Santiago 2

Ya palna-u na diliꞌ magkibang sa eped na utaw

1Kay manga inulug, asuntu na nyangintu-u la kamu sa kanaten Matas na Pangulu na si Jisu-Kristu na umbaꞌ deyen, diliꞌ da kamu magkibang sa utaw. 2Alimbawaꞌ awun utaw na mayaman na bagu sumeled dun ni katipun mayu aw syumut sa madyaw na kadégkadég aw manga paningsing na alag bulawan, aw awun uman bagu sumeled na utaw na tagituꞌ na syumut sa kalapeng na kadégkadég na awun leneb. 3Aw kun yan ya pigbetang mayu sa ginawa ya pagpamasa sa utaw na syumut sa madyaw na kadégkadég aw maglong kamu kanan, “Ingkud kaw adi madyaw na ingkudanan,” manang maglong kamu adti utaw na tagituꞌ, “Indeg kaw sa kanmu dun” aw bekeꞌ yan, “Ingkud kaw dun ni bantal.” 4Na, kun maynan ya imo-un mayu, migkibang kamu sa utaw aw pigpamalliꞌ mayu ya un mayu basa͡an. Yanagaw nya-imoꞌ da kamu kasiling na manga mag-ukumay na malatay ya anenganeng.

5Kay manga inulug na kanak pigginawa͡an, pakanyegi mayu. Ya manga tagituꞌ na utaw asini tas na lupaꞌ pigpamalliꞌ saba silan na Tyumanem pada magkasalig ya pagpangintu-u nilan kanan, aw maka-akup da silan adti Kasakupan na Pighari-an nan na yan ya kanan pigpakang adti manga utaw na to-o gyuminawa kanan. 6Manang walaꞌ mayu baling basabasayi ya manga tagituꞌ na utaw. Na, usipen ta kamu: Singalan kaꞌ ya nyamulayam kamayu? Aw singalan kaꞌ uman ya gayed miglimanda aw dyumala kamayu adti usayanan? Manga utaw saba na mayaman. 7Aw silan uman ya miglong sa malatay na nyakapagkalat sa dengeg na ngalan ni Jisu-Kristu na tyumagtun kanaten.

8Kun pigdalug mayu ya matas na suguꞌ dun ni Uldin na pigpasulat na Tyumanem asini muna na maglong: “Ginawayi ya eped mu kasiling na pagginawa mu sa kanmu pagka-utawun,” madyaw ya pig-imoꞌ mayu.#2:8 Pigsulat una yeiy adti Libitiko 19:18, aw piglong ni Jisus adti Matiyo 19:19. 9Manang kun migkibang kamu sa utaw, nyakasalaꞌ kamu saba aw umbaꞌ kamu pa-emel-emelen kay piglakadan mayu ya suguꞌ dun ni Uldin na manga Judiyu. 10Kay pangkay singalan ya dyumalug sa kadég na suguꞌ dun ni Uldin, manang kun kyalakadan nan ya sambuk, kyalakadan da nan uman ya kadakulaꞌ na Uldin. 11Kay miglong ya Tyumanem, “Diliꞌ kaw maglakadenen,” aw miglong pa uman sakanan, “Diliꞌ kaw magpatay sa utaw.”#2:11 Mabasa adti Éxudo 20:13-14. Pangkay kun diliꞌ kaw maglakadenen manang kun migpatay kaw sa utaw, dun da mu kalakadi ya Uldin na Tyumanem.

12Yanagaw magpakatadeng kamu sa kadég na un mayu paglongun aw sa un mayu imo-un. Kay dumateng saba ya allaw na ukuman na Tyumanem ya manga utaw, magi sa suguꞌ na migpaluwaꞌ kamayu. 13Kay dun ni allaw na pag-ukum na Tyumanem, ya utaw na walaꞌ ya pagkallat sa eped nan, diliꞌ uman kallatan na Tyumanem. Manang ya utaw na awun pagkallat sa eped nan, walaꞌ ya un nan kallekan dun ni allaw yan.

