1 Corinto 1

1Aku si Pablo ya migsulat adti kamayu, eped ku ya kanaten inulug na si Sosténés. Nya-imoꞌ aku apostol ni Kristu Jisus asuntu na pigpamalliꞌ aku na Tyumanem, kay yan saba ya kanan pagbayaꞌ. 2Pigsulatan ta kamu na manga mangintu-uway na migkatipun nyanimba dun ni syudad na Corinto. Pigtani la kamu magi kan Jisu-Kristu aw pigtawag da kamu pada makasambuk adti kanan, kasiling na manga mangintu-uway adti eped na banwa na nyanawagtawag dun ni ngalan ni Jisu-Kristu na Matas na Pangulu na kadég tadun.

3Padatengen galu adti kamayu ya grasya aw kalinaw na lyumekat adti Tyumanem na yan ya Ama tadun aw adti kan Jisu-Kristu na kanaten Matas na Pangulu.

Ya manga kadyawan na awun ni kan Kristu

4Gayed ku pigpasalamatan ya Tyumanem asuntu sa manga kadyawan na pig-atag nan kamayu kay nyakasambuk da kamu kan Kristu Jisus. 5Aw dun ni pagpakasambuk mayu kanan, pig-atagan kamu na Tyumanem na manga kadyawan, dala ya katadeng na un mayu kalabetan ya palna-u yeiy aw ya katadeng na un maglong sa Madyaw na Ubat-ubat kan Kristu adti manga utaw. 6Aw asuntu na to-o mayu pigpangintu-uwan si Kristu na pigpalna-u nami kamayu, 7yanagaw gayed mayu pigdawat ya kadég na pig-atag na Tyumanem talana mayu migtagad sa paglikuꞌ na kanaten Matas na Pangulu na si Jisu-Kristu. 8Pakabagsegen nan uman ya pagpangintu-u mayu pada walaꞌ ya un nan pagsalaꞌ kamayu dun ni allaw na paglikuꞌ nan. 9Kasaligan saba ya Tyumanem na migtawag kamayu pada makasambuk kamu sa Iseꞌ nan na si Jisu-Kristu na kanaten Matas na Pangulu.

Ya pagkatenga-tengaꞌ dun ni mangintu-uway

10Kay manga inulug ku, nyanginayuꞌ aku kamayu dun ni ngalan ni Jisu-Kristu na kanaten Matas na Pangulu na magkasambuk ya kadég mayu aw diliꞌ da kamu matenga-tengaꞌ. Aw pagsambuka uman ya tud na anenganeng mayu. 11Kay pig-ubatan aku na manga ka-epedanan ni Cloe na awun pag-ayil dun ni kamayu na kanak manga inulug. 12Kay ya eped kamayu miglong kunu, “Ya kanak pigdalug ya kan Pablo.” Aw ya eped uman miglong, “Ya kanak pigdalug yan ya kan Apolos.” Aw ya sambuk uman miglong, “Ya kanak pigdalug yan ya kan Pédro.” Aw ya sambuk uman miglong, “Ya kanak pigdalug yan oloꞌ ya kan Kristu.”

13Na, walan ya piglong mayu yeiy? Unu, nyatenga-tengaꞌ kaꞌ si Kristu? Walaꞌ saba! Bekeꞌ ku ya pigkalabuwan adti krus asuntu sa manga salaꞌ mayu! Aw bekeꞌ na kanak ngalan ya pigba͡utismu kamayu! 14Migpasalamat aku sa Tyumanem na oloꞌ si Krispo aw si Gayo ya pigba͡utismuwan ku dun ni kamayu. 15Yanagaw walaꞌ ya makapaglong na pigba͡utismuwan ta kamu dun ni kanak ngalan. 16Awun pa kadiꞌ uman pigba͡utismuwan ku na yan si Éstipanas aw ya manga ka-epedanan nan adti balay, manang makalabay kanilan, walaꞌ da ya eped na kya-anenganengan ku na pigba͡utismuwan ku dun ni kamayu. 17Kay bekeꞌ na tud na pagpadala kanak ni Kristu ya pagba͡utismu, manang yan baling ya pagpa-edeꞌ sa Madyaw na Ubat-ubat adti manga utaw. Aw dun ni kanak paglong, walaꞌ ku silingi ya manga utaw na awun kapandayan mag-imoꞌ sa manga tingeg magi sa katadeng nilan. Pagaw sayaꞌ na manga utaw ya katadeng ku maglong aw malagak baling adti kanilan ya untung na pagkamatay ni Kristu adti krus.

Ya katadeng na Tyumanem aw ya katadeng asini tas na lupaꞌ

18Adti anenganeng na manga utaw na kya-eletan pa adti Tyumanem, walaꞌ ya ma-untung sa ubat-ubat sa pagkamatay ni Kristu adti krus. Manang adti kadég tadun na pigpaluwaꞌ nan, yan saba ya migmatinaw sa katulus na Tyumanem. 19Kay pigpasulat na Tyumanem asini muna:

“Kalaten ku ya katadeng na manga utaw na migpalibantug sa kya-ede-an nilan.

