Roma 15
15
Ya pagdawat aw ya pagtabang sa kanaten eped
1Kitadun na masalig da ya pagpangintu-u, tabangan tadun ya manga utaw na walaꞌ pa pakadalid ya pagpangintu-u, aw diliꞌ tadun oloꞌ pag-anenganengen ya makapaleya sa kanaten pagka-utawun. 2Manang anenganengen tadun uman ya makakadyaw kanilan, pada magkabagseg ya kanilan pagpangintu-u. 3Kay si Kristu walaꞌ nan anenganenga ya makatutuk sa pagka-utawun nan, manang kasiling na pigpasulat asini muna, “Kay Tyumanem, ya manga pagsupla kanmu, alag kanak nyakapisan.”#15:3 Mabasa adti Salmo 69:9. 4Kay ya kadég na pigpasulat na Tyumanem asini muna, yeiy ya mig-atag kanaten sa kabagseg na ginawa na magpadeleg pada awun imanen tadun.
5Na, ya Tyumanem yan ya tyumabang kanaten na mati-is tadun ya manga kalugan, aw pigpakabagseg nan ya kanaten ginawa. Aw atagan kamu nan galu sa pag-isambuk na anenganeng magi dun ni pagdalug mayu kan Kristu Jisus, 6pada magkasambuk kamu magdeyen sa Tyumanem na yan ya Ama na kanaten Matas na Pangulu na si Jisu-Kristu.
Ya pagkasambuk na manga Héntil aw manga Judiyu sa pagdeyen sa Tyumanem
7Asuntu na pigdawat da kamu ni Kristu, yanagaw dawata uman ya manga eped mayu pada madeyen ya Tyumanem. 8Kay paglongun ta kamu kun unu ya du-an na nya-imoꞌ si Kristu sugu-anen adti manga utaw na Isra-él: Magi kanan, pigpakitaꞌ na Tyumanem na kasaligan sakanan dun ni pagtuman nan sa kanan pigpakang asini muna adti manga tyugbulan nilan. 9Aw magi uman kan Kristu, pigkallatan na Tyumanem ya manga Héntil pada deyen nilan sakanan. Kay awun pigpasulat asini muna:
“Magdeyen aku kanmu eped na manga Héntil,
aw magdalangan aku sa pagdeyen sa kanmu ngalan.”#15:9 Mabasa adti Salmo 18:49.
10Aw awun pa uman pigpasulat:
“Pagleya kamu na manga Héntil,
eped na kanan manga utaw na yan ya manga Judiyu.”#15:10 Mabasa adti Déutéronomiyo 32:43.
11Aw awun uman pigpasulat:
“Kadég mayu na manga Héntil, deyenan mayu ya Tyumanem.
Aw kadég mayu uman na manga utaw, deyenan mayu sakanan.”#15:11 Mabasa adti Salmo 117:1.
12Na, ini uman ya pigsulat ni Isayas:
“Mawun adti kamayu ya sambuk na lumekat adti buwadbuwad ni Jési.
Aw magdumala sakanan sa manga Héntil,
aw dun ni kanan, awun imanen nilan.”#15:12 Mabasa adti Isayas 11:10. Si Jési yan ya ama ni Hariꞌ Dabid. Aw si Maria na ina ni Jisus lekat saba adti buwadbuwad ni Dabid.
13Na, ya Tyumanem na lyekatan sa pag-iman, atmu-un kamu nan galu na pagleya aw kalinaw asuntu sa kamayu pagpangintu-u. Aw magi sa katulus na Ispiritu, to-o pa magkadakulaꞌ ya kamayu pag-iman.
Ya du-an na migsulat si Pablo
14Kay manga inulug ku na nyangintu-u kan Kristu, nya-edeꞌ aku na madyaw ya bet mayu. Aw nya-edeꞌ aku uman na madég da ya kya-ede-an mayu sa manga palna-u na lekat adti Tyumanem aw mabatug da mayu palna-uwan ya eped. 15Manang asini sulat ku ini, walaꞌ ku tageni ya pagpalna-u ku na yan ya pagpa-anenganeng kamayu. Magi sa kallat na Tyumanem kanak 16nya-imoꞌ aku sugu-anen ni Kristu Jisus adti manga utaw na Héntil. Kasiling aku na magdadugsu-ay dun ni pagpa-edeꞌ ku kanilan sa Madyaw na Ubat-ubat na lekat adti Tyumanem, pada dawaten nan silan kasiling na dugsuꞌ na pigtani la na un makatutuk kanan magi sa Ispiritu Santo.
