Galatia 2
2
Kawan rasul nyan Yerusalem sotuju ma polayanan Paulus
2:1-10
1-2Opah opat balas toun, akuh tulak kole mahah Yerusalem tului potunjuk Mohotara. Akuh hia idi homboh Barnabas. Titus mahi umba homboh akuh. Nyan Yerusalem, oko kawan pomimpin jomaat co tomangap tohormat. Akuh umpi kohosopopak husus ma iroh leh. Ponah kohosopopak cioh, akuh monjelas eh ma kawan pomimpin taiyoh nain Tarung Pio co tomomborita kuh ma kawan bangsa co bokon ma Yahudi.#2:1-2 Dulun Yahudi co jarin porocaya ma Yesus incah bousaha tuhit ma Hukum Torat, iyohonon kokon porintah hintang poraturan Mohotara co tonulih Musa. Iroh tuhit ma iyoh awi iyoh incah cara kobolum doh. Kawan rasul Yesus nyan Yerusalem momborita Tarung Pio ma dulun Yahudi. Jadi, pokongorong iroh arinai monau tintun mosalah amun dulun co bokon ma Yahudi jarin porocaya ma Yesus. Mainkah dulun co bokon ma Yahudi co jarin porocaya ma Yesus sobulih tuhit ma Hukum Torat ka? Paulus monjelas eh bahawa kawan dulun co tonyolamat baya tului porocaya ma Yesus, aroh tului tuhit ma Hukum Torat. Akuh kuatir mungkin polayanan kuh jarin mohampa ka eh. 3Tapi tornyata hiah waktu Titus umba akuh, kawan pompimpin taiyoh aroh momaksa ika are tomalak. Padahar are iyoh co dulun Yunani. 4Mula oko kawan dulun co bousaha momaksa ika dulun co porocaya ma Yesus sobulih tomalak. Tapi iroh co momaksa yoh aroh bujur-bujur porocaya ma Yesus. Iroh pura-pura porocaya ika boraoi muntam ponah kolompok to, aroko dongan doh sadar bahawa iroh aroh bujur-bujur porocaya ma Yesus. Iroh nyau noliti cara kobolum to co bebas co tomihi Yesus. Hintang sobujur eh, iroh nyau ika ito mahi sobulih tuhit ma Hukum Torat ibarat eh ico beti cipon sobulih tuhit ma tempui eh. 5Tapi isut mahi kaih aroh sotuju ma kojere doh yoh. Awi kaih nyau ika ikan tenden porocaya ma Tarung Pio co buah.
6 Sindo oni konduang, akuh ocop monjelas polayanan kuh ma kawan pomimpin nyan Yerusalem. Oluco iroh tomangap tohormat, akuh aroh poduli ma kodudukan doh yoh. Awi Mohotara mahi aroh norima kawan dulun bodasar tampa luar. Tapi kawan pomimpin taiyoh aroh momaksa akuh ika momborita ome bewe bat. 7Molahan, iroh jarin tohoku bahawa Mohotara ocop nyoruhan akuh. Mohotara ocop nyoruhan akuh ika momborita Tarung Pio hia dulun co bokon ma Yahudi.#2:7 ‘Dulun co bokon ma Yahudi’ socara harfiah, ‘kawan dulun co aroh hobalak’. Hintang ‘dulun Yahudi’, socara harfiah, ‘kawan dulun co hobalak’. 8Iroh jarin tohoku ma iyoh awi Mohotara ocop mihi kuasa indang kuh ika jarin rasul indan dulun co bokon ma Yahudi, samah isan Mohotara mihi kuasa indan Petrus ika jarin rasul indan dulun Yahudi. 9Ingkan kolompok pomimpin taiyoh, Yokobus, Petrus hintang Yohanes empun tanggung jawab co poko penting. Iroh jarin tohoku tintun kopion Mohotara co ihi ma akuh. Kotika iroh jarin tohoku ma iyoh, iroh hotabe ma akuh hintang ma Barnabas. Onon jarin ciri bahawa iroh sotuju ma Tarung Pio co tomomborita kuh. Iroh sotuju amun kaih momborita ma dulun co bokon ma Yahudi, hintang iroh momborita ma dulun Yahudi. 10Iroh baya nyawot asi ika kaih pompaluh dohop dulun mala. Mula akuh ocop tuu-tuu jere umpi ang taiyoh.
