BAEBURANIYA 2

Tuténdaa twákena ebununusi bwetu

1Bushi no'ku, twěmire kunde twásimika busese mwa mwasi ola tômvaa, tungesha kwábuka enjira. 2Emwasi we'Mwaso* ola ebamalaika* bábaláaa, ánachilosaa kwa análi wa kanangana. Na chira mundu ola uténdee wáira ngo'kwa àtechire, éndee áchinjibusibwa ngo'kwa binámwěmire. 3Rero tubano, kute tukáfufumuka ebuchinjibusi akaba tungénde twákena ebununusi bungana ngo'bu? Emyasi yo'bu bununusi, Enawetu yeine iwátangirisaa kubalira'i ebandu. Chasinda, ba béndee bômvirisa kwe'i myasi, nabo bera kunatubura kwa ináli ya kanangana. 4Na Ongo nai era kunde ánalosa kwe'bubei bwa'bu bandu bunáli bwa kanangana, kurengera ebimenyeso, ne'bishishalo ne'bisomerano bya njira sinene. Kanji áabirire ebandu enyembo se'Muchima Mubuya-buya, ngo'kwa ábaa ánahonda.

Yesu áfiraa ebandu boshi

5Anola, twáhambala era luulu se'butala bwa bukáika. Obu butala, Ongo atêresise ebamalaika* ebuashi bwe'kwîmangira'bo. 6Mwa Maanjiko Mabuya-buya, mundu muuma átetaa mbu:

«Ongo Tata, emundu àli nde, chasiya únde wámukengera?

Emwana we'mundu àli nde, chasiya únde wámulaa'ko?

7Wámubikaa era chibanda se'bamalaika* ku bihangi bieke.

Chasinda, wera kumweresa engulu na tunda linene.

8Wámweresise ebuashi era luulu se'bindu byoshi.»#2:6-8 Somaa Saburi 8:5-7.

Mango byátechibwa kwa Ongo êresaa emundu ebuashi era luulu se'bindu byoshi, kutáli chiro na kandu kasibya ka árekaa. Si chiro bacha, ebindu byoshi ngo'kwa bìri lwarero, tùtasene nga emundu ète ebuashi era luulu sabi byoshi. 9Si cha tusene'ko, chi chechine: Yesu ábikibwaa era chibanda se'bamalaika* ku bihangi bieke, chasiya kurengera ebonjo bwa Ongo, àlibusibwe na kwêchibwa bushi ne'bandu boshi. Rero kurengera olu lufu lwai, éresibwe engulu ne'tunda.

10Ongo iwábumbaa ebindu byoshi, kanji byoshi bìnali byai. Áirire Yesu kuba ola unálumirire kurengera emalibuko, chasiya àrete bana banene mwa bulangare bwa Ongo. Bushi Yesu iwénde wáisa ebandu kwa bununusi.

11Yesu iwénde wákomya ebandu bàtenge mwa bibi byabo. Yesu ne'bandu ba énde ákomya, boshi banáli bana ba Tata muuma. Bushi no'ku, Yesu àtafa honyi sa kuběrika mbu bàli banyakabo. 12Bushi àtechire mbu:

«E Ongo, nyingénde nábalikisa esina lyao era mwa banyaketu.

Nyingénde nákutonga mwa lubuanano lwe'bandu bao.»#2:12 Somaa Saburi 22:23.

13Kanji átechire mbu:

«Nyingénde náchinyiira Ongo.»#2:13 Somaa Isaya 8:17.

Kanji ánateta mbu:

«U'nyìri ano, ala'uma ne'bandu ba Ongo ányeresise kuba nga bana banyi.»#2:13 Somaa Isaya 8:18.

14Rero, bushi abu bana bàli bandu ba bète emubiri ne'mikira, chi chátumaa Yesu nai, ábaha kwa njira ye'mubiri ne'mikira kuuma nabo. Áiraa bacha, chasiya kurengera ekufa kwai, asíse Wamusimu, iwábaa wéte ebuashi bwe'kwîta ebandu. 15Ábolaa ne'bandu ba bábaa bàli nga tuungu* mwa kalamo kabo koshi, bushi ne'kwôbaa elufu. 16Kubinali, Yesu atábahaa kuasa ebamalaika*, si ábahaa kuasa elubuto lwa Aburahamu. 17Bushi no'ku, byábaa binámwemire ahúhe banyakabo mwa myasi yoshi. Mwa bacha, érire ába Mukulu-kulu we'bakuhanyi* ola wète chamba, kanji ola ùngachinyiirwa mwa mulimo wa Ongo, chasiya ebibi bye'bandu bibábalirwe. 18Kanji bushi yeine áerekibwaa na kulibusibwa, àngaala kunde áasa ba bénjire báerekibwa.

Currently Selected:

BAEBURANIYA 2: tbt

Highlight

Copy

Compare