Galatia 5
5
Yesus mombebas ito ingkan kawan poraturan agama
5:1-12
1Kristus ocop mombebas ito ika to bujur-bujur lampas. Tului iyoh, aroh hopuli kole jarin isan cipon co sobulih nanggung beban.
2Akuh, Paulus, co mantun ma ikan. Ngonehbat antun kuh tuh. Amun ikan tomalak maka pompatoi kristus indam me aroh angar boguna. 3Sindo oni akuh mantun ma ikan. Kokon dulun co nyarah arop ika tomalak, iroh sobulih tuhit ma kokon Hukum Torat. 4Amun ikan bousaha jarin bujur nyan tohimo Mohotara ma cara tuhit ma Hukum Torat, borati ikan matot hubungan ma Kristus. Ma isanioh ikan kuloi kopion Mohotara.
5Tapi indan ito, ma pondohop Roh Mohotara hintang porocaya ma Yesus, ito nganto hintang moharap waktueh ito tomangap bujur nyan tohimo Mohotara. 6Awi, mosalah hobalak atawa aroko hobalak arelu oko arti indan to co oko nyan ponah Kristus Yesus. Co penting iyohco amun porocaya ma Yesus hintang koporcayaan cioh co mondorong ito ika mongasihi dulun bokon.
7Batuh ikan poleha komajuan co pio ponah umba Yesus. Omeboh co mohala-halang ikan? Aroh dapot ikan aroko bat umba calan co buah. 8Ajaran co sala yoh aroko ingkan Mohotara co naah ikan ika jarin kawan anak-Eh. 9Mingkatlah: Kojahatan co kitan eh kolik oko akibat co bahai samah lehma isan isut dagi mompongaruh kucok tepung ika nompi rute nyiwuh.#5:9 Noto ka Matius 16:6,11-12; Markus 8:15; Lukas 12:1; hintang 1 Korintus 5:6-8. 10Tapi Tuhan umpi akuh yakin bahawa ikan aroko angar topongaruh ma ajaran co bobeda ma co ocop tomajar kuh. Mohotara angar mohukum ome bewe dulun eh co pobingung pikiran me.
11Akuh incah tomonganiaya pian doh co porocaya bahawa kawan dulun sobulih tomalak ika tonorima Mohotara. Maka, mositi akuh aroko momborita tintun balak. Akuh momborita tintun cara Yesus matoi nyan sompolaki ika umpi calan kosolamatan. Soandai eh akuh momborita tintun balak hangki tintun pompatoi Yesus yoh, maka akuh aroh angar umpi iroh sangit ma akuh bat. 12Tapi, hobalak leh aroko cukup ika kawan dulun taiyoh co pobingung pikiran me. Meleh pio iroh mungkong totok kohaan doh kokoi eh!
Roh Mohotara mombimbing ika bolum ngonyorih Mohotara hangki ngonyorih kolunon
5:13-26
13konduang kuh bakah bawe, ikan ocop tomili Mohotara ika jarin dulun lampas. Tapi onon aroko borati ikan bebas ika bolum sosuai ma kojere kolunon co jahat. Sobalik eh, ngorinah mongasihi ma cara dohop kawan dongam me. 14Kokon porentah hintang poraturan Mohotara nyan buku Hukum Torat tonyimpul ponah ico porentah: “Mongasihiboh samah arop me samahma iko mongasihi aropmu tarop.”#5:14 Ingkan Imamat 19:18. Yesus monekan ‘samah arop me’ borati ‘sosamah me kolunon’. Noto Lukas 10:25-37. 15Aroh nyangit hokelat hintang hotohonya dongam me isan ocin dangas co hokorungngam hintang hokotak. Amun ikan umpi aang co isan iyoh, ikan nyangit hokohancur.
16Ngonehbat antun kuh tuh! Horoholuh bat bolum sosuai ma kojere Roh Mohotara. Maka, mositi ikan aroh angar umpi kojere kolunon co jahat. 17Kojere kolunon co jahat hokolawan ma kojere Roh Mohotara. Hintang kojere Roh Mohotara hokolawan ma kojere kolunon. Duo kojere cotuh nyangit botentangan, sohinga ikan horoholuh aroko lian nguan kawan aang co tongonyere me nguan. 18Amun ikan bolum tomombimbing Roh Mohotara, maka ikan aroh sobulih bolum nyambo kuasan Hukum Torat.
19Ocop korinah kotonta kuan gawin dulun co bolum sosuai ma kojere beti co jahat. Sobagai cuntu: hokoruh arinai kawin, hokoruh isan ocin, numba hawa napsu, 20nyembah nyuku aranaang co bokon hangki Mohotara co bujur, hapo kawan kaji, ngodolee dongai, hojawap, porasaan bosingon, jarin nyua ponyingi, menting arop tarop, nompi paut bantah antara konduang bakah bawe, hojolahan baya ma dulun co tomanggap penting, 21jere aang co dulun empui, hokorih tolangkun kobuso, ngecat kuman ngorih rami-rami, hintang kokon dosa co bokon ma onon. Akuh poringat ikan isan co piji akuh mantun soun ma otuh: Kawan dulun co hopompahui umpi kawan angco isan onon aroh angar jarin warga Korojaan Mohotara.
22Tapi amun ikan tonguasa Roh Mohotara, buaeh iyohco: nyangit masi, jorih jerah, bolum ponah ngolandah, bosabar ponah kosusah, herak dohop dongai, herak umpi aang co pio, lian tomorocaya, 23aroko pongasar, hegah ngolawan kojere arop eh. Arelu oko poraturan ome bewe co ngosiit dulun ika bolum isan iyoh!
24Kawan dulun co jarin pengikut Kristus Yesus, iroh ocop umbot bolum sosuai ma hawa napsu hintang kojere beti. Ibarat eh kojere isanioh tongompatoi nyan sompolaki 25Roh Mohotara ocop mubah ito bolum jarin baa. Poko tului iyoh, kelehbat ito mahi hopompaluh bolum sosuai ma bimbingan Roh Mohotara. 26Arohbat ito jarin bolecak. Arohbat ito nyangit hokompanas dongan to ika jarin angit. Arohbat nyangit hokosingon dongai eh.
Currently Selected:
Galatia 5: TBSS
Highlight
Copy
Compare
Share
Want to have your highlights saved across all your devices? Sign up or sign in
