Popular Bible Verses from BAEBURANIYA 11

Share

Ekuata ebwemeresi mu Ongo, kùli kuata ekanangana ke'bindu bya mundu alángalire. Kanji kùli kwêmerera kanangana kwa bya bitaséneke'ko bìtula'o. Obu bwemeresi, bu bwéndee bwátuma bahokulu básimisa Ongo.

Kutali mundu ola ùngaala kunde ásimisa Ongo akaba atéte ebwemeresi. Bushi ola wáhonda kuchifunda ofu na Ongo, ěmire kwêmerera kwa Ongo àli'o, na kwêmerera kwa Ongo énde êresa ba bámuhonda elwêmbo.

Ebwemeresi bu bwénde bwátuma twámenyerera kanangana kwa Ongo ábumbaa byoshi kurengera echinwa chai. Mwa bacha, ebindu bya bìseneke'ko byáirwaa kutengera kwa bya bìtaseneke'ko.

Ebwemeresi bwa Aburahamu bu bwátumaa áira bya Ongo ámuburaa, mango ámwamaalaa. Era kuya mwa chio cha Ongo ábaa ěmire kumweresa kuba mwandu. Era kunáenda busira kumenya era áya. Ebwemeresi bwai bu bwátumaa ékala nga mubunga mwa chio cha Ongo ámulanyaa. Era kubera mwa hema, ngo'kwa Isaka, na Yakobo bánaberaa'mo. Abola nabo, Ongo ánêresaa'bo echi chiraane.

Ebwemeresi bwa Nowa bu bwátumaa átunda emyasi era Ongo ámuburaa era luulu se'bya byábaa byěmire kuika, bya byábaa bìtasa kulorekana'ko. Era kwânga emashuwa kwa kununula engumo yai. Mwa bacha, mu áchinjibusaa ebandu bo'mwa butala. Kanji obu bwemeresi bwai, bu bwátumaa Ongo ámutola nga mundu ola ùtungenene.

Ebwemeresi bwa Enoki bu bwátumaa érusibwa kwa nguba busira kufa. Kutali chiro na mundu asibya ola wáchihubaa kumulola'ko, bushi Ongo ábaa àmwerusise mira kwa nguba. eMaanjiko Mabuya-buya matúla màtechire mbu era muhondo Enoki érusibwe kwa nguba, éndee ásimisa Ongo.

Ebwemeresi bwa Aberi bu bwátumaa êresa Ongo emitulo* era ìkomire busese, kurenza era ya Kaini. Obu bwemeresi bwai, bu bwátumaa Ongo ámutola nga mundu ola ùtungenene, bushi Ongo ámoeraa emitulo* yai. Kanji obu bwemeresi bwa Aberi bu bwátuma emyasi yai ichiri yómvikala, chiro mbu áfire mira.

Ebwemeresi bwa Sara, muka Aburahamu bu bwátumaa Ongo ámweresa ebuashi bwe'kubuta emwana, chiro angaba mbu ábaa era mweekulu busese kanji ábaa atúla ngumba. Ábaa anêshi kanangana kwa Ongo énde áira bya álaanyaa.

Aburahamu ábaa álinjira kwíkala mwa musi ola wímbirwe kwa musingi ùkoochire busese. Oyu musi, Ongo yeine iwáataa emianyisa kute àngaimbwa kanji iwánaimbaa'o.

Ebwemeresi bwa Musa bu bwátumaa mango ábaa era mundu aséne, ánana kunde érikibwa mbu àli muala wa mwali wa mwami we'Misiri. Era kulondola ekulibukira ala'uma ne'bandu ba Ongo, wakúchimoeresa mwa bibi ku bihangi bieke. Álolaa kwe'kukenyibwa ngo'kwa Masiya* ákenyibwaa, ku kwète mufa munene busese kurenza ebuare bwe'Misiri. Áiraa bacha, bushi ábaa àbikire emuchima kwa lwêmbo lwa Ongo akámweresa. Ebwemeresi bwa Musa bu bwátumaa átenga mwa chio che'Misiri busira kwôbaa ebukali bwa mwami. Ásimikaa busese nga mundu ola uséne ku Ongo no'ku Ongo àtalorekana'ko.

Ebwemeresi bwa Aburahamu bu bwátumaa âna muala wai Isaka kuba mitulo* ya kusiresibwa, mango Ongo áerekaa ebwemeresi bwai. Ongo ábaa ámulaanyise mira mbu: «Kurengera Isaka ku ukábona enyibuto sa nákulaanyaa.» Si chiro bacha, Aburahamu ábaa ànêmerere kwâna oyu mwana wai we'chihwa.

Ebwemeresi bwa Rahaba, cha chihungukasi, bu bwátumaa átasikira ala'uma ne'bandu ba bánanaa kuira kwa Ongo àtechire. Bushi yeke áhuukasaa eBaisiraeli mwa bôlo, ba bátumwaa kubusirisa emyasi ye'chio.

Ebwemeresi bwe'Baisiraeli bu bwátumaa báhabuka enyanja ye'Mwola nga bandu ba bárenga kwa chitaka ala àkalire. Si mango besha Misiri báerekaa kurenga'o, beke bera kusika.

Ebwemeresi bu bwátumaa elusimbo lwa lwábaa lusungwire emusi we'Yeriko lwákunduka, mango eBaisiraeli bábaa bera bàsungulaa'lo ku suku sirinda.

Ebwemeresi bwai bu bwátumaa ába mubere kutangirisa elusuku lukulu lwe'Pasaka*. Kanji era kubura eBaisiraeli mbu bamámairisaa emikira ye'mbuli kwa nyisi se'nyumba sabo, chasiya mango emalaika* ola wénde wásikya ebandu angárenga, àtetaa efula se'Baisiraeli.

Ebwemeresi bwa Yosefu bu bwátumaa mango ábaa áhonda kutowa emuchima, áteta era luulu se'chihangi cha Baisiraeli bakátenga mwa chio che'Misiri. Era kueresa'bo emiomba* era luulu se'makinya mai.

Ebwemeresi bwa Yakobo bu bwátumaa mango ábaa áhonda kutowa emuchima, áahanyira ebana babiri ba Yosefu. Era kwêyamira kwa chikoma chai, na era Ongo.

Ebwemeresi bwa Isaka bu bwátumaa áahanyira Yakobo na Esau kukulikana ne'myasi era ikábaikira.