BAEBURANIYA 12

Ongo énde ákemera ebana bai

1Rero, tùsungwirwe na luamba lunene lwa'bu béndee bálosa ebwemeresi bwabo. Bushi no'ku, netu turékanaa loshi ne'bindu byoshi bya bìngatuma tútaendekera era muhondo, twánarekana ne'bibi bya byénjire byátwangika fuba. Aola, twánere twálibita na bushiru bunene mwa kaimano ka twerésibwe.

2Túndaa twásindera Yesu, i'shokororo ye'bwemeresi bwetu, kanji iwénde wáira obu bwemeresi bwetu kuba bwa bunálumirire. Yeine êmereraa kufa kwa musalaba, busira kulaa kwa honyi sa sìtenganyire ne'lufu lwa lùli ngo'lu. Áiraa bacha, bushi ábaa èshi kwa àbikirirwe lumoo. Na lwarero ékese kwa lunda lwe'malyo me'ndebe ya Ongo.

3Mundaa mwákengera kute Yesu ásesaa emuchima, mango ebandu be'bibi bámuhombaa. Bushi no'ku, muténdaa mwátama nesi mwáfunyika emichima. 4Bushi ebita bya mwálwa kwa kuima ebibi, mùtasa kulwa'bi kuikira kwa lufu. 5Mwébirire line eano Ongo áberesaa nga bana bai?

«Mwana wanyi, mango Enawetu ákukemera,

uténdaa wákena oku kukemera kwai.

Nesi uténdaa wáfunyika emuchima, mango ákukaliira.

6Bushi Enawetu énde ákemera emundu ola asímire,

kanji énde áhuta chira mundu woshi ola èshi kwa àli mwana wai.»#12:5-6 Somaa Mianyi 3:11-12.

7Mundaa mwásesa emuchima mwa malibuko mango mwákemerwa, bushi Ongo énde ábatola nga bana bai. Nde mwana ola ùtakemerwa ne'she? 8Akaba Ongo àtangabakemera, ngo'kwa énde ákemera ebana bai boshi, kukuteta mbu mutá bana bai kanangana, si mùli bana bo'mwa mbuwa. 9Tùkengeraa, ebatata bo'muno butala, mango béndee bátukemera, twéndee twátunda'bo. Rero, Ongo Tata wo'kwa nguba i'twěmire kunde twátunda busese, chasiya tuáte ekalamo.

10Abu batata, béndee bátukemera ku suku sieke kukulikana no'kwa bahónjire. Si Ongo Tata, yeke énde átukemera kwa mufa wetu, chasiya tube babuya-buya kuuma nai. 11Echihangi ebandu bákemerwa, chìtatula cha lumoo, si chitúla cha businane. Si kwa businda, ba bakángirisibwaa mwo'ku kukemerwa, bénde bába bandu ba bàtungenene, na mwe'i njira bánaata ebôlo mwa kalamo kabo.

12Bushi no'ku, muhúbaa kusesa emino senyu sa sitámire, mwánasesa ne'mafi menyu ma matámire. 13Muchikunganyisaa enjira sa silámbukere, chasiya emundu ola urémere emaulu àtachilabukaa, si alámisibwe.

Muténdaa mwánana kûmvirisa Ongo

14Muchisesaa kunde mwába mwa bôlo ne'bandu boshi, na kuba babuya-buya mwa kalamo kenyu. Bushi busira kuba mwo'bu bubuya-buya, kutáli ola ukálola ku Enawetu. 15Muményaa! Kùtabaa chiro na mundu ola wárekana ne'bubuya bwa Ongo! Nesi kùtabaa mundu ola ulí nga mwaka, ola wénde wéka ebifuma bya byálula, na kureta ekafango mwa kachi-kachi kenyu, na kwáukisa ebanji.

16Kanji muményaa! Kùtabaa chiro na muuma mu mwabo ola úndaa wáira elusingi. Kanji muténdaa mwákena ebindu bibuya-buya, nga Esau iwáusaa engahanyi sai se'kuba fula, bushi na kalyo kaeke oshâo. 17Si mwìshi kwa era nyuma se'bi, mango ábaa era áhonda eshe àmuahanyire, eshe era kunana. Ábaa àtachete njira ya kubindula emwasi ola áiraa, chiro angaba mbu áhondaa esi ngahanyi mwa kulira.#12:17 Somaa Ndangiriso 25:29-34; 27:30-40.

