BAROMA 12

Ubumi bwa mumbombo ya Kyala

1Mwe bamyitu, nikubapyelekesya nkibabilisi kya Kyala, ukuti mwiningege imibili gyinu ukuya ikemo ifyumi, ilisitakababye, ilikyeligwa kwa Kyala; bo buyege bubombeli bwinu bwa mahala. 2Mungifwanikisyaga nikisu kikiki, loli mwanduligwege itolo nubupya bwa nyinogono syinu; ukuti musimanyege isi iganile Kyala, inunu, ingyeligwa, nimbelelesye.

3Bunobuno lelo mwipyana ili mbegigwe, mo nikubabulila mwesa nkilundilo kyinu, ukuti nayumo angikisyaga ukwiyinogonela, ukukinda papo abagile ukwiyinogonela; loli ukwinogonela mbutengamoyo, yumoyumo afwanege nikigelelo kya lwitiko ulu Kyala ampele. 4#1 Kor 12.12Namanga bo apa mumbili gumogwene tuli nato utumbakasya tu twingi, loli utumbakasya tosa tutikubomba imbombo yimoyene, 5bunobuno nanuswe twe bingi, twipelile ukuya mbili gumogwene mwa Kristi, uyu kambakasya ka nnine, uyu kambakasya ka nnine. 6#1 Kor 12.4-11Loli bo mumo tuli nafyo ifikungilwa ifi fikindene, ukufwana nipyana ili atupele, linga bo busololi buyege bo mumo luyilile ulwitiko; 7linga bo bubombeli, twiningege kububombeli bwitu; uyu ikumanyisya yo iningege kulumanyisyo lwake; 8uyu ikubakasya abandu yo abakasyege, uyu ikupa yo apege nindumbula inunu, undongosi yo abikengepo umoyo pakulongosya, uyu ikupa ifyabupe yo apelege mbusangalufu.

9Ulugano lo lungayaga nubusyobi; mubusyokelege ububibi bosa, mubumililege bu bununu. 10Ulwene ulugano ulwa bunyamundu, lo mugananege mwe babo batupu; ulwimiko lo mukindililege ukwimikana. 11Nkwiyula mungayetaga, isyene imbepo sya munda syo sipyege itolo, mumbombelege yu Ntwa nindumbula yosa. 12Ndusubilo mo musekelege itolo; mbutolwe mo muyege bafindang'oma; ndwiputo mo mumilisyege itolo. 13Ifi linga muli nafyo, fyo mulilanilege nabaKristi abininu; mwiyulege ukubambilila abahesya.

14 # Mat 5.44; Luk 6.28 Mubasumilege ulusayo aba bikubafwima, ena munsumege Kyala ukuti abasayege, komma ukubaguna. 15Amusekelege nabo aba bikusekela, mulilege nabo aba bikulila. 16#Mbupi 3.7Amuyege ndumbula yimoyene mwesa muno muyilile; munginogonaga isya lwiyumbiko, loli mwitugasaniege nabaywelufu; komma ukwiyoba amahala mwibene. 17Mungangomokesyaga yumo imbibi pambibi; mwinogonege isi syo nunu nkyeni mbandu bosa. 18Linga mwagile sibitike umwe, po muyege ndutengano nabandu bosa. 19#Kukumbu 32.35Mwe bamyitu, mungabukisaniaga ikibuli, loli ingalalisi syo mundekelege yu Kyala; buno lisimbigwe ili likuti, “Ulubukisyo lo lwangu, nisakubusyaga yuyune, bo ikuya uNtwa.” 20#Mbupi 25.21-22Loli buno lisimbigwe ili likuti, “Linga gwagile undugu gwako ali ninjala, po umpege ifyakulya; linga umilwe, po umpege amisi; namanga linga ubombile bo bunobuno, po kwisakundundikilaga ingalabula sya moto pantu pamyake.” 21Komma ukulamba kumbibi, loli imbibi usilambikilege nubununu.

Currently Selected:

BAROMA 12: NNBII

Highlight

Compare

Copy