Galatia 1
1
Tontoke ingkan Paulus
1:1-5
1-2Indan co tohormat kawan jomaat nyan propinsi Galatia:
Surat cotuh ingkan akuh, Paulus, hintang kawun ingkan kokon konduang co oko umba akuh. Akuh jarin rasul aroh tului tomili kolunon. Akuh jarin rasul bokon tomili hintang tonyoruhan pian kolunon. Tapi akuh tonyoruhan lansung ika momborita Tarung Pio pian Laca Co Tomonjanji Mohotara, iyohonon Yesus. Akuh mahi co tonyoruhan Mohotara Taman to umpi Yesus bolum hopuli ingkan pompatoi.
3Akuh bodoa ika Mohotara Taman to hintang Tuhan Yesus Kristus horoholuh porahan koboraoi Eh kawun mihi kongolandah kongolami indam me. 4Yesus matoi nyan sompolaki ina nyolamat ito. Are nguan iyoh ika ito tonyolamat ingkan kojahatan co oko nyan jaman cotuh ka. Kokon iyoh tojadi sosuai ma kojere Mohotara Taman to. 5Haas ito potara Mohotara sokotahi-tahi eh. Amin!
Baya oko ico leh Tarung tintun kosolamatan co buah
1:6-10
6Yesus Kristus ocop porahan kopioi-Eh ma ikan. Ma cara conon, Mohotara mili ikan ika jarin umat-Eh. Jadi, akuh tokocit lau ponah waktu co nyua ikan ocop kuloi Mohotara. Makitu ikan umba ico ‘tarung pio’ co bokon. 7Tapi iyoh sama sino bokon Tarung Pio! Kawan dulun co majar onon nyau mubah Tarung Pio tintun Yesus Kristus, iyohonon Laca Co Tomonjanji Mohotara. Iroh nyuwah mongganti Tarung Pio ma tarung co sala. Jadi, iroh umpi ikan jarin bingung.
8Tapi kaih ocop momborita ma ikan Tarung Pio co buah.#1:8 Tarung Pio co buah iyoh co ito tonyolamat baya amun ito porocaya ma Yesus. Ome bewe co momborita ma ikan ico tarung pio co bobeda hangki onon, oluboh Mohotara mohukum iroh. Soandai eh oko nyan songkolang kaih kawan rasul Yesus atawa molekat ingkan sorga mahi co momborita tarung pio co bobeda, oluboh Mohotara co angar mohukum are. 9Pira-pira waktu co ohut kaih ocop mantun tintun aang taiyoh. Makitu, akuh hopuli mantun onon kole. Amun oko dulun co momborita ma ikan ico tarung pio co bobeda ingkan co ocop me norima ingkan kaih, oluboh Mohotara mohukum dulun cioh.
10 Ma antun cioh, ocop jelas akuh aroh bousaha ngonyorih kolunon.#1:10 Mungkin oko kawan dulun co mantun bahwa Paulus nyuwah ngonyorih kolunon. Iroh bopikir are aroko maksa dulun nonunuh Hukum Torat awi are nyau umpi cara bolum meleh sutir indan dulun bokon Yahudi. Tapi sobujur eh, Paulus ocop paham bahwa kawan dulun tonyolamat aroko tului nuhit Hukum Torat. Kawan dulun tonyolamat baya awi porocaya ma Yesus. Akuh baya bousaha ngonyorih atoi Mohotara leh! Soandai eh akuh bousaha ngonyorih kolunon, akuh bokon kole jungus tioh Kristus.
Mohotara mili Paulus jarin rasul Yesus#1:11-24 Kesah Paulus tuh oko nyan Kesah Kawan Rasul 9:1-19.
1:11-24
11Konduang kuh bakah bawe, akuh tuu-tuu jere ika ikan paham. Tarung Pio co tomomborita kuh aroh borasar ingkan pikiran kolunon. 12Awi akuh aroh norima tarung cioh ingkan kolunon. Elu oko dulun co majar akuh tintun tarung cioh. Yesus Kristus lehboh co porahan Tarung Pio yoh ma akuh.
13Tapi, sorinai akuh porocaya ma Yesus, akuh bolum sosuai ma agama Yahudi. Ikan ocop monau cara kobolum kuh batuh ponah agama Yahudi non. Akuh korinah monganiaya kawan dulun co porocaya ma Yesus. Akuh bousaha ika ngolumat iroh. 14Akuh mula tukoi bolajar kokon poraturan agama Yahudi. Akuh bolajar iyoh labih hangki kokon dulun Yahudi bokon co soumuran ma akuh. Akuh mahi korinah tuhit ma kokon poraturan ingkan tatu hiang to yoh.
15Tapi bokon, Mohotara oko roncana husus indang kuh. Are mili akuh hiah akuh incah ponah olom tinang kuh. Are mili akuh ika jarin rasul Yesus, Anak-Eh. Are nguan onon aroh tului akuh pantas, tapi awi Are korinah koboraoi ma akuh. Maka, Mohotara jorih 16porahan Yesus ma akuh ika akuh momborita ma kawan dulun co bokon ma Yahudi tintun Yesus.
Jadi, akuh haba pomahaman tintun Yesus lansung ingkan Are leh tarop. Poko tului iyoh, akuh aroh nyawot ico beti mahi majar akuh. 17Ocop oko kawan dulun co jarin rasul Yesus sorinai akuh. Nyan waktu iyoh, iroh oko nyan kota Yerusalem. Tapi, akuh aroh tulak hia idi ika tomajar pian doh. Akuh tulak hia tana Arab paluh hopuli kole hia kota Damsyik. 18Tolu toun opah akuh jarin rasul Yesus, hanyar akuh tulak hia Yerusalem. Akuh nyau nyopopak rasul Petrus.#1:18 Petrus iyohco aran Yunani. Petrus mahi tonisi ‘Kefas’ ponah bohasa Aram (bohasa dulun Yahudi hondo-hondo). Ara co Petrus hintang Kefas yoh artieh ‘batu karang’. Rasul Petrus jarin korinah kodohon porocaya ma Yesus. Ponah surat asli, Paulus hapo ara ‘Kefas’ nyan intoi. Akuh baya nukui umba are kotahin limo balas ondo. 19Nyan waktu iyoh akuh aroh sopopak ma kawan rasul co bokon kocuali Yokobus konduang Tuhan Yesus.
20Akuh bosumpah nyan tohimo Mohotara. Kokon co tonulih kuh indam me tuh bujur. Akuh aroh ngoncunih.
21Kotika kuh oko nyan Yerusalem, akuh tulak hia pira-pira derah nyan propinsi Siria hintang Kilikia. 22Poko tului iyoh, kawan jomaat Kristus nyan Yudea arinai piji sopopak ma akuh hopongito tampa. 23Iroh baya ngoneh borita tintun akuh. Oko kawan dulun co mantun, “Batuh are monganiaya kaih awi kaih porocaya ma Yesus. Are bousaha ika ngolumat kaih. Tapi makitu are leh bat momborita Tarung Pio tintun Yesus yoh.” 24Jadi, kawan dulun co porocaya nyan propinsi Yudea potara Mohotara tului Mohotara ocop mubah cara kobolum kuh.
Currently Selected:
Galatia 1: TBSS
Highlight
Copy
Compare
Share
Want to have your highlights saved across all your devices? Sign up or sign in
