Galatia 6
6
Kojere boh ikan hoko dohop
6:1-10
1konduang bakah bawe, amun ico beti nyan halo ikan tonyopopak me umpi dosa. Maka, ikan co bolum tomimpin Roh Mohotara sobulih majar dulun cioh. Ikan sobulih dohop are ika eh umbot bat umpi dosai eh. Tapi, ikan sobulih nguan eh ma atoi co aroh kasar. Borondo-rondong yoh! Mingkat eh, aroh dapot ikan mahi umpi dosa tului eh.#6:1 Amun ito nopoh ico beti jolaha co bodusa, ito sobulih mingkat tujuan to. Tujuai eh sobulih ika dulun cioh ngomuah cara kobolum eh. Poringatan Paulus oko duo mana eh. 1) Mingkat, ito mahi piji umpi kawan dosa. 2) Aroh dapot ito bodosa ma kolecak to. 2Kojereeh ikan hoko dohop ponah kosusah dongam me. Ma isanioh ikan bolum tuhit ma porentah Kristus.#6:2 Noto Yohanes 13:34. 3Mungkin oko dulun co aroh kolu dohop dongai tului are mangap arop eh labih harat hangki dongai. Dulun co bopikir sala isan iyoh, sobujur eh arelu oko koharat eh. Maka, are baya nipu arop eh. 4Sika dulun sobulih morisa kolakuai eh tarop main pio atawa aroh. Amun pio, are boraoi komo banga ma eh. Tapi aroh usah are mombanding eh ma ome co tongompian dulun bokon. 5Sika dulun sobulih botanggung jawab tohimo Mohotara tintun kuan gawi eh tarop.
6Dulun co tomajar ma antun Mohotara, sobulih magi kokon aang co pio#6:6 Antun ‘kokon co pio’ boraoi borati angco libang (duit uang, ongkun ponguman) awi pongajar taiyoh mongguna waktu eh ika majar. ATAWA ‘kokon co pio’ boraoi ka borati angco rohani. Nyan waktu pongajaran, dulun boraoi tolindah mantun antun co pio ika mondorong dongai moningkat socara rohani. ma dulun co majar eh.
7Aroh nipu arop mu! Amun iko bopikir Mohotara boraoi tomporemeh, iko baya nipu aropmu. Awi sika dulun mutoi pongulih sosuai ma ome co tomimbun eh. 8Dulun co bolum sosuai ma kojere beti angar tomohukum Mohotara. Tapi dulun co bolum sosuai ma kojere Roh Mohotara angar haba kobolum co kokotahi ingkan Roh Mohotara. 9Poko tului iyoh, arohboh kale-kale umpi angco pio. Nyan waktu co tonantu Mohotara, ito haba kokon co tomonjanji-Eh. Ito angar haba eh, asar ito aroh umbot umpi angco pio. 10Poko tului iyoh, haasboh ito umpi angco pio sika sika oko kosempatan. Haasboh ito umpi angco pio ma kokon dulun, husus eh ma kawan dulun co porocaya ma Yesus.
Tontiput kawan antun Paulus ponah surat eh
6:11-18
11Porhatiboh daras borobaak tulisan tatuh. Ma silung ku tuleh akuh nulih eh. 12Oko kawan dulun co nyau potamam arop eh ponah angco kitan. Iroh yoh bousaha momaksa ika me hobalak ka ika ikan tonyolamat, aroh tului Kristus matoi nyan sompolaki Iroh nguan angcioh ina iroh aroh tonganiaya kawan dulun Yahudi. 13Iroh non ocop tomalak. Tapi iroh aroh tuhit ma kokon Hukum Torat. Iroh baya nyau ikan tomalak ika iroh boraoi potamam arop doh. Iroh boraoi mantun ma dulun Yahudi co bokon bahawa ikan umba ajaran doh. 14Tapi aroko kuh potamam alo gawi ome bewe co tongompiang kuh. Akuh baya potamam anco tongompian Yesus Kristus, Tuhan co bokuasa ma ito. Awi Are ocop matoi nyan sompolaki ika umpi calan ika dulun boraoi tonyolamat. Poko tului iyoh ito co porocaya ma Are. Poko tului iyoh, akuh samah isan dulun matoi tohadap kokon angco nyan pindaondo.
15Tomalak atawa aroh, onon aroko penting. Co penting iyoh onon ito bolum ma cara co baa awi ito porocaya ma Yesus. 16Akuh bodoa ika Mohotara mihi kongolandah kongolami indan kokon dulun co bolum isan iyoh. Oluboh Mohotara mahi porahan ang co pio hinut ma ito. Ito tuhboh co jarin umat Mohotara Israel co baa, samah isan bangsa Israel iyohco umat Mohotara sinan.
17Akuh tonganiaya awi akuh iyohco rasul Yesus. Nyan beting kuh tuh incah oko alit kawan aring tului siksaan taiyoh. Poko tului iyoh, molai ingkan makitu, arohboh oko dulun co posusah akuh kole. 18Konduang bakah bawe, olu Tuhan to Yesus Kristus horoholuh mihi angco pio hinut indam me. Amin!
Currently Selected:
Galatia 6: TBSS
Highlight
Copy
Compare
Share
Want to have your highlights saved across all your devices? Sign up or sign in
