BAEBURANIYA 3

Yesu i'mukulu-kulu kurenza Musa

1Banyaketu, Ongo ábamaere kanji ábairire kuba bandu bai kuuma netu. Bushi no'ku, mundaa mwáanyisa busese era luulu sa Yesu, iwátumwaa na Ongo, kanji i'Mukulu-kulu we'bakuhanyi* we'bwemeresi bwa twénde twáhubanganyisa ebandu. 2Ábaa àli wakúchinyiirwa era muhondo sa Ongo iwámubikaa mwa mulimo, ngo'kwa Musa ábaa àli wakúchinyiirwa mwa nyumba ya Ongo yoshi. 3Si chiro bacha, Yesu iwěmire kuya ngulu busese kurenza Musa. Bushi emundu ola wáimba enyumba iwénde wéresibwa etunda busese kurenza enyumba era áimba. 4Kubinali, chira nyumba inátusa ola wáimbaa'i, si Ongo iwáimbaa byoshi. 5Musa ábaa mukosi ola wêmire kuchinyiirwa mwa nyumba ya Ongo yoshi, chasiya ǎne ebubeyi era luulu se'myasi era Ongo ábaa akáteta era nyuma. 6Si Kirisito iwěmire kuchinyiirwa nga Mwana ola wèmangirire enyumba ya Ongo. Rero tubano, tu tùli ei nyumba, akaba tùngaendekera kusesa emuchima na kumoera emunyiiro ola tutúsa.

Ebandu ba bêmerere bu bakêngirira mwa chisiki che'kutamukira

7Rero, kukulikana no'kwa eMuchima Mubuya-buya áteta mbu:

«Lwarero akaba mùngomva emurenge wa Ongo,

8mùtairaa emichima yenyu kuba isibu,

ngo'kwa bahokulu benyu báiraa mango bánanaa kuira bya Ongo àtechire,

kwo'lwa lusuku mango bámuerekaa mwa buyeye*.»

9Kanji Ongo àtechire mbu:

«Chiro angaba mbu bahokulu benyu báchiloreraa kwa byoshi bya náiraa ku myaka mane mwa buyeye*,

si bányierekaa chasiya balóle cha nyingáira.

10Bushi no'ku, abu bandu be'si suku, nera kwire násibukira'bo,

nera kuteta mbu:

‹Bano bandu, emichima yabo yénde yêngeerwa esuku soshi,

bátamenyerera na bya náhonda bénde báira.›

11Rero mwo'bu busibuke bwanyi, nera kulaisa mbu:

‹Bátakengirire chiro na hicha mwa chisiki che'kutamukira cha nábakunganyisise!›»#3:7-11 Somaa Saburi 95:7-11.

12Rero, banyaketu muményaa! Mwakachi-kachi kenyu mùtabaa chiro na mundu ola úndaa wáata muchima mubi we'kútemerera, kuikira echihangi áya bure na Ongo i'utúla Muuma-uma. 13Si mundaa mwásesanya emichima chira lusuku, mango chine chinwa «lwarero» cha chìtechirwe, chichiri chitwêrekere. Mwa bacha, ebibi bìtangende byáchibêngeera, no'mwa kachi-kachi kenyu mutáchibe mundu ola wáata matwi masibu. 14Bushi tubano twákola na Kirisito, akaba tùngalanga emunyiiro ola twábonaa mwa ndangiriso ye'bwemeresi bwetu, kuikira kwa businda. 15eMaanjiko Mabuya-buya matúla màtechire mbu:

«Lwarero, akaba mùngomva emurenge wa Ongo,

mùtairaa emichima yenyu kuba isibu,

ngo'kwa bahokulu benyu báiraa, mango bánanaa kuira bya Ongo àtechire.»#3:15 Somaa Saburi 95:7-8.

16Bandu bachiye bu béndee bômva kwa murenge wa Ongo, na bánana kuira bya àtechire? Si banáli ba bandu boshi ba Musa ábaa emángirire ábakula mwa chio che'Misiri! 17Kanji bandu bachiye bu básibusaa Ongo ku miaka mane? Si banáli ba bandu ba báiraa ebibi, na báfira mwa buyeye*! 18Kanji bandu bachiye bu Ongo álaisisaa mbu batákêngirire mwa chisiki che'kutamukira'mo cha ábakunganyisise? Si banáli ba bandu ba bánanaa kuira bya àtechire! 19Kubinali, tuséne kwa abu bandu batáalaa kwêngirira mwe'chi chisiki che'kutamukira, bushi ne'kutemerera kwabo.

Currently Selected:

BAEBURANIYA 3: tbt

Highlight

Copy

Compare