BAEBURANIYA 11

Ebwemeresi

1Ekuata ebwemeresi mu Ongo, kùli kuata ekanangana ke'bindu bya mundu alángalire. Kanji kùli kwêmerera kanangana kwa bya bitaséneke'ko bìtula'o. 2Obu bwemeresi, bu bwéndee bwátuma bahokulu básimisa Ongo.

3Ebwemeresi bu bwénde bwátuma twámenyerera kanangana kwa Ongo ábumbaa byoshi kurengera echinwa chai. Mwa bacha, ebindu bya bìseneke'ko byáirwaa kutengera kwa bya bìtaseneke'ko.

4Ebwemeresi bwa Aberi bu bwátumaa êresa Ongo emitulo* era ìkomire busese, kurenza era ya Kaini. Obu bwemeresi bwai, bu bwátumaa Ongo ámutola nga mundu ola ùtungenene, bushi Ongo ámoeraa emitulo* yai. Kanji obu bwemeresi bwa Aberi bu bwátuma emyasi yai ichiri yómvikala, chiro mbu áfire mira.#11:4 Somaa Ndangiriso 4:3-10.

5Ebwemeresi bwa Enoki bu bwátumaa érusibwa kwa nguba busira kufa. Kutali chiro na mundu asibya ola wáchihubaa kumulola'ko, bushi Ongo ábaa àmwerusise mira kwa nguba. eMaanjiko Mabuya-buya matúla màtechire mbu era muhondo Enoki érusibwe kwa nguba, éndee ásimisa Ongo.#11:5 Somaa Ndangiriso 5:24.

6Kutali mundu ola ùngaala kunde ásimisa Ongo akaba atéte ebwemeresi. Bushi ola wáhonda kuchifunda ofu na Ongo, ěmire kwêmerera kwa Ongo àli'o, na kwêmerera kwa Ongo énde êresa ba bámuhonda elwêmbo.

7Ebwemeresi bwa Nowa bu bwátumaa átunda emyasi era Ongo ámuburaa era luulu se'bya byábaa byěmire kuika, bya byábaa bìtasa kulorekana'ko. Era kwânga emashuwa kwa kununula engumo yai. Mwa bacha, mu áchinjibusaa ebandu bo'mwa butala. Kanji obu bwemeresi bwai, bu bwátumaa Ongo ámutola nga mundu ola ùtungenene.#11:7 Somaa Ndangiriso 6:13-22.

8Ebwemeresi bwa Aburahamu bu bwátumaa áira bya Ongo ámuburaa, mango ámwamaalaa. Era kuya mwa chio cha Ongo ábaa ěmire kumweresa kuba mwandu. Era kunáenda busira kumenya era áya.#11:8 Somaa Ndangiriso 12:1-5. 9Ebwemeresi bwai bu bwátumaa ékala nga mubunga mwa chio cha Ongo ámulanyaa. Era kubera mwa hema, ngo'kwa Isaka, na Yakobo bánaberaa'mo. Abola nabo, Ongo ánêresaa'bo echi chiraane.#11:9 Somaa Ndangiriso 23:4; 35:12, 27. 10Aburahamu ábaa álinjira kwíkala mwa musi ola wímbirwe kwa musingi ùkoochire busese. Oyu musi, Ongo yeine iwáataa emianyisa kute àngaimbwa kanji iwánaimbaa'o.#11:10 Emusi ola bàhambere'ko anola, àli emúsi we'Yerusalemu iyayaya. Somaa emulongo wa 16 na 12:22.

11Ebwemeresi bwa Sara, muka Aburahamu#11:11 Ono mulongo wa 11, kuli bandu bauma ba batúla bòmvire'o mbu àhambere era luulu se'bwemeresi bwa Aburahamu. bu bwátumaa Ongo ámweresa ebuashi bwe'kubuta emwana, chiro angaba mbu ábaa era mweekulu busese kanji ábaa atúla ngumba. Ábaa anêshi kanangana kwa Ongo énde áira bya álaanyaa.#11:11 Somaa Ndangiriso 18:11-14; 21:2. 12Rero, kurengera Aburahamu iwábaa wáhonda kufa, kwera kubuchibwa mbaa sinene busese nga ngununu so'kwa nguba, kanji nga mishee yo'kwa musike se'nyanja, era ìtangaanjibwa.#11:12 Somaa Ndangiriso 15:5; 22:17; Isaya 51:2.