18Mango mwabo mwáikiriraa ofu na Ongo, mutáikaa ofu na ndulungu era ìngaumibwa'ko ngo'kwa eBaisiraeli báikiriraa ofu ne'ndulungu ye'Sinai. Kwe'i ndulungu kweke, kwábaa kwákorera marunga ma muliro, kwábaa kuli musimya téndere, kanji kwábaa kwárenga kausi kasibu. 19Bômvaa ku murenge wa kaperere na murenge ola wáruruma busese. Mango eBaisiraeli bômvaa kwo'yu murenge wa Ongo, bera kumwěma busese mbu àtachihubaa kubabura chinwa.#12:19 Somaa Kutenga 19:16-19. 20Bátetaa bacha, bushi batáalaa kútunda ono muomba* bêresibwaa mbu: «Chira mundu woshi ola ungáuma kwe'ne ndulungu, ěchibwaa mwa kumuúmanga emakoi, na chiro mbu chìngaba chifuana.»#12:19-20 Somaa Kutenga 19:12-13. 21Ei myasi bálolaa'ko, yábaa ya kwôbairisa busese, kuikira echihangi Musa áteta mbu: «Nákukumana ne'buba!»#12:21 Somaa Bukengere 9:19.

22Si mwabo, mwáikirire ofu ne'ndulungu ye'Sayuni, kanji ofu ne'musi wa Ongo i'ùli muuma-uma. Óyola àli emusi we'Yerusalemu yo'kwa nguba, kwa ebyumbi ne'byumbi bye'bamalaika* babúananyire mwa linye. 23Mwáikirire mwa lubuanano lwe'lumoo lwe'fula sa Ongo, sa masina mabo mǎnjikirwe kwa nguba. Kanji mwáikirire ofu na Ongo, i'utúla muisha manja we'bandu boshi. Kanji mwáikirire ofu ne'michima ye'bandu ba báfire mira, ba bábaa bàtungenene, kanji ba Ongo áirire kuba bandu ba bàlumirire. 24Mwáikirire ofu na Yesu iwénde wábika ebandu mwa buuma na Ongo, kurengera echilaano chiyayaya. Kanji mwáikirire ofu ne'mikira yai era yásheshekalaa, era yáteta kubuya kurenza emikira ya Aberi.#12:24 Anola, bàhambere kwa emikira ya Aberi yábaa yéma Ongo mbu àifúnaa. Somaa Ndangiriso 4:10. Si emikira ya Yesu, yeke yéma Ongo mbu éndaa ábabalira ebandu.

25Rero, muményaa! Muténdaa mwánana kûmvirisa Ongo iwáteta nenyu. Bushi eBaisiraeli ba béndee bánana kumumvirisa, iwéndee wéresa'bo emáno muno butala, bàtafufumukaa emalibuko. Tubano, Ongo iwénjire wátweresa emáno kutenga kwa nguba. Mùtasene kwa echera chálosa changanama kwa netu akaba tùngende twánana kumumvirisa, tutákafufumuke amu malibuko?

26Kwa mira, emurenge wa Ongo éndee álingitanya ebutala. Si lwarero, átulaanyise mbu: «Nyingáhuba kulingitanya ebutala linji euma, atá ebutala bweine si ne'nguba nai!»#12:26 Somaa Hakai 2:6. 27Chine chinwa «linji euma» chilósise kwa ebindu bya byábumbwaa bingálingitanyisibwa, na byáirima. Mwa bacha, ebindu bya bìtangalingitanyisibwa bi bikáendekera kuba'o esuku ne'mango.

28Rero túndaa twáteta mbu akoko era mwa Ongo, bushi iwátweresise ebwami bwa bùtangalingitanyisibwa. Oku kuteta mbu akoko, túndaa twálosa'ko mwa kumukorera mwa njira era imúsimise, ala'uma ne'kumutunda ne'kumwôbaa. 29Bushi «Ongo wetu atúla nga muliro ola wénde wásiresa!»#12:29 Somaa Bukengere 4:24.

Currently Selected:

BAEBURANIYA 12: tbt

Highlight

Copy

Compare