BAEBURANIYA 10
10
Kirisito i'mitulo ye'kanangana
1eMwaso* wa Musa chináli chimbusa che'mabuya ma makáika, si atá kukalorero kanangana ka kálosa amu mabuya. Bushi no'ku, eMwaso* àtangaala chiro na hicha kuira ebandu kuba ba banálumirire, ba báhonda kuchifunda ofu na Ongo, kurengera emitulo* era yénde yânyibwa chira mwaka. 2Akaba ba bénjire bêra Ongo mwe'i njira, bàngakomisibwe* ebibi byabo eri ne'uma oshâo, bàtangénjire báchiribukira mwa michima bushi ne'bibi byabo. Aola, ei mitulo* bàngarekire kunde bâna'i. 3Si oku kwâna ei mitulo* chira mwaka, kwénde kwákengesa ebandu ebibi byabo. 4Bushi emikira ye'banzi ne'ye'bikolya, ìtangaala kukula ebibi.
5Bushi no'ku, mango Kirisito ábaa àli mu kubaha muno butala, áburaa Ongo mbu:
«Woyo, ùtasima mbu ebandu bakútulaa mitulo*.
Si wányǐmbasaa emubiri.
6Utámoeraa mitulo* ya nyama sa sìsiresibwe,
nesi mitulo* ya kubabalira ebibi.
7Nera kwire náteta mbu:
‹Únyìri ano, Ongo Tata nàbahire kuira ekuhonda kwao,
kukulikana no'kwa byǎnjikirwe era luulu sanyi mwa chibungo che'chitabo.›#10:5-7 Somaa Saburi 40:7-9. »
8Kirisito átetaa tanga mbu: «Ùtasima nesi ùtamoeraa mbu ebandu bakútulaa mitulo*, nesi mitulo* ya nyama sa sisiresibwe*, nesi mitulo* ya kubabalira ebibi.» Átetaa bacha, chiro angaba mbu ei mitulo* yoshi yéndee yânyibwa kukulikana no'kwa Mwaso* atúla àtechire.
9Chasinda, era kwire áteta mbu: «Únyìri ano, nábahire kuira ekuhonda kwao.» Mwa bacha, áhandwire ei emitulo* ibere-bere na kúinganya ne'kuchana kwai yeine. 10Yesu Kirisito áiraa ekuhonda kwa Ongo, era kuchâna yeine kuba mitulo* euma oshâo. Mwa bacha, ebibi byetu byákulibwe, chasiya tube bandu ba bàkomisibwe*.
11Chira kuhanyi* énde êmanga chira lusuku kwa kukola emulimo we'kwera Ongo. Chira mango, énde âana ei mitulo* inei-inei, si ei mitulo* ìtangaala kukula ebibi chiro na hicha.
12Si Kirisito yeke, átulaa mitulo* yiuma oshâo bushi ne'bibi. Chasinda, era kwire áya kwíkala esuku ne'mango kwa lunda lwe'malyo ma Ongo. 13Rero aola, álinjirira kuikira Ongo aíre ebarenda bai kuba chisimachiro chai. 14Kurengera ei mitulo* yiuma era átulaa, áirire ebandu ba bàkomisibwe* kuba ba bàlumirire esuku ne'mango.
15eMuchima Mubuya-buya, nai énjire ánateta mbu ei myasi ináli ya kanangana. Átetaa tanga mbu:
16«Enawetu àtechire mbu:
Chechine chi chilaano* nyingáira nabo mwa suku sa sěshire:
Nyingábika eMwaso* wanyi mwa emichima yabo,
na kwanjika'o mwa mianyisa yabo.»#10:16 Somaa Yeremiya 31:33.
17Kanji àtechire mbu:
«Ndákanachikengere ebibi byabo,
nesi emabi mabo chiro na hicha.»#10:17 Somaa Yeremiya 31:34.
18Rero, mango ebibi byénde byába byàbabalirwe, kùtachiba myasi ya kwâna mitulo* kwa kukula'bi.
