Santiago 3

Ya pagpakatanaw sa tingeg na un paglongun

1Kay manga inulug, madyaw galu kun tabay kanaten ya ma-imoꞌ magpalna-uway sa manga utaw na nyangintu-u, kay kami na manga magpalna-uway, dakulaꞌ pa ya kanami tubagenen adti asdangan na Tyumanem kun diliꞌ nami dalugun ya kanami pigpalna-u. 2Ya kadég tadun malikit magpakasalaꞌ, labi la adti kanaten paglong. Kun awun utaw na matadeng magtagen sa dilaꞌ nan, yan ya utaw na tengteng makatagen uman sa kadakulaꞌ na lawas nan. 3Alimbawaꞌ kun kakangan tadun ya kudaꞌ, mabatug saba tadun aking-akingen pangkay ayin tadun pasinana. 4Kasiling uman na dakulaꞌ na barko. Pangkay pigpalidpalid na mabandes na samet, manang mabatug na utaw aking-akingen magi sa tagbiꞌ na timon. 5Maynan uman ya dilaꞌ. Tagbiꞌ sakanan dun ni lawas na utaw, manang magpalibantug sa dakulaꞌ na manga imo-unun nan.

Anenganenga mayu ya atulun. Pangkay tagbiꞌ, manang mabatug nan masangab ya dakulaꞌ na kagulangan. 6Ya manga malatay na tingeg na lekat adti dilaꞌ tadun, tengteng saba lyumekat adti kan Satanas, aw yeiy ya makapagkalat sa pagka-utawun tadun, kasiling na atulun na magtapuntapun aw magkalat sa kanaten pag-eyaꞌ.

7Mabatug na utaw nalamen ya madég na punganan na ayep, aw manga langgam, aw manga magpananap, aw manga tagbanwa na tubig. 8Manang walaꞌ ya pangkay sambuk na utaw na un makanalam sa dilaꞌ nan, kay diliꞌ katagenan aw gayed maglong sa malatay. Kasiling na makababaleng na makamatay sa utaw.

9Ya kanaten dilaꞌ, yan ya pagdeyen tadun sa kanaten Matas na Pangulu aw Ama na awun ni tas na langit, manang yan uman ya pagpanullun tadun sa utaw na pig-imoꞌ nan kasiling na kanan pagka-utawun. 10Lekat dun ni sambuk na bakaꞌ ya pagdeyen aw ya pagpanullun! Kay manga inulug, diliꞌ galu maynan ya imo-un tadun. 11Alimbawaꞌ ya tubig na matabang aw tubig na ma͡asin, unu, migsambuk ya tyugbulan nilan? Walaꞌ saba! 12Ya kawuy na igira diliꞌ mamunga sa bunga na olibo, aw ya balagen na paras diliꞌ uman mamunga sa bunga na igira. Aw bekeꞌ saba na dagat ya tyugbulan na tubig na matabang. Maynan uman galu ya paglong na dilaꞌ tadun, diliꞌ tadun pagdali-an na malatay na tingeg.

Ya katadeng na lekat adti Tyumanem

13Singalan adti kamayu ya awun katadeng aw magpakalabet? Pakitaꞌ nan galu ya imo-unun na madyaw aw diliꞌ sakanan magpatastas manang magpadalem baling kay yan ya magmatinaw na awun katadeng nan. 14Manang kun awun pag-ingaꞌ nan aw yan oloꞌ ya kanan pigdalug ya pagpakadyaw sa pagpakabetang nan, diliꞌ galu sakanan magpalibantug na awun katadeng nan, pada diliꞌ sakanan makagaluꞌ. 15Kay ya maynan na katadeng, walaꞌ saba lekat adti Tyumanem. Manang lekat baling adti utaw na asini tas na lupaꞌ na walaꞌ dumalayi na Ispiritu Santo, aw lekat uman adti busaw. 16Kay kun mag-inga-inga-ay ya manga utaw aw yan oloꞌ ya tud nilan ya pagpakadyaw sa kanilan pagpakabetang, yan ya gayed paglekatan sa tanam aw kadég na punganan na malatay.

17Manang ya utaw na awun katadeng na lekat adti Tyumanem: Malinis ya anenganeng nan, aw awun kalinaw nan adti kadég na manga utaw, aw madyaw ya bet nan kanilan. Diliꞌ mategel ya anenganeng nan, manang magpakanyeg uman sa eped. Gayed magkallat sa eped na utaw aw madyaw ya manga imo-unun nan, aw diliꞌ magkibang, aw diliꞌ uman magtallalingu. 18Ya utaw na magtanem sa kalinaw, yan ya syampetan nan na awun dumalug sa pagkaliman na Tyumanem.

Currently Selected:

Santiago 3: klgv

Highlight

Copy

Compare