulutende kundagili? Ubombege itolo sinunu, po kwisakwambililaga ulwimiko kumyake. 4Namanga undagili yo mbombi gwa Kyala, pakukutwalila ugwe ubununu. Loli linga kubomba imbibi po uyege nulutende; buno gakaya ga kwiyangakisya itolo amaka aga ali nago; namanga umwene mbombi gwa Kyala, po lelo ikumfunda yuyo linga ikubomba imbibi. 5Popapo lelo fikuti gwilambikege, ungilambikilaga itolo panongwa ya lufundo, loli gwilambikege papo gwibwene mabyebye gako.

6 # Mat 22.21; Mar 12.17; Luk 20.25 Yo nongwa iyi mukusonga isongo, namanga abene bo bikumbombela Kyala, bikwiyula itolo pambombo yiyiyi. 7Popapo lelo amubapege bosa ifi fyo fibabagile ugwa songo mumpege kangi nisongo yosa iyi yimikigwe, ugwa kuntila yo muntilege, yope nugwa kumwimika yo mumwimikege.

Imbombo syitu kubinitu

8Mungayaga ba kumeleligwa numundu, loli kwene ku kuganana; buno uyu linga anganile unnine, yo afikilepo palulagilo. 9#Kuso 20.13-15,17; Kukumbu 5.17-19,21; Levi 19.18Namanga isyene ingomelesyo, ulwa kuti, “Ungalogwaga, ungagogaga, ungahiyaga, ungatotomelaga,” nalinga lo lukomelesyo lumo ulungi, sikamandenie mwisyu lilili ili likuti, “Unganege unnino bo papo gwiganile gwimwene.” 10Ulugano lutikumbombela imbibi unnino, popapo lelo isi sikulumalisya ululagilo lo lugano.

11Mubombege sisisi bo mukamenye ukuti akabalilo ka kulembukila ntulo umwe kafikile; buno Ubupoki bwitu busegelile lilino, bukaya bo pala twandege ukwitika. 12Ikilo kikuya pakumalika, umusi gusegelile; atusilekege lelo imbombo sya mungisi, tufwalege ifilwilo fya lumuli. 13Bo tukwenda twiyufyege, tubonekege ukuya ba pamusi; tungayaga balufu kufyakulya, tungayaga bagalabwalwa, tungayaga balogwe pamo baluhaho, tungayaga ba kulwa kangi tungayaga ba kabini; 14loli mufwalege ifilwilo fya Ntwa Yesu Kristi, kangi mungabikangako umoyo kumbili gwa finyonyo, nakuli ifi gukulonda.

Currently Selected:

BAROMA 13: NNBII

Highlight

Compare

Copy