Roma 16
16
Ya pagpangumusta ni Pablo sa manga mangintu-uway na awun ni Roma
1Na, kaliman ku pakilala kamayu si Pibi na bubay tadun dun ni kan Kristu. Sambuk sakanan na dyakunu#16:1 Ya manga dyakunu, yan ya magtabang sa manga mangintu-uway aw sa manga imo-unun dun ni pagkatipunanan nilan. na manga mangintu-uway na awun ni syudad na Cénkriya. 2Manginayuꞌ aku kamayu na dawaten mayu si Pibi asuntu na nyangintu-u uman sakanan sa kanaten Matas na Pangulu. Kay yan saba ya umbaꞌ imo-un na manga mangintu-uway. Aw kun awun kapelekan nan, tabangi mayu sakanan kay madég ya pigtabangan nan dala aku.
3Aw pangumusta͡an aku mayu kan Priscilla aw sa eseg nan na si Akila. Eped ku silan dun ni manga imo-unun na pigpa-imoꞌ kanak ni Kristu Jisus, 4aw pigpan nilan ya kanilan pagka-utawun asuntu kanak. Aw bekeꞌ ku oloꞌ ya migpasalamat kanilan manang migpasalamat uman ya kadég na manga mangintu-uway na Héntil na migkatipun nyanimba adti madég na banwa. 5Pangumusta͡an aku mayu uman sa kadég na mangintu-uway na migkatipun nyanimba dun ni kanilan balay.
Aw pangumusta͡an aku mayu uman kan Épénéto na kanak ubaybay na pigginawa͡an na yan ya tagnaꞌ na nyangintu-u kan Kristu dun ni probinsiya na Asia. 6Pangumusta͡an aku mayu uman kan Maria na to-o nyapagud kamayu. 7Pangumusta͡an aku mayu uman sa kadégan ku na Judiyu na si Androniko aw si Juniya. Eped ku silan na nyakalabusu idtu muna. Pigkilala silan to-o na manga apostolés, aw nyaka-una silan kanak nyangintu-u kan Kristu.
8Pangumusta͡an aku mayu uman sa kanak ubaybay na pigginawa͡an na yan si Ampliyato na nyangintu-u uman sa Matas na Pangulu tadun. 9Pangumusta͡an aku mayu uman kan Urbano na yan ya eped ku dun ni manga imo-unun na pigpa-imoꞌ kanak ni Kristu, aw kan Éstakis na kanak ubaybay na pigginawa͡an. 10Pangumusta͡an aku mayu kan Apélés. Sambuk sakanan na kyapulba͡an na to-o la masalig ya kanan pagpangintu-u kan Kristu. Pangumusta͡an aku mayu uman sa kadég na ka-epedanan ni Aristobulo dun ni balay. 11Pangumusta͡an aku mayu uman kan Hérodyon na kadégan ku na Judiyu, aw sa kadég na ka-epedanan ni Narsiso dun ni balay na nyangintu-u sa Matas na Pangulu tadun.
12Pangumusta͡an aku mayu uman sa duwa ya ka͡ubayan na si Tripéna aw si Triposa na alag maseb dun ni imo-unun na Matas na Pangulu tadun. Pangumusta͡an aku mayu uman sa sambuk na ka͡ubayan na pigginawa͡an tadun na si Pérsida. Dakulaꞌ to-o ya pagud nan dun ni imo-unun na kanaten Matas na Pangulu. 13Pangumusta͡an aku mayu uman kan Rupo na sambuk na pigkilala na nyatibulluk dyumalug sa Matas na Pangulu tadun. Aw pangumusta͡an aku mayu uman sa ina nan, kay pigsiling aku nan na tengteng kanan iseꞌ. 14Pangumusta͡an aku mayu uman kan Asinkritos, aw kan Plégonté, aw kan Hérmés, aw kan Patrobas, aw kan Hérmas, aw sa kadég na mangintu-uway na eped nilan. 15Pangumusta͡an aku mayu uman kan Pilologos, aw kan Julia, aw kan Néréyo aw sa bubay nan, aw kan Olimpas, aw sa kadég na mangintu-uway na eped nilan. 16Sa pagkatipun mayu manimba, pagpangumusta͡ay kamu na manga mangkaylug dun ni kan Kristu. Aw ya kadég na manga mangintu-uway na migkatipun nyanimba dun ni kanilan manga banwa, nyangumusta uman silan kamayu.
17Na, kay manga inulug ku dun ni kan Kristu, manginayuꞌ aku kamayu na magpakatanaw kamu sa manga utaw na paglekatan sa ayil aw magtenga-tengaꞌ sa manga mangintu-uway magi sa palna-u nilan na walaꞌ pag-unawa sa pigpalna-u la kamayu. Pagpakawat kamu kanilan! 18Kay ya manga utaw na mig-imoꞌ sa maynan, walaꞌ silan dalug sa pagkaliman ni Kristu na kanaten Matas na Pangulu, manang yan oloꞌ ya kanilan pigdalug ya pagkaliman na pagka-utawun nilan. Aw magi sa kanilan katadeng magbulakbulak sa manga tingeg, pigpasuway nilan ya manga utaw na maksay magka-agad-agad. 19Migleya aku na lyumuttuꞌ adti manga utaw ya pagdalug mayu sa pigpalna-u la kamayu. Manang ya kaliman ku na magkadakulaꞌ ya kya-ede-an mayu sa unu ya madyaw aw magpakawat kamu dun ni pag-imoꞌ sa malatay. 20Aw ya Tyumanem na lyekatan sa kalinaw, diliꞌ madugay tabangan kamu nan na degen si Satanas. Ayin pa aku galu na ya grasya ni Jisu-Kristu na kanaten Matas na Pangulu awun gayed ni kamayu.
21Na, si Timotiyo na eped ku dun ni kanak imo-unun, nyangumusta kamayu dala uman ya manga kadégan ku na Judiyu na si Lucio, aw si Jason, aw si Sosipatro.
22Aw aku si Térsio na magsulatay sa manga tingeg ni Pablo asini sulat ini, nyangumusta uman kamayu kay nyakasambuk aku kan Kristu na kanaten Matas na Pangulu.
23Si Gayo nyangumusta uman kamayu. Sakanan ya tagtun sa balay na pigbantukan ku, aw dun ni kanan balay pagkatipun ya kadég na manga mangintu-uway. Aw ya trisuriro na syudad na si Érastos nyangumusta uman kamayu, aw ya inulug tadun na nyangintu-u la na si Kuwartos.
24[Ayin pa aku galu na ya grasya ni Jisu-Kristu na kanaten Matas na Pangulu awun gayed ni kamayu. Amén.]
Ya pagdeyen sa Tyumanem
25Na, mabatug na Tyumanem pakabagsegen ya kamayu pagpangintu-u magi sa Madyaw na Ubat-ubat kan Jisu-Kristu na pigpa-edeꞌ ku. Ya ubat-ubat yeiy, madugay na walaꞌ bukasi, 26manang adun ya Tyumanem na walaꞌ ya katigkasan, pigbukasan da nan adti kadég na manga utaw magi sa pigpasulat nan adti manga propita, pada ya kadég alag mangintu-u kan Kristu aw dumalug silan sa palna-u nan.
27Magi kan Jisu-Kristu, deyen galu na walaꞌ ya tyamanan ya Tyumanem kay yan oloꞌ ya awun katadeng sa kadég. Amén.
Currently Selected:
Roma 16: klgv
Highlight
Share
Compare
Copy
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