Paulus nopoh Petrus
2:11-14
11Tapi, piji sindo akuh sobulih nopoh Petrus tului aang co piai eh sala. Iyoh tojadi pas hiah Petrus nyan kota Antiokia. 12Santuh kesah eh: Kosulak eh Petrus oko nyan Antiokia, are kuman hombo-homboh dulun co bokon ma Yahudi co porocaya ma Yesus. Opahiyoh oko rombongan dulun Yahudi dombut ingkan Yerusalem. Iroh tonyoruhan pian Yokobus. Iroh bopikir dulun co bokon ma Yahudi sobulih tomalak hintang sobulih tuhit ma kokon porintah hintang poraturan Mohotara co tonulih Musa ponah buku Hukum Torat. Amun aroh, dulun Yahudi aroh boraoi hojolahan ma dulun co bokon ma Yahudi yoh. Jadi, waktu iroh dombut, Petrus aroh kolu kuman kole hontong dulun co bokon ma Yahudi. Are molai pokocu arop eh ingkan iroh awi are takut tonyala pian rombongan taiyoh. 13Gawieh isan dulun co aroh jujur. Kawan dulun Yahudi co bokon mahi tohumu-humun gawin Petrus co sala yoh. Malah Barnabas mahi gawi eh umba isan iroh ka. 14Gawin doh aroh sosuai ma Tarung Pio co buah. Jadi, waktu akuh kito sanioh, akuh nopoh Petrus nyan muka kokon dulun. Hieng kuh ma are, “Iko ico dulun Yahudi. Tapi iko ocop boraoi bolum isan dulun co bokon ma Yahudi. Poko tului iyoh, aroh momaksa kawan dulun co bokon ma Yahudi ika bolum isan dulun Yahudi.”
Dulun tonyolamat baya amun porocaya ma Yesus
2:15-21
15Kaih: Paulus, Petrus kawun dulun Yahudi co bokon co porocaya iyohco koturunan dulun Yahudi. Dulun Yahudi monganggap uras dulun co bokon ma Yahudi iyohco ‘dulun bodusa’ awi iroh aroh tuhit ma Hukum Torat.#2:15 Hukum Torat iyohco limo buku portama ponah buku Pojanjian Lama nyan Alkitab (Kojadian, Koluaran, Imamat, Bilangan hintang Ulangan). 16Batuh kaih mahi bopikir isan iyoh ka. Tapi makitu kaih ocop monau bahawa dulun aroh jarin bujur nyan ponoto Mohotara tului iroh tuhit ma Hukum Torat. Dulun jarin bujur nyan ponoto Mohotara baya tului iroh porocaya ma Kristus Yesus.#2:16 Antun ‘porocaya’ nyan intoi aroko baya berarti aranang ponah pikiran hintang ataoi to leh, tapi boarti porubahan ponah cara to bolum. Siana dulun Israel hapo Hukum Torat ika mogarah cara doh bulom. Makitu, dulun co porocaya sabulih porocaya ma Yesus ika mongarah cara kobolum to. Ononboh alasan eh kaih mahi ocop porocaya ma Kristus Yesus. Kaih jarin bujur nyan ponoto Mohotara awi kaih porocaya ma Kristus, aroh tului kaih tuhit ma Hukum Torat. Aang cioh ocop tonulih ponah Surat Borasih. “Arelu oko ico beti mahi co jarin bujur nyan ponoto Mohotara”#2:16 ingkan Masmur 143:2b. tului cara tuhit ma Hukum Torat.
17Kaih bousaha tomangap bujur pian Mohotara ma cara bolum hico ma Kristus. Tapi amun kaih nguan cara cioh, dulun bokon bopikir bahawa kaih iyoh co ‘dulun bodusa’ isan kawan dulun bokon ma Yahudi. Mainboh yoh borati Kristus umpi kaih bodusa? Mositi aroh lau! 18Ajaran bahawa dosan dulun tomongampun amun are tuhit ma Hukum Torat iyohco ajaran co sala. Akuh ocop mombukti onon. Amun akuh nguan kawan cara cioh kole, aang cioh umpi akuh bujur-bujur jarin dulun bodusa.
19Malahan Hukum Torat non leh co umpi akuh tohoku. Aku aroh boraoi tonyolamat ma cara conon. Makitu, akuh ocop tongombebas ingkan onon ina akuh boraoi bolum ngonyorih atoi Mohotara. Somporengu, hiah Kristus matoi nyan sompolaki, isan iyoh ka akuh matoi. 20Awi akuh aroh bolum kolema cara isan batuh. Makitu, Kristus bolum nyan ponah atoi kuh. Akuh bolum nyan beti cotuh ma cara baa awi akuh porocaya ma Are. Are iyohco Anak Mohotara co korinah mongasihi akuh. Are lera matoi sobagai kurban co kanti akuh. Tului akuh porocaya ma-eh, dosang kuh tomongampun. 21Akuh aroh angar piji kuloi ma kopio Mohotara yoh oluco ito aroh patut norima eh! Ito aroh boraoi jarin bujur nyan ponoto Mohotara amun ito bousaha tuhit ma Hukum Torat. Soandaieh ito boraoi jarin bujur ma cara cioh, borati arelu oko alasan Kristus sobulih matoi.
Currently Selected:
Galatia 2: TBSS
Highlight
Copy
Compare
Share
Want to have your highlights saved across all your devices? Sign up or sign in