13Abu bandu boshi, báfaa běte ebwemeresi mwa ndanda sa Ongo. Bátabonaa ebindu bya Ongo álanyaa'bo. Si bábiloreraa'ko marerere, na kumoera'bi. Bátetaa changanama mbu bàli baenyi kanji barenganjira muno butala.#11:13 Somaa Ndangiriso 23:4; 1 Myasi ye'suku 29:15; Saburi 39:13. 14Abu bandu mwa kuteta bacha, bálosa kanangana kwa báhonda echabo chio. 15Akaba bàngenjire báfula echio cha bátengaa'mo, kutáli cha chìngabângikire ekufuluka'mo. 16Si kanangana echio cha chikomire busese kurenza echera, chi bábaa báhonda, kukuteta mbu echio cho'kwa nguba. Bushi no'ku, Ongo àtafa honyi sa kwérikibwa mbu àli Ongo wabo. Kanji ákunganyisise'bo mira emusi.

17-18Ebwemeresi bwa Aburahamu bu bwátumaa âna muala wai Isaka kuba mitulo* ya kusiresibwa, mango Ongo áerekaa ebwemeresi bwai. Ongo ábaa ámulaanyise mira mbu: «Kurengera Isaka ku ukábona enyibuto sa nákulaanyaa.» Si chiro bacha, Aburahamu ábaa ànêmerere kwâna oyu mwana wai we'chihwa.#11:17-18 Somaa Ndangiriso 21:12. 19Aburahamu ábaa anêshi kanangana kwa Ongo éte ebuashi bwe'kômwola Isaka mwa bafu. Bushi no'ku, Ongo era kumufulusisa oyu mwana wai, era kunába ngo'la wòmwokire mwa bafu.

20Ebwemeresi bwa Isaka bu bwátumaa áahanyira Yakobo na Esau kukulikana ne'myasi era ikábaikira.

21Ebwemeresi bwa Yakobo bu bwátumaa mango ábaa áhonda kutowa emuchima, áahanyira ebana babiri ba Yosefu. Era kwêyamira kwa chikoma chai, na era Ongo.

22Ebwemeresi bwa Yosefu bu bwátumaa mango ábaa áhonda kutowa emuchima, áteta era luulu se'chihangi cha Baisiraeli bakátenga mwa chio che'Misiri. Era kueresa'bo emiomba* era luulu se'makinya mai.#11:22 Somaa Ndangiriso 50:24.

23Ebwemeresi bwe'basere ba Musa bu bwátumaa bámala myesi ehatu bàmubishire era nyuma se'kubuchibwa kwai. Báiraa bacha, bushi bálolaa kwa àli mwana ola wéte huhe lya lìkomire busese, kanji bàtôbaa emuomba* wa mwami we'Misiri.

24Ebwemeresi bwa Musa bu bwátumaa mango ábaa era mundu aséne, ánana kunde érikibwa mbu àli muala wa mwali wa mwami we'Misiri. 25Era kulondola ekulibukira ala'uma ne'bandu ba Ongo, wakúchimoeresa mwa bibi ku bihangi bieke. 26Álolaa kwe'kukenyibwa ngo'kwa Masiya* ákenyibwaa, ku kwète mufa munene busese kurenza ebuare bwe'Misiri. Áiraa bacha, bushi ábaa àbikire emuchima kwa lwêmbo lwa Ongo akámweresa.

27Ebwemeresi bwa Musa bu bwátumaa átenga mwa chio che'Misiri busira kwôbaa ebukali bwa mwami. Ásimikaa busese nga mundu ola uséne ku Ongo no'ku Ongo àtalorekana'ko. 28Ebwemeresi bwai bu bwátumaa ába mubere kutangirisa elusuku lukulu lwe'Pasaka*. Kanji era kubura eBaisiraeli mbu bamámairisaa emikira ye'mbuli kwa nyisi se'nyumba sabo, chasiya mango emalaika* ola wénde wásikya ebandu angárenga, àtetaa efula se'Baisiraeli.

