BAROMA 15

Mubakyelege abininu, mungikyelaga yuyumwe

1Loli uswe twe bakafu ndwitiko fikuti tubatulege abonywa ukupimba ubonywa bwabo, tungikyelaga itolo twibene. 2Loli twesa yumoyumo fikuti tubakyelege abinitu, ukuti babwagege ubununu ko kuti bayengigwege. 3#Salimo 69.9Namanga yope Kristi akalikyelile mwene, loli bo lilyo lisimbigwe ili likuti, “Amahelu aga bakuhelulaga ugwe, go gangwilile une.” 4Buno syosa isi syasimbigwe iyolo mmasimbo, syo syasimbigwe ukuti luyege lumanyisyo kumyitu; ukuti tuyege nulusubilo mbufisalyoyo na ndusubisyo lwa mmasimbo gagaga. 5Umwene loli Kyala umwenenabo ubufisalyoyo unsubisi, yo abapege inyinogono simosyene mwe babo batupu, bo mukukonga akakuketelamo mwa Yesu Kristi; 6ukuti mwesa palikimo muntufyege nindumbula yimoyene, nundomo gumogwene, Kyala uGwise gwa Ntwa gwitu Yesu Kristi.

Inongwa Inunu kubapanja

7Popapo lelo panongwa ya bukulumba bwa Kyala amwambililanege mwe babo batupu, bo apa yope Kristi atwambilile uswe. 8Po apa nikuyoba une nikuti, Ukubusisimikisya ubwanaloli bwa Kyala, Kristi alipelile ukuya mbombeli gwa bubutigwa, ukuti asimalisyege ifingo isi bapegigwe batata; 9#2 Samu 22.50; Salimoko kuti abapanja bamwimikege Kyala panongwa ya ipyana lyake, bo apa lisimbigwe ili likuti,

“Syo sisyo nikukutufyaga ugwe mbapanja,

kangi nikukwimbilaga ugwe.”

10 # Kukumbu 32.43 Lisimbigwe kangi ilya kuti,

“Amusekelege mwe bapanja pamopene nabandu ba Kyala!”

11 # Salimo 117.1 Kangi likuti,

“Amumpalege uNtwa mwesa mwe bapanja,

amumpalege mwe bandu mwesa!”

12 # Yes 11.10 Kangi yope Yesaya ikuyoba ikuti,

“Uyu yo lusamba lwa mwa Yese, isakuyangako,

yo isakusumukaga pakubalagila abapanja;

mmyake mo abapanja bisakusubilaga.”

13Umwene loli Kyala umwene lusubilo, yo abisusyege umwe nulusekelo losa kangi nulutengano ndwitiko ulu muli nalo mmyake; po ukuti mmaka ga Mbepo Mwikemo ulusubilo lwinu lwendelelege ukukula.

Inongwa iyi Pauli asimbile nubukifu bo bububu

14Mwe bamyitu, nine menye itolo mwiswile nubununu, mwiswile nubumanyi bosa, mumenye ukusokana mwe babo batupu. 15Loli mwa kalata uyu ndinkifu itolo ukubasimbila inongwa simo, ukuti mbakumbusyege. Ngibile itolo panongwa ya ipyana ili ambele Kyala une, 16ukuti njege mbombi gwa Kristi Yesu kubapanja, ukumbombela Kyala bo yu mputi nikusifumusya Inongwa Inunu; ko kuti abapanja bayege ikemo ilikyeligwa, ili lyelusigwe na Mbepo Mwikemo. 17Mwa Yesu Kristi une lelo ndi nasyo isya kwitukifya mumbombo ya Kyala. 18Buno ndisakuyaga nkifu ukuyoba simo isingi, loli syene isi Kristi abombile mmyangu ukubapelela abapanja ukupilika mmasyu na mumbombo, 19mmaka ga fika nifiswigu, na mmaka ga Mbepo Mwikemo; fyobene mmalisisye itolo ukulumbilila Inongwa Inunu sya Kristi ukufuma nkaya ka Yerusalemu na Mfisu ifya mumbali, ukwakufika na nkisu kya Iliriki. 20Bunobuno nikwiyula ukulumbilila Inongwa Inunu, momma muno Kristi atalile ukuyobigwa, ko kuti ndeke ukuyenga palwalo lwa yungi, 21#Yes 52.15loli bo apa lisimbigwe ili likuti,

“Aba bakabuligwemo inongwa syake bisakusibonaga,

bope naba bakasipilikemo bisakusyaganiaga.”

Pauli ikwinogona ukubuka ku kaya ka Roma

22 # Rom 1.13 Fyobene nagomoligwaga kabilikabili ukwisa kumyinu. 23Lilino loli, papo nagile malisisye imbombo yangu mfisu fififi, kangi papo nanyonywaga ifyinja fi fingi ukwisa kumyinu, 24nisakwendaga mmyinu bo nikukinda ukubuka nkisu kya Speni; namanga nikusubila ukubaketa bo nikukinda, nukuti mwisemusumusyege bo nikubuka kuko, bo twangele tupugile. 25#1 Kor 16.1-4Loli lilino nsumwike nikubuka ku Yerusalemu nkubabombela abikemo. 26Namanga aba ku Makedonia naba ku Akaya sibakyelile ukusangula fimo ifya kubapa abalondo mbikemo ba nkaya ka Yerusalemu. 27#1 Kor 9.11Namanga syabakyelile, kangi bipelile ukuya bameleligwa kumyabo, namanga linga abapanja bikulilanila nabo isya mwa Mbepo, po bipelile bameleligwa ba kubabombela fyope nifya mumbili. 28Lelo bo njilekusimalisya sisisi, bo mbapele bununu mmaboko iseke sisisi, po nisakwendaga mmyinu ukubuka nkisu kya Speni. 29Loli menye ukuti bo nikwisa kumyinu, nisakwisilaga ndusayo lwa Kristi losa muno luyilile.

30Mwe bamyitu, nikubapyelekesya muNtwa Yesu Kristi na ndugano lwa mwa Mbepo, nikuti, Nindumbula ya lugano muye palikimo nanine ndwiputo ulwa kunyiputila kwa Kyala, 31ukuti mbokigwege kuli aba bikufuya aba nkisu kya Yudai; nukuti imbombo yangu iyi nikubukila mu Yerusalemu yikitikisigwege nabikemo. 32Bunobuno lelo mbwigane bwa Kyala nisemfikege kumyinu ndusekelo, nisenikyelege ukwangala nanumwe. 33Umwene loli Kyala umwenelutengano, yo ayege nanumwe mwesa. Amen.

Currently Selected:

BAROMA 15: NNBII

Highlight

Compare

Copy