Ongo énde áira bya álanyaa
19Banyaketu, twera twéte ebuhuru bwe'kwêngirira mwa Chisiki Chibuya-buya* busese kurengera emikira ya Yesu. 20Átuboorere njira iyayaya ya kalamo era ìulukanyire mwa ngwaya era yábaa yáhumba mwa luhu lwa Ongo, kukuteta mbu emubiri wai yeine. 21Kanji twera twéte eMukulu-kulu we'bakuhanyi* ola wìmangirire enyumba ya Ongo. 22Emichima yetu yákomisibwe* kutenga mu chira mianyisa ibi era yénde yátulibusisa mwa ndanda. Ne'mibiri yetu yálongibwe mwa meshi ma màtatwangire. Bushi no'ku, túndaa twáchifunda ofu na Ongo na muchima muuma, na kuata bwemeresi bwa bùlumirire. 23Túndaa twásimika busese mwa munyiiro ola twénde twáteta era luulu sao era muhondo se'bandu busira kutama, bushi Ongo énde ánaira bya álanyaa. 24Kanji túndaa twáanyisa kute ku tùngeresanya emisi, mwa kunde twásima ebandu no'mwa kuira emabuya. 25Tùtarekaa kunde twáika kwa nyibuanano se'bemeresi, ngo'kwa bandu bauma batúla bàkomere. Si túndaa twásesanya emichima busese, bushi ngo'kwa munásene, elusuku lwe'kufuluka kwa Enawetu lùli ofu.
26Twákangirisibwe mira ekumenyerera emyasi ye'kanangana. Rero, akaba tùngaendekera kunde twáiririra ebibi, aola kutachiri mitulo* era ìngachiala kukula ebi bibi. 27Mwa bacha, kwanashiba kulinjirira na buba bunene ebuchinjibusi bwa Ongo, ne'marunga me'muliro ma makwócha ebarenda bai. 28Mango emundu éndee ánana kuira kwa Mwaso wa Musa àtechire, éndee êchibwa busira bonjo akaba bandu babiri nesi bahatu bàngateta mbu bàchiloreraa kwa áishaa muo. 29Rero, emundu ola wénde wákena eMwana wa Ongo, mùtasene kwa akáchinjibusibwa busese? Oyu mundu, àtatunda emikira ye'chilaano* era yámukomyaa kutenga mwa bibi. Kanji énde ákamba eMuchima Mubuya-buya ola wénde wátukangirisa ebubuya bwa Ongo.
30Kubinali, twìshi ola wátetaa mbu: «Ekuchifúna kùli kwanyi. Nyono nyi nyikêmba chira muuma kukulikana na bya ěmire kwêmbibwa.» Kanji átetaa mbu: «Enawetu akáchinjibusa elubaa lwai.»#10:30 Somaa Bukengere 32:35-36; Saburi 135:14. 31Chìri chisibu busese ekutowera mwa mino sa Ongo, i'utúla muuma-uma!
32Mukéngeraa emyasi era yábaikiraa kwa mira mango ebulangare bwa Ongo bwábalómekeraa. Mwe'si suku, mwárengaa mu malibuko manene busese, si mwera kunásimika. 33Bihangi biuma mwákambibwaa na kulibusibwa changanama. Na binji bihangi mwera kuba kwa lunda lwa ba bálibusibwa. 34Mwálibukaa ala'uma ne'bandu be'mulisi mwa malibuko mabo. Mwányaibwaa ebindu byenyu, mwera kwêmerera kuesa'bi na lumoo. Bushi mwábaa mwìshi kwa mwěte buare bunene kurenza ebyera, kanji bwa butákawe.
35Rero, mùtaesaa emunyiiro wenyu, bushi i'ukátuma mwábona lwêmbo lunene. 36Mwěmire kuata bushibirisi, chasiya múnde mwáira ekuhonda kwa Ongo, mubóne bya álanyaa. 37Bushi eMaanjiko Mabuya-buya matúla màtechire mbu:
«Mu bihangi bieke, bieke busese,
oyu wěmire kubaha, angábaha,
ne'kubaha kwai kutêrise!»
38Ongo àtechire mbu: «Emundu ola ùtungenene era muhondo sanyi,
emibere yai ingénde yêmangira kwa bwemeresi.
Si akaba àngahuba era nyuma,
ndàngasimisibwa nai.»#10:37-38 Somaa Habakuki 2:4.
39Tubano tutá bandu ba kuhuba era nyuma, na kuya mwa muero. Si tùli bandu ba bète bwemeresi, kanji ba bàli mwa njira ye'kununulibwa.
Currently Selected:
BAEBURANIYA 10: tbt
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc.
