Galatia 4
4
1-2Porhati aang cotuh: Daja co jarin ahli waris angar tempun kokon aranaang co tomihi tamai eh indai. Tapi amun daja cioh incah kolik, tamai eh angar nugas kawan dulun ika monjaga anak eh yoh. Oko ka kawan dulun ika mongurus harta tioh anak eh yoh. Koadaan daja cioh aroh ocu beda eh ma ico beti cipon. Aang cioh bolaku dapot waktu co tonantu pian tamai eh.
3Sanioh ka ma ito. Batuh, ito isan anak co incah daja awi ito sobulih tunduk nyan pinda kuasan kawan poraturan ingkan orong macam agama nyan pinda ondo tuh. 4Tapi nyan kotika co pas co tonantu pian Mohotara, Are nyoruhan Anak-Eh hia dunia tuh. Are tonganak ingkan ico beti bawe. Are tuhit ma kokon porentah hintang poraturan Mohotara ponah Hukum Torat. 5Are tonyoruhan ika mombebas kawan dulun ingkan kuasa Hukum Torat. Ma isanioh ito lian tonorima jarin kawan anak Mohotara. 6Poko tului ito iyohco kawan anak Mohotara, maka Are nyoruhan Roh Anak-Eh indan to. Ma isanioh, ito boraoi mantun naah Mohotara, ‘Tama, yoh Tamangkuh’. 7Poko tului kokon co tongompian Mohotara yoh, ikan aroko bat kawan cipon co sobulih tuhit ma Hukum Torat. Ikan ocop jarin kawan anak Mohotara. Tului ikan ocop jarin kawan anak-Eh, maka Mohotara umpi ikan jarin ahli waris co norima kokon aranaang co tomonjanji Mohotara.
Paulus kuatir dulun Galatia aroko porocaya bat Tarung Pio co buah
4:8-20
8Tapi batuh, ikan arinai oko hubungan ma Mohotara. Ikan monyembah dewa-dewi co aroh bujur. Ikan jarin kawan jungus dewa-dewi taiyoh. 9Tapi makitu ikan ocop nyono Mohotara. Atawa labih tangar amun akuh mantun bahawa Mohotara co umpi hubungan ma ikan. Poko tului iyoh, aroh hopuli kole tuhit ma kawan roh dunia co aroh bokuasa hintang aroh boguna. Aroh jarin kawan cipon doh. 10Tapi ma koketat, ikan incah momolihara kawan ondo kotika kawan bulan, kawan sorang, kawan toun totentu. 11Jadi, akuh kuatir amun polayanan kuh indam me jarin ngahus. 12Makitu konduang bakah bawe, akuh jarin samah isan ikan. Awi iyoh akuh nyawot ika ikan jarin samah isan akuh ka. Ikan aroko piji umpi aranaang co sala ma akuh. 13Mositi ikan incah mingkat pokosulak lau akuh dombut hia ikan. Akuh sampet momborita Tarung Pio ma ikan oluco betingkuh hotoro.#4:13 Ito aroh monau kura betin Paulus kurang sehat. Nyan ayat 15, antun Paulus mungkin bomaksud bahawa matai eh kurang sehat. Atawa mungkin alasan eh tului are tomanting ma batu dapot jonyo matoi (Kesah 14:19-20). Mungkin Paulus oko kosempatan ika momborita Tarung Pio awi are buho ingkan koporoh co tonyebab pian kawan dulun co ngolawan are. Atawa mungkin Paulus aroh boraoi tulak ingkan derah Galatia tului are hotoro. Antun co hapan nyan intoi borati ‘lamah’ aroh toro biasa isan mondam, pian usot, tomuntam bahi, hcbb. 14Tapi, oluco waktu cioh beting kuh hotoro, aang cioh aroh umpi ikan kuloi atawa mohina akuh. Ikan malah norima akuh sobagai dulun co tonyoruhan pian Mohotara samah isan molekat atawa Kristus Yesus leh. 15Nyan kotika iyoh, ikan nongkomo sanang. Akuh yakin ikan lera mongorban ome bewe indang kuh. Kura makitu ikan aroh nongkomo sanang bat. 16Akuh tenden monjelas Tarung Pio co buah indam me. Poko tului iyoh, mainboh ikan mongangap akuh samah ma musuh.
