BAEBURANIYA 13
13
Mibere era ìsimise Ongo
1Muéndekeraa kunde mwásimana nga bauma. 2Mutébiriraa kunde mwáhuukasa ebaenyi kubuya.#13:2 Bakirisito banene béndee bábalama bushi ne'chinwa cha Ongo, mwa bio bya Baroma bábaa bèmire'mo. Rero, akaba bàtangenjire báhuukasibwa na bakirisito balikabo, ekubalama kwabo kungénjire kwasibuwa busese. Bushi mwa kuira bacha, bandu bauma báhuukasaa ebamalaika* busira kumenya.#13:2 Somaa Ndangiriso 18:1-8; 19:1-3. 3Mundaa mwákengera ebandu ba bàminyirwe, mwa kunde mwáchitola nga ba bàminyirwe ala'uma nabo. Mundaa mwákengera na ba bálibusibwa, mwa kunde mwáchitola nga ba bálibusibwa kuuma nabo.
4Ebuya bwěmire kunde bwátunjibwa ne'bandu boshi. Emulume na mukai batěmire kunde báya mwa mbuwa. Bushi Ongo akáchinjibusa ba bénde báya mwa mbuwa no'ku bera bàhweranyire, ánachinjibusa ne'bashimba ba bénjire báira elusingi.
5Muténdaa mwáchirekerera kuba mwa bucha bwe'kusima ebuteya busese. Si mundaa mwámoera bya mwéte. Bushi Ongo yeine átetaa mbu:
«Ndákakulikulire chiro na hicha, nesi ndákakurekerere chiro na hicha.»#13:5 Somaa Bukengere 31:6, 8; Yoshuwa 1:5.
6Bushi no'ku, tùngaala kunde twáteta na bushiru bunene mbu:
«Enawetu iwénde wányitabala! Ndàngobaa kandu!
Chiye che'mundu ànganyiira?»#13:6 Somaa Saburi 118:6-7.
7Mundaa mwákengera ebemangisi benyu, ba bábahubanganyisaa eChinwa cha Ongo. Mundaa mwálola kubuya kute béndee báchitola mwa kalamo kabo no'kwa béndee báfa. Mundaa mwêya ebwemeresi bwabo. 8Yesu Kirisito anátula i'no'yu i'no'yu: mwe'olo, na lwarero, ne'suku ne'mango.
9Muténdaa mwêngeerwa na chira myasi yoshi ya cheenyi era bénjire ba bakángirisa. Emichima yetu yěmire kunde yásimika kurengera ebonjo bwa Ongo, si atá kwa kutunda emiomba* era yèrekere ebiryo. Ei miomba*, ìtafuraa kuata chiro na mufa asibya kwa ba bénjire bátunda'i.
10Tubano, twéte eketu kahaha ke'mitulo*. Ne'bakuhanyi* be'Bayuta, ba bénde bákola mwa Chisiki Chibuya-buya* batéte eloso lwe'kulya mwango kwa bindu bya byénjire byátulwa kwa'ko kahaha*. 11eMukulu-kulu we'Bakuhanyi* énde eka emikira ye'nyama mwa Chisiki Chibuya-buya busese* chasiya ǎne'i kuba mitulo* bushi ne'kubabalira ebibi. Si enyama yoshi yénde yáya kusiresibwa bure ne'musi.#13:11 Somaa Balawi 16:27. 12Echera chi chátumaa Yesu nai áfira bure ne'musi, chasiya akómye ebandu bai kurengera emikira yai yeine. 13Rero, netu tuyáa era àli, bure ne'musi, twémereraa kukenyibwa ngo'kwa nai ánakenyibwaa. 14Bushi muno butala, tutéte musi ola ukáendekera kuba'o esuku ne'mango. Si emusi ola ukábaha itwáhonda.
15Rero kurengera Yesu, túndaa twéresa Ongo emitulo* ye'kumutonga esuku soshi, kukuteta mbu túndaa twábura ebandu kwa tubano tutúla twemérere esina lyai. 16Kanji muténdaa mwébirira kukorerana emabuya na kunde mwáasanya. Bushi emitulo* era iri nge'i, yénde yásimisa Ongo.
17Mundaa mwátunda ebemangisi benyu, na kunde mwáira bya babábwirire. Abola bu bénde bálanga emichima yenyu, bushi Ongo akábusa'bo era luulu se'mulimo ola bákolaa. Akaba mùngende mwátunda'bo, bangákola emulimo wabo na lumoo lunene. Si akaba mùtangende mwátunda'bo, bangákola'o na businane. Ne'kukola'o bacha, kutábaachire chiro na mufa asibya.
18Mundaa mwátwemera. Twìshi kanangana kwa mwa michima yetu mutáli chiro na chibi chisibya cha twénjire twáchisitaka'ko, bushi twáhonda túnde twâta myanya ibuya mwa myasi yoshi. 19Náběma busese mwémaa Ongo, nyihúbe kuika eyi mwenyu fuba.
Memo
20Ongo iwénde wátweresa ebôlo. Ômwolaa Enawetu Yesu mwa bafu. Oyu Yesu i'Mulanzi Munene we'mbuli. Ne'mikira yai, iyáirire echilaano* che'suku ne'mango ala kachi-kachi ke'bandu na Ongo. 21Ongo éndaa áberesa ebuashi bwe'kuíra chira mwasi mubuya, chasiya múnde mwáira ekuhonda kwai. Kanji éndaa áira bya bimúsimise mwa ndanda setu kurengera Yesu Kirisito. Yesu éndaa átongibwa esuku ne'mango. Bibe bacha!
Emyasi isinda ne'kulaana
22Banyaketu, náběma busese, mǔmvaa kubuya ene myasi nàbaanjikirire kwa kubasesa emuchima. Bushi nàbaanjikirire'i kwa kunêshangira.
23Náhonda nyìbakengese kwa munyaketu Timoteo àboolibwe mira. Akáika fuba, nyingábaha tunai kuya kubatangula.
24Munyíkesesaa ebemangisi benyu boshi, ala'uma ne'bandu ba Ongo boshi. Banyaketu bo'mwa chio che'Italiya, babákesise.
25Ongo éndaa ábaahanyira muboshi!
Currently Selected:
BAEBURANIYA 13: tbt
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc.
