BAROMA 1

Uluponio

1Yo une Pauli umbombi gwa Yesu Kristi, ne nabilikiligwe ukuya ntumigwa, uyu asunguligwe ukusifumusya Inongwa Inunu sya Kyala, 2isi afingile liyolo mbasololi bake bo mumo sisimbiligwe mmasimbo amikemo, 3isi sikunjoba uMwanake, uyu kulubafu lwa mbili apapigwe mumbeyu ya Davidi, 4uyu imikigwe ukuya Mwana gwa Kyala mmaka, ukufwana na Mbepo gwa bwikemo, pala asyukege mbafwe, Yesu Kristi uNtwa gwitu, 5muli uyu twambilile ilipyana nubutumigwa, ukuti ifikolo fyosa fimpilikege ndwitiko panongwa ya ngamu yake; 6muli bababa, mo mumo nanumwe mubilikiligwe ukuya ba Yesu Kristi; 7tukubasimbila mwe bakundwe ba Kyala mwesa mwe muli nkaya ka Roma, mwe mubilikiligwe ukuya bikemo: Ilipyana liyege nanumwe, nulutengano ulufuma kwa Kyala Tata, na kuNtwa Yesu Kristi.

Ulwiputo lwa kugwila ulupi

8Nikutala ukugwa ulupi kwa Kyala gwangu mwa Yesu Kristi, panongwa yinu mwesa, namanga ulwitiko lwinu lufumwike nkisu kyosa. 9Buno Kyala uyu nikumbombela mumbepo syangu mu Inongwa Inunu sya Mwanake yo nketi gwangu, ukuti ndikulindila ukubakumbuka umwe bwila munyiputo syangu, 10nikusuma ukuti linga Kyala itike mbwigane bwake, njage injila ya kwisila kumyinu uko lilino. 11Namanga nikunyonywa ukwisa, kukubaketa umwe, ukuti nanine pamo mbapepo ikikungilwa kya Mbepo ikya kubakasya, 12nikubala ukusubikisania ndwitiko ulu tuli nalo, twesa nanine nanumwe. 13#Imbo 19.21Mwe bamyitu, ngigana ukuti mungasimanyaga ukuti kabilikabili nalondaga ukwisa kumyinu loli napingigwaga ukwisakufika kulilino kuno nalondaga ukuti njege niseke mmyinu, bo mumo ndi nasyo mbapanja abangi. 14Ndi gwa kumeleligwa nabaGriki naba bakaya baGriki, aba mahala nabasita mahala; 15po apa nikulonda ukusifumusya Inongwa Inunu na kumyinu mwe muli nkaya ka Roma.

Amaka ga Ibangeli

16 # Mar 8.38 Namanga une ndi nulusubilo pa Nongwa Inunu; buno isyene go maka ga Kyala ga kumpokela gwesa uyu ikwitika, unJuda tasi, po lelo nunGriki. 17#Haba 2.4Buno mo mumo busetuligwe ubugolofu bwa Kyala, ukufuma ndwitiko ukulabila ndwitiko, bo apa lisimbigwe ili likuti,

“Ungolofu ikubwagilaga ubumi mu ndwitiko.”

Ubutulanongwa bwa mundu

18Namanga ingalalisi sya Kyala sisetuligwe ukufuma kumwanya pa butulanongwa bosa, nubuniongafu bwa bandu bosa aba bikubugomolela kunyuma ubwanaloli nubuniongafu bwabo. 19Namanga tosa utwa kummanyilamo Kyala tuli pabwelu itolo mmyabo, bosa abasetulile yu Kyala. 20Namanga akayilo kake aka katikuboneka nikubala amaka gake ga bwila na bwila nubwaKyala bwake kabonekile pabwelu ntundu utu apelile ukufuma mbwandilo bwa kisu. Popapo abene bakaya nisya kwinokesya; 21#Ef 4.17-18buno napa balimmenye Kyala, balinkusita nukumwimika ukuti yo Kyala, kangi balinkusita nukugwa ulupi kumyake; loli balinkwipela ba itolo munyinogono syabo, kangi indumbula syabo isitamahala silinkwipela ngisi. 22Abene bo bikwiyoba ukuya ba mahala, balinkwipela ukuya bakonyofu, 23#Kukumbu 4.16-18balinkusania ubukulumba bwa Kyala unsitakuyonga nikifwani kya mundu umbuguyufu, nikya njuni, nikya finyamana, nikya ifi fikwendela inyanda.

24Ko kuno Kyala alinkubaleka mfinyonyo fya mundumbula syabo, mbunyali bwa kwiywelula babo imibili gyabo; 25papo abene busaniaga ubwanaloli bwa Kyala nubutungulu, balinkwiputa nukukibombela ikipeligwa ukukinda Umpeli, uyu yo mwimikigwa bwila na bwila itolo, Amen.

26Ko kuno Kyala alinkubaleka mfinyonyo fya buywelufu; namanga abakikulu babo balinkwandula imbombo ya mibili gyabo ukufwana muno bapeligwe, balinkubomba isi bakapeleligwe ukubomba. 27Bope nabanyambala bububo; balekile ukuya nabo abakikulu bo papo bapeligwe, balinkunyonywana babo batupu, mfinyonyo, abanyambala babombaga nabanyambala abinabo ingosyasoni, kangi biyegelaga ifihombigwa ifi fifwene nubusobi bwabo.

28Lelo bo apa bakasilondaga isya kummanya bununu Kyala, umwene Kyala alinkubaleka munyinogono isya itolo, nukuti babombege isi sikabagila. 29Abene biswile nubumongafu bosa nubugasi, nubunyonywafyosa, nububibi, biswile akabini, nubugogi, nukulwa, nulusyobo, nukwinogona imbibi, ba luheho, 30bohesi, bambengile Kyala, ba matingo, ba lwitufyo, ba lwiyimiko, bagulambibi, bilabapapi, 31basitamahala, bafufyalwitikano, basitabumanyani, basitalupakisyo; 32abene napa balumenye ulutumulilo lwa Kyala, ulwa kuti bosa aba bikubomba sisisi kubabagile ku kufwa, batikusibomba ku kusibomba kwene, mma loli bikubitikila naba bikusibomba.

Currently Selected:

BAROMA 1: NNBII

Highlight

Compare

Copy