Popular Bible Verses from Roma 16

Share

Aw ya Tyumanem na lyekatan sa kalinaw, diliꞌ madugay tabangan kamu nan na degen si Satanas. Ayin pa aku galu na ya grasya ni Jisu-Kristu na kanaten Matas na Pangulu awun gayed ni kamayu.

Na, kay manga inulug ku dun ni kan Kristu, manginayuꞌ aku kamayu na magpakatanaw kamu sa manga utaw na paglekatan sa ayil aw magtenga-tengaꞌ sa manga mangintu-uway magi sa palna-u nilan na walaꞌ pag-unawa sa pigpalna-u la kamayu. Pagpakawat kamu kanilan!

Kay ya manga utaw na mig-imoꞌ sa maynan, walaꞌ silan dalug sa pagkaliman ni Kristu na kanaten Matas na Pangulu, manang yan oloꞌ ya kanilan pigdalug ya pagkaliman na pagka-utawun nilan. Aw magi sa kanilan katadeng magbulakbulak sa manga tingeg, pigpasuway nilan ya manga utaw na maksay magka-agad-agad.

Na, mabatug na Tyumanem pakabagsegen ya kamayu pagpangintu-u magi sa Madyaw na Ubat-ubat kan Jisu-Kristu na pigpa-edeꞌ ku. Ya ubat-ubat yeiy, madugay na walaꞌ bukasi, manang adun ya Tyumanem na walaꞌ ya katigkasan, pigbukasan da nan adti kadég na manga utaw magi sa pigpasulat nan adti manga propita, pada ya kadég alag mangintu-u kan Kristu aw dumalug silan sa palna-u nan. Magi kan Jisu-Kristu, deyen galu na walaꞌ ya tyamanan ya Tyumanem kay yan oloꞌ ya awun katadeng sa kadég. Amén.