Santiago 1

1Aku si Santiago ya migsulat adti kamayu. Sambuk aku na sugu-anen na Tyumanem aw ni Jisu-Kristu na kanaten Matas na Pangulu. Nyangumusta aku sa kadég mayu na Judiyu na nyangintu-u la kan Jisus, dala kamu na migpanbeklag adti eped na manga banwa.

Ya pagpangintu-u aw ya katadeng na lekat adti Tyumanem

2Kay manga inulug ku na nyangintu-u, pagleya kamu kun dumateng kamayu ya madég na punganan na pagtandaꞌ. 3Kay kya-ede-an da mayu na kun tanda-en ya pagpangintu-u mayu sa Tyumanem, aw kun diliꞌ kamu degen, yan ya sampetan nan na mabatug mayu ya magpadeleg pangkay unu ya dumateng. 4Yanagaw ti-isa ya manga pagtandaꞌ pada malingeb ya pagpangintu-u mayu aw dayaw maka-umbaꞌ aw walaꞌ ya un pagsalaꞌ kamayu.

5Manang kun awun sambuk kamayu na walaꞌ nan ka-ede-i kun unu ya madyaw nan imo-un, na, magsekat sakanan adti Tyumanem sa katadeng sa unu ya madyaw nan imo-un, kay manimbet saba ya Tyumanem aw atag nan ya pigsekat na utaw adti kanan. Aw diliꞌ sakanan madaman sa pigsekat tadun adti kanan. 6Manang kun magsekat sakanan, ka-ilangan pangintu-uwan nan ya Tyumanem aw diliꞌ magduwaduwa. Kay ya utaw na magduwaduwa, kasiling sakanan na baled na dagat na pangkay ayin na samet dala͡a. 7Ya utaw na maynan, walaꞌ ya un nan imanen na atagan sakanan na Tyumanem, 8kay migduwaduwa ya anenganeng nan aw walaꞌ kabangal ya imo-unun nan.

Ya tagituꞌ aw mangkayaman

9Na, adti manga mangintu-uway, awun manga inulug tadun na tagituꞌ, aw umbaꞌ silan magleya dun ni pagpatas na Tyumanem kanilan. 10Awun uman manga inulug tadun na mayaman, aw umbaꞌ silan magleya sa pagka-edeꞌ nilan na walaꞌ ya guna na manga ka-unan nilan adti anenganeng na Tyumanem. Kay ya pagkayaman kasiling yeiy oloꞌ na bulak adti magalet na maksay magkalanes. 11Pagsilat da na sega na to-o mapasuꞌ, malanes ya magalet aw mangkataktak ya manga bulak aw malagak ya kanenggeya nilan. Aw maynan uman ya manga utaw na mayaman. Pangkay sa kenneꞌ pa nilan migpakadyaw sa kanilan pag-eyaꞌ, dumateng da ya pagkamatay nilan aw mabus nilan ayawan ya kadég na ka-unan nilan asini tas na lupaꞌ.

Ya pagtandaꞌ sa manga mangintu-uway

12Madyaw ya kana utaw na walaꞌ dega na pagtandaꞌ. Kun kapulba͡an na to-o masalig ya pagpangintu-u nan, madawat nan ya tandan na yan ya ginawa na walaꞌ ya katigkasan na pigpakang na Tyumanem adti manga utaw na to-o gyuminawa kanan.

13Kun awun utaw na buyuwun na malatay, diliꞌ galu sakanan maglong, “Ya Tyumanem yan ya migbuyu kanak adti malatay.” Kay ya Tyumanem diliꞌ saba magkabuyu na malatay aw walaꞌ uman ya utaw na buyuwun nan adti malatay. 14Yan baling ya makapabuyu sa utaw kun madala sakanan na malatay na pagkaliman na pagka-utawun nan. 15Aw kun yeiy da ya miggagad sa anenganeng nan aw imo-un nan ya malatay, makasalaꞌ baling sakanan. Aw kun gayed nan yeiy imo-un, ya sampetan nan, ka-eletan sakanan adti Tyumanem na walaꞌ ya katigkasan.

16Kay manga inulug ku na kanak pigginawa͡an, diliꞌ mayu paggawayan ya kamayu pagka-utawun na mag-anenganeng kamu na ya Tyumanem yan ya migbuyu kamayu adti pagpakasalaꞌ. 17Alag madyaw ya kadég na pig-atag nan aw alag saba uman umbaꞌ ya pigdawat tadun adti Tyumanem. Yan ya mig-imoꞌ sa sega aw bulan aw manga bitun, aw pangkay gayed magka-uman ya silat nilan manang ya Tyumanem diliꞌ saba ma-uman. 18Aw asuntu sa pagbayaꞌ nan dadan, pig-imoꞌ kitadun mangayseꞌ nan magi sa pagpangintu-u tadun sa kanan tingeg na alag matinaw, pada kitadun ya matas sa kadég na pigpan-imoꞌ nan.

Ya pagpakanyeg aw pagdalug sa tingeg na Tyumanem

19Kay manga inulug na kanak pigginawa͡an, pagbetangan mayu sa ginawa ya un ku paglongun: Ya tagsambuksambuk kanaten dayaw magpakanyeg, aw pagkatanawan tadun ya un naten paglongun. Aw diliꞌ galu kitadun maksay magkadaman, 20kay ya utaw na nyadaman diliꞌ nan saba mabatug ya pag-imoꞌ sa manga imo-unun na madyaw na yan ya pagkaliman na Tyumanem. 21Yanagaw, ayawi mayu ya kadég na punganan na malatay, aw pagpadanaꞌ kamu sa pagka-utawun mayu, aw dawata mayu ya tingeg na Tyumanem na pigtanem da nan adti anenganeng mayu na yan ya makapaluwaꞌ kamayu lekat adti pa-emel-emel nan. 22Aw pagbetangan mayu sa ginawa ya pagdalug sa tingeg na Tyumanem, kay kun oloꞌ dengegen mayu ya tingeg nan, liwan na piggawayan mayu ya kamayu pagka-utawun. 23Kay pangkay singalan ya dumengeg sa tingeg na Tyumanem aw kun diliꞌ nan dalugun, kasiling sakanan na utaw na nyinunu sa gya nan adti palunganan, 24aw pagkatigkas yan, manaw sakanan aw kalingawlingawan da nan kun unu ya gya nan. 25Manang diliꞌ galu maynan ya utaw na magbasa sa manga suguꞌ na Tyumanem na alag madyaw. Diliꞌ galu nan kalingawan ya pigbasa nan manang dalugun nan baling, kay yan saba ya makapaluwaꞌ kanan lekat adti pa-emel-emel na Tyumanem. Aw ya utaw yan, pakadyawun na Tyumanem asuntu sa pig-imoꞌ nan.

26Kun awun utaw na mig-anenganeng na tengteng nyatibulluk ya pagpangintu-u nan, manang kun diliꞌ nan katagenan ya kanan dilaꞌ, na, piggawayan nan ya kanan pagka-utawun, aw walaꞌ ya guna na pagpangintu-u nan. 27Manang ya matinaw na pagpangintu-u adti asdangan na Tyumanem na yan ya Ama, pagkita-en dun ni utaw na tyumabang sa manga pagti-is na manga manélu aw manga balu, aw diliꞌ na utaw yan pagka͡agadan ya malatay asini tas na lupaꞌ.

Currently Selected:

Santiago 1: klgv

Highlight

Copy

Compare