Galatia 3
3
Ito tomanggap bujur nyan ponoto Mohotara baya amun ito porocaya ma Yesus
3:1-14
1Konduang bakah bawe nyan Galatia. Ikan dulun uong! Ikan bujur-bujur ocop tonyasat tului ajaran dulun bokon! Padahar akuh ocop piji jelas lau monarang eh ma ikan tintun Yesus Kristus co ocop tomohukum matoi nyan sompolaki 2Museh kisok kuh tuh: Mainboh ikan monorima Roh Mohotara tului ikan tuhit ma Hukum Torat? Samah sindo aroh! Ikan norima Roh Mohotara awi ikan porocaya Tarung Pio tintun Yesus co tomomborita kuh ma ikan! 3Ingkan waktu iyoh, ikan ocop molai bolum ma kokuatan ingkan Roh Mohotara. Main boh ikan bopikir makitu ikan boraoi ngorapot tujuan kobolum me ma kukuatan tarop? Aroh dalo uong! 4Aroh ikan bopikir kokon aangco buah Ikan non#3:4 Nyan Galatia, oko orong dulun Yahudi co aroh porocaya bahawa Yesus iyohco Kristus, iyohonon Laca Co Tomonjanji Mohotara. Iroh nyompan Yesus iyohco pongoncunih atawa ponipu leh. Onon tuluieh iroh aroh norima antun Paulus. Iroh monyiksa kawan pongikut Yesus. Jadi, ponah ayat cotuh kokon co tomongalami me boraoi borati uras pondoritaan atawa kokon aang co pio (ayat 5). mohampa. Mositi kokon onon aroko mohampa. 5Mohotara mihi Roh-Eh ma ikan. Are nguan orong aang co mosotahir nyan halo ikan. Mainboh Mohotara nguan iyoh awi ikan tuhit ma humum Torat? Samah sindo aroh! Mohotara nguan iyoh awi ikan ngoneh Tarung Pio cioh paluh porocaya ma Yesus.
6Aang cioh samah isan co tojadi ma Abraham. Oko co tonulih ponah Surat Borasih: “Abraham porocaya ma Mohotara. Poko tului iyoh, Abraham tomanggap bujur nyan ponoto Mohotara.”#3:6 Ingkan Kojadian 15:6. 7Jadi, kawan dulun co porocaya isan ciohboh iyoh co koturunan Abraham co bujur. Ikan sobulih paham onon. 8Aang cioh ocop tonulih ponah Surat Borasih ingkan sinan. Iyohonon Mohotara angar umpi dulun co bokon ma Yahudi jarin bujur nyan tohimo-Eh amun iroh porocaya. Tarung Pio cioh tomomborita ma Abraham ocu ondo sorinaieh. Santuh nai antun Mohotara ma eh co tonulih ponah Surat Borasih: “Kokon bangsa angar tomomberkat molalui iko.”#3:8 Ingkan Kojadian 12:3. Kokon bangsa tomomberkat awi Abraham porocaya bahawa Mohotara angar mihi orong koturunan indai eh. Ingkan uras koturunan eh, angar oko ico beti Laca co angar momorintah nyan hunyung umat Mohotara sokotahi-tahieh. Laca Co Tomonjanji Mohotara yoh iyohco Yesus. ‘Umat Mohotara’ yoh iyohco ingkan ‘kokon bangsa’ aroh baya ingkan bangsa Yahudi. Kokon dulun co porocaya ma Yesus tomomberkat awi iroh jarin umat Mohotara, iyohonon iroh tonyolamat ingkan hukuman dosa. 9Jadi, Mohotara momberkat kawan dulun co porocaya, samah isan Mohotara momberkat Abraham tului are porocaya.
10 Tapi, kokon dulun co baya monggantung kobolum eh ma Hukum Torat bolum minda ancaman hukuman. Awi oko tonulih ponah Surat Borasih: “Torancam hukuman kawan dulun co aroh horoholuh tuhit ma kokon co tonulih nyan ponah Hukum Torat.”#3:10 Ingkan Ulangan 27:26. 11Jelasleh bahawa dulun aroh jarin bujur nyan ponoto Mohotara tului cara tuhit ma Hukum Torat. Awi nyan ponah Surat Borasih mahi tonulih: “Kawan dulun co tomanggap bujur nyan ponoto Mohotara, iroh angar haba kobolum co tuu-tuu awi iroh porocaya.”#3:11 Ingkan Habakuk 2:4. 12Tapi cara bolum tuhit ma Hukum Torat aroko samah ma bolum tului porocaya. Kobolumeh bobeda awi, ‘kawan dulun co tuhit ma Hukum Torat angar bolum sosuai ma Hukum cioh.’ 13Ito aroh lian horoholuh tuhit ma kokon porintah Mohotara ponah Hukum Torat. Poko tului iyoh, ito angar buah hukuman. Tapi Kristus ocop mombebas ito ingkan ancaman cioh. Awi oko tonulih ponah Surat Borasih: “Mohotara mohukum dulun co tomaku nyan sompolaki”#3:13 Ingkan Ulangan 21:23. 14Yesus Kristus nguan iyoh, ina berkat co tomihi indan Abraham tomihi ka indan kawan dulun co bokon ma Yahudi. Jadi tului porocaya ma Yesus, ito mahi boraoi norima Roh co tomonjanji Mohotara.#3:14 Noto Kesah 2:16-18 hintang Yoel 2:28-29.
