IMBOMBO SYA BATUMIGWA 28

Pauli ali ndusungo lwa Malta

1Lelo bo tufikile bununu butupi pisilya, tulinkulumanya ulusungo lululu, ukuti lo ulu bikuti Malta ingamu. 2Popapo abenekisu ba mumo balinkutwambilila nubololo ubu umundu atikubwagamo bwila; balinkutukokesya umoto, nukutwambilila twesa panongwa ya fula iyi yatimile, na panongwa ya mbepo. 3Lelo bo Pauli abungenie akakose ka tubabu abikile mmoto, popapo injoka yilinkusoka panongwa ya moto, yilinkuniemba nkiboko kyake. 4Loli abenekisu bo bakabwene akandu aka ukusyuta pakiboko kyake, balinkubulana balinkuti, “Kisita kwilamwa umundu uyu ngogi; napapo aponile kunyanja, loli ugwa lubukisyo atikundeka ukuti ayege mumi.” 5Loli umwene alinkukasanyandila akandu kala mmoto, silinkusita mukumwaga simo imbibi. 6Abene loli balinkusubila ukuti ikwisulaga, pamo ikugwaga nukufwa nakalinga. Lelo bo bagulile akabalilo akatali, bagile sitikumbonekela simo imbalapala, popapo balinkugalabuka itolo, balinkuti yo kyala.

7Lelo pabupipi nubuyo bula, fyalipo ifisu fya nkulumba gwa lusungo lula, uyu ingamu yake ali yo Publio; yo alinkutwambilila nukutuswila bununu amasiku matatu. 8Umwene ugwise gwa Publio alambalele, akamandanigwe nisekema nulwa munda. Popapo Pauli alinkwingila muno ali, alinkwiputa nukumbikapo amaboko; popapo alinkumbumbulusya. 9Lelo bo sibomke sisisi, popapo bosa abangi aba palusungo papo balinkwisa bope, balinkubumbulusigwa. 10Popapo balinkutwimika ulwimiko lu lwingi fiyo; bo tukusumuka, po balinkutupa ifyakulya fya panjila.

Pauli ikwendelela ukubuka ku Roma

11Bo gikindile imyesi mitatu, tulinkwipaka mungalaba ya pa kiloboko kya Aliksandria, iyi yagonaga palusungo mmapepo; yali nikifwani kya ba mbasa. 12Tulinkwakufika nkaya ka Sirakusi, mo tulinkulinda amasiku matatu. 13Ukufuma mumo tulinkusyungutila tulinkwakufika nkaya ka Regio; lelo bo likindile ilisiku limo, umbelo gwa kwitongo gulinkwanda ukukula. Popapo pisiku lya bubili tulinkwakufika nkaya ka Putioli. 14Mo tulinkubaga abaKristi bamo, abene balinkututengulila ukuti tugonepo nabo amasiku mahano na mabili; popapo tulinkwakufika nkaya ka Roma. 15Abene abaKristi aba bali mumo bo bapilike, balinkwisa kukutwambilila pa sokoni ya Apiforo niya Triotaberini. Umwene Pauli bo ababwene, alinkugwa ulupi kwa Kyala, alinkwenda nukwikasya itolo.

Nkaya ka Roma

16Lelo bo tufikile nkaya ka Roma, popapo Pauli alinkwitikisigwa ukuya mwene itolo pamopene nunsikali gwa kundindilila.

17Lelo bo gakindile amasiku matatu, Pauli alinkubabilikila abakulumba mbaYuda; abene bo babungene, alinkubabula alinkuti, “Mwe bamyitu, napapo une ngabombamo simo isya kubaliga aba kikolo kyitu, nalinga ko kukilania inyiho sya batata, mbinyigwe ukufuma nkaya ka Yerusalemu, nabikigwe mmaboko ga baRoma. 18Abene bo bayenesisye inongwa yangu, balondaga ukunyabula, namanga bakayagilemo yimo inongwa mmyangu iya kungogelamo. 19#Imbo 25.11Lelo bo abaYuda bikukana, silinkumbelela ukuti nginde kwa Kaisari; napapo ngaya nasyo simo isya kukilonga ikikolo kyangu. 20Syo isi mbabilikilile nukuti njobe nanumwe; namanga panongwa ya lusubilo lwa Israeli, po apa mfwele unnyuololo ugu.” 21Loli abene balinkumbula balinkuti, “Tukambililamo kalata ugwa nongwa syako ukufuma nkisu kya Yudai; kangi akisamo yumo mbamyitu ugwa kutubula, pamo ugwa kukuyoba ububibi. 22Loli tukulonda ukupilika kumyako isi kwinogona ugwe; namanga isya kabugutila aka kapagwike syo tumenye ukuti mosamosa itolo bikulwa nako.”

23Lelo bo bitikene ilisiku lya kwaganila nagwe, popapo ba bingi itolo balinkubuka kuno agonaga; bo alinkubalingania nukubasisimikisya isya butwa bwa Kyala, ukufuma nulubunju ukwakufika namayolo, alinkubatobesya isya Yesu, ukufuma mundagilo sya Mose na mbasololi. 24Bamo silinkubakola isi ayobaga, loli abangi balinkusita nukwitika. 25Abene bo bagile batikupilikisania babo batupu, balinkubalanila bo Pauli ayobile ilisyu limolyene ilya kuti, “Atalwisye Mbepo Mwikemo, apa ayobile nabisemwe mwa Yesaya unsololi apa atigi,

26 # Yes 6.9-10 ‘Bukaga kubandu bababa ukababulege ukatigi,

ukupilika ko mukupilikaga, loli mutisakusyaganiaga;

ukuketa ko mukuketaga, loli mutisakusibonaga;

27buno indumbula sya bandu aba sipelile sito,

imbulukutu syabo sili namapuli ukupilika,

kangi amaso gabo gasisilile;

ukuti bangaketaga namaso,

bangapilikaga nimbulukutu,

bangasyaganiaga nindumbula, bangapindukaga,

ko kuti nisembabumbulusye.’

28“Syo musimanyege lelo ukuti, ubupoki bwa Kyala ubu, butumigwe kubapanja, abene bo bisakupilikaga.”#28.28 Amasimbo gamo gikongelelako 29: Lelo bo ayobile balinkukanikana fiyo babo batupu.

30Umwene Pauli alinkugona ifyinja fibili nnyumba yake, iyi ahombelaga indalama, alinkubalumbilila bosa aba bisaga kumyake. 31Alinkufumusya ubutwa bwa Kyala, nukumanyisya inongwa sya Ntwa Yesu Kristi pabwelu itolo kisita yumo ugwakumpinga.

Currently Selected:

IMBOMBO SYA BATUMIGWA 28: NNBII

Highlight

Compare

Copy