Aw un ku saba pakitaꞌ na walaꞌ ya guna na katadeng nilan.” #1:19 Mabasa adti Isayas 29:14.

20Yanagaw ayin da saba ya dengeg na manga utaw na awun kunu katadeng? Aw ayin da saba ya manga magpalna-uway sa Uldin na manga Judiyu? Aw ayin da uman ya manga utaw na matadeng magtalagtag sa manga tingeg? Pigpakitaꞌ da na Tyumanem na walaꞌ ya ma-untung sa katadeng na lekat asini tas na lupaꞌ. 21Kay walaꞌ saba ya maka-unawa sa katadeng na Tyumanem. Aw yan ya kanan pagbayaꞌ na ya katadeng na manga utaw asini tas na lupaꞌ diliꞌ makapet sa pagka-edeꞌ kanan. Manang ya kaliman na Tyumanem na magi sa pagpa-edeꞌ sa Madyaw na Ubat-ubat, paluwa-en ya kadég na utaw na awun pagpangintu-u kanan, pangkay iman na manga eped aw walaꞌ ya ma-untung dun. 22Ya manga Judiyu, diliꞌ silan mangintu-u kun diliꞌ silan kumitaꞌ sa milagru na un magmatinaw sa palna-u na dyengeg nilan. Aw ya manga utaw na Grigo, kaliman nilan magpakanyeg sa palna-u na manga utaw na matadeng magtalagtag sa manga tingeg. 23Manang ya kanami pig-ubat-ubat, yan si Kristu na pigkalabuwan adti krus. Adti manga Judiyu na walaꞌ pangintu-u, yeiy baling ya magpakasungkul sa anenganeng nilan. Aw adti manga Héntil na walaꞌ pangintu-u, walaꞌ ya ma-untung. 24Manang adti kadég na pigtawag da na Tyumanem pangkay Judiyu aw pangkay Héntil, magi dun ni kan Kristu, pigpakitaꞌ na Tyumanem ya kanan katulus aw ya kanan katadeng. 25Kay ya pagkamatay ni Jisu-Kristu adti krus na pig-ubat-ubat nami, adti anenganeng na manga utaw na walaꞌ pangintu-u, walaꞌ ya ma-untung seiy aw dun kita-a na walaꞌ ya katulus na Tyumanem aw pigdeg da sakanan. Manang magi dun, pigpakitaꞌ baling na Tyumanem na ya katadeng na utaw diliꞌ maka-unawa sa katadeng nan, aw ya asini tas na lupaꞌ diliꞌ uman maka-unawa sa kanan katulus.

26Kay manga inulug ku, anenganenga mayu ya pagtawag kamayu na Tyumanem idtu muna sa walaꞌ pa kamu pangintu-u kanan. Tabay oloꞌ kamayu ya awun kya-ede-an magi sa pag-iskuwila, aw tabay kamayu ya mangkalangkaw, aw tabay uman kamayu ya nya͡utaw adti manga pamilya na dengganen. 27Manang yan baling ya pigpamalliꞌ na Tyumanem ya manga utaw na tagbiꞌ ya kya-ede-an, pada mulamula͡en ya manga utaw na migpalibantug sa katadeng nilan. Aw pigpamalliꞌ nan uman ya manga walaꞌ ya katundanan pada mulamula͡en ya manga utaw na migpalibantug sa katundanan nilan. 28Aw pigpamalliꞌ na Tyumanem ya manga madalem aw pigkele͡an na manga utaw asini tas na lupaꞌ, pada pakitaꞌ nan na ya dakulaꞌ na ma-untung adti anenganeng nilan, tengteng saba na walaꞌ ya ma-untung. 29Pig-imoꞌ nan yeiy pada walaꞌ ya indeganan na utaw magpalibantug adti asdangan na Tyumanem. 30Asuntu sa pagbayaꞌ na Tyumanem, nyakasambuk kamu adti kan Kristu Jisus. Aw magi dun ni kan Kristu, awun da katadeng tadun. Aw ya syampetan na manga pigpan-imoꞌ ni Kristu adti krus, pigdawat da kitadun na Tyumanem kasiling na walaꞌ da ya salaꞌ, aw pigtani la kitadun, aw piglekat da nan. 31Yanagaw kasiling na pigpasulat na Tyumanem asini muna: “Kun awun magpalibantug, yan oloꞌ ya umbaꞌ nan palibantug ya pig-imoꞌ na Matas na Pangulu.”#1:31 Mabasa adti Jérémiyas 9:24.

Currently Selected:

1 Corinto 1: klgv

Highlight

Copy

Compare