Ya pagpangintu-u aw ya manga imo-unun

14Kay manga inulug, unu ya ma-untung kun maglong ya sambuk na utaw, “Nyangintu-u aku kan Jisu-Kristu,” manang walaꞌ ya pig-imoꞌ nan na un magmatinaw sa pagpangintu-u nan? Unu, mabatug sakanan paluwa-en na Tyumanem asuntu sa pagpangintu-u nan na maynan? Diliꞌ saba! 15Alimbawaꞌ kun awun inulug tadun, pangkay eseg aw bubay, aw migkapelek sa un nan pagkadégkadég aw sa un nan kanen, 16aw sambuk kamayu ya maglong kanan, “Pakadyawun na Tyumanem ya panaw mu dun ni dalan. Pagpakabiyag kaw aw atagan kaw galu sa un mu pagkadégkadég.” Manang kun walaꞌ mu atagi sa pigkapelek nan, na, unu ya ma-untung nan dun? 17Maynan uman, kun ya pagpangintu-u diliꞌ ka-agadan na madyaw na imo-unun, walaꞌ saba ya guna.

18Manang pagaw awun maglong, “Diliꞌ mag-unawa ya kadég na utaw. Ya eped nyangintu-u sa Tyumanem. Ya eped mig-imoꞌ sa madyaw.” Aw yeiy ya kanak tubag adti kanan: “Pakita͡an kanak na awun pagpangintu-u mu sa Tyumanem pangkay walaꞌ ya imo-unun mu na madyaw. Aw aku uman pakitaꞌ ku kanmu na awun tengteng pagpangintu-u ku, magi saba sa manga imo-unun ku na madyaw.”

19Nyangintu-u kaw na sambuk da ya Tyumanem. Matinaw saba yan. Pangkay ya manga busaw nyangintu-u uman na sambuk da ya Tyumanem, aw tyakigan silan asuntu sa kakallekan. 20Unu, walaꞌ pa mayu kalabeti? Kinunu pa kamu pakalabet na walaꞌ ya guna na pagpangintu-u kun diliꞌ ka-agadan na madyaw na manga imo-unun?

21Anenganenga mayu si Abraham na tyugbulan tadun. Pigdawat sakanan na Tyumanem kasiling na walaꞌ ya salaꞌ kay pigtuman nan ya suguꞌ na Tyumanem kanan dun ni pagdugsuꞌ nan sa kanan iseꞌ na si Isa-ak. 22Yanagaw nyabangal da mayu na ya pagpangintu-u nan kya-epedan na kanan imo-unun, aw dun ni pig-imoꞌ nan dayaw nyalingeb ya kanan pagpangintu-u. 23Aw dun da katuman ya pigpasulat na Tyumanem, law nan, “Nyangintu-u si Abraham sa piglong na Tyumanem. Yanagaw pigdawat da na Tyumanem si Abraham kasiling na walaꞌ ya salaꞌ.”#2:23a Mabasa adti Génésis 15:6. Aw bekeꞌ pa yan oloꞌ, miglong pa uman ya Tyumanem na ubaybay nan si Abraham.#2:23b Mabasa adti Isayas 41:8. 24Yanagaw, kya-ede-an da tadun na dawaten na Tyumanem ya utaw bekeꞌ oloꞌ na asuntu sa pagpangintu-u nan manang asuntu uman na kya-epedan ya kanan pagpangintu-u na manga imo-unun na madyaw.

25Aw maynan uman si Rahab na miggalin sa pagkaka͡ubayan nan. Pagka-edeꞌ nan na awun duwa ya utaw na Isra-él na nyanilib dun ni syudad na Jériko,#2:25 Mabasa adti Joswé 2:1-21. pigtaguꞌ nan aw pigpapanaw nan silan adti sambuk na dalan pada diliꞌ silan kasaban na manga po-on nilan. Aw magi dun ni pig-imoꞌ nan kanilan, pigmatinaw ya kanan pagpangintu-u sa Tyumanem aw pigdawat nan kasiling na walaꞌ ya salaꞌ.

26Kasiling na lawas na utaw na pig-ayawan da na kalaluwa nan, makapaglong kita na nyatay da ya utaw yan aw walaꞌ da ya guna. Yanagaw, maynan uman, kun ya pagpangintu-u na utaw diliꞌ ka-agadan na madyaw na manga imo-unun, tengteng na walaꞌ ya guna na pagpangintu-u nan.

Currently Selected:

Santiago 2: klgv

Highlight

Copy

Compare