Janji Mohotara labih kuat hangki kawan poraturan
3:15-22
15konduang bakah bawe, akuh mihi cuntu co derek tomongalami kolunon. Misal eh, oko duo pihak co umpi ico pojanjian. Opah pojanjian cioh tomonsah, maka aroh ico beti mahi co lian ngomalang pojanjian cioh. Aroh ico beti mahi co boraoi nambah sosuatu hia ponah pojanjian cioh. Oluco pojanjian cioh baya nyan antara kolunon, pojanjian cioh aroh boraoi borubah. Nohani pojanjian ingkan Mohotara! 16Mohotara mihi kawan janji indan Abraham hintang indan koturunai eh. Surat Borasih aroh hapo antun ‘kawan koturunai eh’ awi arti eh aroh orong dulun. Co tonulih iyohonon ‘hintang ma koturunanmu.’ Antun co ‘koturunanmu’ artieh baya ico dulun, iyohonon Kristus. 17Maksud kuh santuh: Mohotara ocop topeleh houn monsah janji-Eh.#3:17 Oko orong janji co ihin indan Abraham ingkan Kojadian 12:3; 17:1-8; 18:28; 22:18; hcbb. Co tonekan eh nyan intoi iyohco janjin Mohotara ika nyolamat kawan dulun co porocaya ma Laca Co tomonjanji-Eh, iyohonon Yesus. Hukum Torat tomihi ma Musa opat latuh tolun pulu toun opah iyoh. Jadi, Hukum Torat yoh aroh lian ngomalang janjin Mohotara ingkan sinan. Janjin Mohotara yoh incah bolaku. 18Awi, soandaieh Mohotara mihi ome co tomonjanji-Eh indan dulun awi dulun cioh tuhit ma Hukum Torat. Maka pihi cioh aroh bat tului Mohotara monjanjieh. Tapi co bujur iyohco Mohotara mihi aang co pio hinut yoh indan Abraham malah awi Mohotara monjanjieh.
19Amun sanioh, ome balut gunai eh Mohotara mihi Hukum Torat indan Musa? Mohotara mihi Hukum Torat yoh ika to monau bahawa ito molangar kawan porintah Mohotara. Mohotara bomaksud ika Hukum Torat yoh tenden monjaga dapot waktu koturunan Abraham co tomonjanji Mohotara yoh dombut, iyohonon Yesus. Mohotara mihi Hukum Torat yoh hapo porantara kawan molekat co porapoteh ma ico beti dulun sobagai holang antara Mohotara hintang kolunon. 20Dulun co jarin holang morulu labih hangki ico pihak, tapi Mohotara iyohco ico.#3:20 Mungkin Paulus mombeda cara Mohotara mihi Hukum Torat hangki cara Are mihi kawan janji-Eh indan Abraham. Awi Mohotara aroko hapo holang kotika Are mihi kawan janji-Eh, artieh kawan janji-Eh meleh borohon hangki porentah hintang poraturan-Eh ponah Hukum Torat yoh. Tapi, oko tonga ahli Alkitab co bopikir ayai cotuh monjelas tintun Yesus. Are iyohco holang. Holang tomorulu nyan halo kolunon hintang Mohotara awi kokon dulun molangar porintah hintang poraturan-Eh.
21Mainboh onon borati bahawa Hukum Torat botentangan ma kawan janji Mohotara? Mositi aroh! Tapi Mohotara mihi Hukum Torat aroko ika mihi pombolum indan kolunon, maka artieh kolunon aroko boraoi tomanggap bujur nyan tohimo Mohotara ma nuhit Hukum Torat. 22Malah nyan ponah Surat Borasih tonulih bahawa kokon dulun nyan pindaondo tonguasa pian dosa. Poko tului iyoh, ome co tomonjanji Mohotara ma kawan dulun co porocaya ma Yesus Kristus yoh, ihi-Eh indan kawan dulun co porocaya.
Dulun co porocaya ma Yesus iyohco anak Mohotara
3:23–4:7
23Sorinai dapot waktueh ika porocaya ma Yesus, Hukum Torat yoh murung hintang monjaga ito samah isan dulun co monjaga ponjahat nyan seper. Ito tomurung dapot kotika Yesus yoh tomporahan. 24Jadi, Mohotara mihi Hukum Torat ika monjaga ito dapot Kristus dombut, iyohonon Yesus. Onon tojadi ina ito jarin bujur nyan tohimo Mohotara amun ito porocaya ma Yesus. 25Makitu, ocop waktueh ito lian porocaya ma-Eh. Awi iyoh, ito arohbat tomongawas pian Hukum Torat.
26Awi ikan porocaya ma Kristus Yesus, onon tuluieh ikan jarin kawan anak Mohotara. 27Kokom me co tomombaptis ponah aran Kristus. Ikan ocop norima Kristus samah ma dulun co hapo lembon co baa. 28Ikan uras jarin ico ponah Kristus Yesus. Mohotara aroh mombeda antara dulun Yahudi atawa dulun co bokon ma Yahudi; antara cipon atawa dulun bebas; antara bakah atawa bawe.#3:28 Mula kokon ito bobeda, tapi arelu oko kawan cara co bobeda ika ito tonyolamat ingkan hukuman dosa. Baya oko ico cara indan kokon dulun, iyohonon amun ito porocaya ma Yesus. Poko tului iyoh, ito mahi lian bolum ponah kohohico. 29Poko tului ikan tioh Kristus, maka ikan iyohco isan koturunan Abraham. Iyohonon ikan iyohco ahli waris co angar norima berkat co tomonjanji Mohotara ma Abraham.
Currently Selected:
Galatia 3: TBSS
Highlight
Copy
Compare
Share
Want to have your highlights saved across all your devices? Sign up or sign in