17Makitu oko kawan dulun co bosomangat bousaha mehen ikan ika umba iroh. Tapi, tujuan doh aroh pio awi nyau misah ikan ingkan ajaran co bujur. 18Mula pio amun ikan bosomangat asar ikan bosomangat ma tujuan co pio. Ikan sobulih horoholuh nguan isanioh, aroh baya amun akuh oko halo ikan.
19 Ikan ibarat eh kawan anak kuh. Akuh mondorita kole samah ma bawe hojok rahat nganak. Akuh angar horoholuh mondorita dapot kawan tobiat Kristus oko nyan ikan.
20Akuh karas bolingu oko hokohalo ma ikan makitu ina akuh lian hopander tohimo ikan ma kawan antun co lomun. Awi akuh ocop aroko monau nyau umpi ome kole ma ikan!
Cuntu ingkan Hagar ico beti cipon hintang Sara ico dulun co bokon cipon
4:21-31
21Makitu akuh mantun ma ikan co nyau bolum nyambo kuasan Hukum Torat. Mainboh ikan aroh ngoneh ome co tonulih nyan ponah Hukum Torat yoh? 22-23Awi nyan ponah kawan buku Musa oko kesah cotuh: Abraham empun duo anak bakah. Ico anak eh co tonganak ico beti cipon. Daja cioh tonganak sosuai ma roncana kolunon. Anak Abraham co koduo eh tonganak bawe co aroko cipon. Daja cioh tonganak sosuai ma janjin Mohotara. 24-25Duo bawe cioh molambang duo janjin Mohotara. Hagar molambang Hukum Torat co ihin indan bangsa Yahudi nyan puruk Sinai nyan tana Arab. Hagar nganak kawan anak co jarin cipon. Jadi, Hagar ka molambang Yerusalem co nyan dunia awi iroh samah ma cipon co bolum tonyambo kuasan Hukum Torat yoh. 26Tapi Sara molambang Yerusalem sorga iyohonon dulun co aroh cipon. Are samah ma tinan to. 27Ajaran cioh tonulih ponah Surat Borasih:
“Haas iko co batuh tomanang co aroh piji nganak; makitu jorih jerah bat!
Haas iko co aroh piji uyuh poroh nganak; makitu jorih jerah bat paluh bosorak sorai bat!
Awi, iko co tonaat banam mu angar empun labih orong koturunan hangki bawe co bolum ma banai.”#4:27 Ingkan Yesaya 54:1.
28Konduang bakah bawe! Ikan samah isan Ishak awi sama-samah tonganak tului janjin Mohotara. 29Nyan jaman sinan, daja co tonganak sosuai ma roncana Roh Mohotara yoh, are tomonganiaya pian daja co tonganak sosuai ma roncana kolunon. Aang cioh ka co tojadi makitu. 30Tapi, ome co tomantun ponah Surat Borasih? Santuh naii eh: “Ngomuho bat bawen cipon conon kawun anak eh. Awi, anak ingkan cipon conon aroh angar haba koponato ingkan tamaieh. Baya anak ingkan bawe co bokon cipon angar pian tamaieh jarin ahli waris eh.”#4:30 Ingkan Kojadian 21:10.
31Jadi, konduang kuh bakah bawe, akuh potegas eh: Ito aroh boh isan kawan anak ingkan bawen cipon cioh. Tapi ito isan kawan anak ingkan bawe co aroh cipon.
Currently Selected:
Galatia 4: TBSS
Highlight
Copy
Compare
Share
Want to have your highlights saved across all your devices? Sign up or sign in