29Ebwemeresi bwe'Baisiraeli bu bwátumaa báhabuka enyanja ye'Mwola nga bandu ba bárenga kwa chitaka ala àkalire. Si mango besha Misiri báerekaa kurenga'o, beke bera kusika.#11:29 Somaa Kutenga 14:21-31.

30Ebwemeresi bu bwátumaa elusimbo lwa lwábaa lusungwire emusi we'Yeriko lwákunduka, mango eBaisiraeli bábaa bera bàsungulaa'lo ku suku sirinda.#11:30 Somaa Yoshuwa 6:12-21.

31Ebwemeresi bwa Rahaba, cha chihungukasi, bu bwátumaa átasikira ala'uma ne'bandu ba bánanaa kuira kwa Ongo àtechire. Bushi yeke áhuukasaa eBaisiraeli mwa bôlo, ba bátumwaa kubusirisa emyasi ye'chio.#11:31 Somaa Yoshuwa 2:1-21; 6:22-25.

32Rero chi nyihúbaa kuteta? Ebihangi byanyíkeere bye'kuteta era luulu sa Kiteoni#11:32 Somaa Baishi be'manja 6–7. , na Baraka#11:32 Somaa Baishi be'manja 4–5., na Samusoni#11:32 Somaa Baishi be'manja 13–16., na Yefuta#11:32 Somaa Baishi be'manja 11–12., na mwami Tauti#11:32 Somaa 1 Samweri 16:1–31:13; 1 Bami 1:1–2:11., na Samweri#11:32 Somaa 1 Samweri 1:1–25:1., ne'barebi*. 33Ebwemeresi bwa'bu bandu bu bwátumaa báima ebio bye'banji bami, na kunde báira bya bìtungenene, na kubona bya Ongo álanyaa. Báminaa emonu me'ngoromoli, 34na kusimya emarunga me'muliro, na kufufumuka kwîchibwa mwa bômbo. Bábaa bàinyire emisi, si bera kuba banyake. Bera kuba ndwali mwa bita kuikira echihangi bákolokanya ebasula be'binji bio. 35Ebwemeresi bu bwátumaa bakasi bauma báhuba kulola kwa bafu babo bômwolibwa na kuhuba kubàfulusisa'bo bera bàli bauma-uma.

Ebanji béndee bálibusibwa busese kuikira kwa chihangi bêchibwa, si bera kunde bánana kuboolibwa. Bábaa báhonda bǒmwolibwe mwa bafu, bàbone kanji kalamo ka kàkomire busese. 36Ne'banji béndee báshekerwa na kupundwa busese ne'tuchi. Ne'banji bera kunde báminwa ne'minyororo na kuumwa mwa buroko. 37Ne'banji bera kunde bêchibwa mwa kuhutwanga emakoi. Ne'banji bera kunde báishibwa'mo kabiri mwa sii. Ne'banji bera kunde bêchibwa mwa bômbo.

Béndee bálua-lua běmbese enyuu se'mbuli, nesi enyuu se'mbene. Béndee bába mwa bukene, na kulibusibwa, na kunde bákorerwa emabi. 38Ebandu babuya ba bàli nga'bu, bábaa bàtemire kuba mwo'buno butala! Béndee bálua-lua mwa buyeye* no'mwa miruko, na kwíkala mwa nyikunda no'mwa fumbi mwa chitaka.

39Abu bandu boshi bémererwaa era muhondo sa Ongo, bushi ne'bwemeresi bwabo. Si chiro bacha, batábonaa bya Ongo álaanyaa'bo. 40Bushi Ongo ábaa átukunganyisise mira bindu bya bikomire busese. Echera chi chátumaa bátaba bandu ba bàlumirire busira tubano.

Currently Selected:

BAEBURANIYA 11: tbt

Highlight

Copy

Compare