17Yanagaw, asuntu na nyakasambuk da aku kan Kristu Jisus, diliꞌ aku mamulamula magpalibantug kamayu sa kadég na imo-unun na pigtaligu kanak na Tyumanem. 18Kay walaꞌ ya eped na un ku palibantug, yan oloꞌ ya umbaꞌ ku palibantug ya manga imo-unun na pig-imoꞌ ni Kristu magi kanak. Aw dun ni kanak pag-ubat-ubat, madég ya manga Héntil na dyumalug da kanan magi dun ni kanak paglong aw manga imo-unun ku, 19aw magi uman sa manga pangilala aw milagru na nya-imoꞌ na katulus na Ispiritu Santo. Aw nyabatug ku ya pagpa-edeꞌ adti manga utaw sa Madyaw na Ubat-ubat kan Kristu, lekat dun ni Jérusalim taman adti probinsiya na Ilirikum. 20Aw ya tengteng kaliman ku, yan ya pag-ubat-ubat adti manga banwa na walaꞌ pa pakadengeg sa Madyaw na Ubat-ubat kan Kristu. Kay diliꞌ aku malim magpadeleg sa imo-unun na pigpalekat da na eped na utaw. 21Kasiling na pigpasulat na Tyumanem asini muna:
“Ya manga walaꞌ pa ka-ubat-ubati, ka-ede-an nilan sakanan.
Aw ya manga walaꞌ pa pakadengeg kanan, un nilan kalabetan ya ubat-ubat kanan.” #15:21 Mabasa adti Isayas 52:15.
Ya palpa ni Pablo na madtu ni syudad na Roma
22Na, ya du-an na walaꞌ pa aku pakakawun adti kamayu kay nyasalang aku migpa-edeꞌ sa Madyaw na Ubat-ubat adti eped na banwa. 23Manang adun, asuntu na kya-ubat-ubatan da ku ya manga banwa yeiy, yanagaw walaꞌ da ya un makatagen kanak sa pagkawun ku dun ni kamayu. Matag pilangka͡umay pa na kaliman ku na madtu ni sayid mayu. 24Aw migpalpa aku na mapit adti syudad na Roma kun magpasinan da aku adti probinsiya na Éspanya. Pagkatigkas tadun magkakita͡ay dagawdagaw, magpatabang aku galu kamayu sa kanak panaw pasinan adti Éspanya. 25Manang adun sa diliꞌ pa aku madtu ni kamayu, una aku madtu ni Jérusalim pada mag-ated sa tabang sa manga mangintu-uway dun. 26Kay ya manga mangintu-uway na taga Macédoniya aw Akaya migsagipun silan sa kuwalta na un tabang sa manga mangintu-uway na awun ni Jérusalim na migkapelek. 27Aw to-o silan migleya na tumabang, kay umbaꞌ saba nilan tabangan. Kay kun bekeꞌ pa na manga mangintu-uway na Judiyu dun ni Jérusalim, diliꞌ mangintu-u ya manga Héntil na taga Macédoniya aw Akaya. 28Yanagaw, kun matigkas da ku ya pag-ated sa kuwalta, mapit aku adti Roma sa pagpasinan ku adti probinsiya na Éspanya. 29Aw kya-ede-an ku na sa pagkawun ku dun ni kamayu, awun kadyawan na atag ni Kristu adti tagsambuksambuk kanaten.
30Kay manga inulug ku na nyangintu-u la, asuntu kan Jisu-Kristu na kanaten Matas na Pangulu, aw asuntu uman sa Ispiritu Santo na lyekatan sa pagginawa, sekaten ku adti kamayu na matibulluk kamu manawagtawag eped ku adti Tyumanem 31na tamengan aku nan lekat adti manga utaw na walaꞌ pangintu-u na awun ni Judiya. Aw panawagtawagi mayu uman na magleya ya manga mangintu-uway na awun ni Jérusalim sa un ku imo-un. 32Aw pagkatigkas na imo-unun ku, kun tumbay na Tyumanem, mawun aku adti kamayu na awun pagleya aw magkabagseg ya ginawa ku asuntu na magkakita͡ay kitadun.
33Ayin pa aku galu na ya Tyumanem na lyekatan sa kalinaw, gayed awun ni kadég mayu. Amén.
Currently Selected:
Roma 15: klgv
Highlight
Share
Compare
Copy
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
