2 Corinto 1
1
1Aku si Pablo ya migsulat adti kamayu. Nya-imoꞌ aku apostol ni Kristu Jisus magi sa pagbayaꞌ na Tyumanem. Aw si Timotiyo na kanaten inulug, idi sakanan ni sayid ku. Pigsulatan ta kamu na manga mangintu-uway kan Kristu Jisus na migkatipun nyanimba dun ni syudad na Corinto, dala ya kadég na mangintu-uway dun ni probinsiya na Akaya.
2Padatengen galu adti kamayu ya grasya aw kalinaw na lyumekat adti Tyumanem na yan ya Ama tadun aw adti kan Jisu-Kristu na kanaten Matas na Pangulu.
Ya pagpakabagseg na Tyumanem sa kadég na manga mangintu-uway
3Naten deyen ya Tyumanem na yan ya Ama na kanaten Matas na Pangulu na si Jisu-Kristu. Kay ya Ama, yan ya lyekatan sa kadakulaꞌ na kallat, aw migpakabagseg sa ginawa tadun. 4Gayed nan saba pigpakabagseg ya kanaten ginawa dun ni kadég na kalugan na kya-agiyan tadun, pada mabatug tadun uman pakabagsegen ya ginawa na manga eped na migti-is sa pangkay unu na kalugan. 5Kay pangkay madég ya manga pagti-is na kya-agiyan tadun asuntu sa pagpakasambuk tadun kan Kristu, manang dakulaꞌ pa dun ya pagpakabagseg ni Kristu sa kanaten ginawa. 6Na, ya kanami pagti-is dakulaꞌ ya ma-untung mayu dun, pada pakabagsegen ya ginawa mayu aw pada paluwa-en kamu na Tyumanem. Kun pigpakabagseg ya kanami ginawa, mabatug nami uman pakabagsegen ya kamayu ginawa pada mati-is mayu ya manga kalugan kasiling na kanami kya-agiyan. 7Yanagaw dakulaꞌ ya pag-iman nami kamayu. Kay kya-ede-an nami na mabatug saba mayu ti-isen ya manga kalugan kasiling na kanami, aw pakabagsegen uman na Tyumanem ya kamayu ginawa.
8Kay manga inulug, kaliman nami na ka-ede-an mayu na malug to-o ya kanami kya-agiyan dun ni kanami pagpanaw adti probinsiya na Asia. Diliꞌ da galu nami mati-is, aw walaꞌ da ya pag-iman nami na mataw pa dun ni manga allaw yan. 9Aw nyakapaglong kami na yan da galu ya kanami tyamanan. Manang pigtumbay yeiy kadiꞌ na Tyumanem pada diliꞌ nami saligan ya kanami pagka-utawun. Kay yan oloꞌ ya umbaꞌ saligan ya Tyumanem na magpakamataw sa manga nyangkamatay. 10Agpet da galu kami mangkamatay, manang pigtabangan kami nan. Yanagaw asuntu sa pig-imoꞌ na Tyumanem kanami idtu muna, pig-iman nami na tabangan kami nan uman salut 11magi sa kamayu pagpanawagtawag kanami adti Tyumanem aw nyadawat nami ya manga kadyawan. Kay yan saba ya dakulaꞌ na tabang mayu kanami. Aw asuntu sa tubag na Tyumanem sa panawagtawag mayu, yanagaw madég ya magpasalamat kanan.
Ya pagka-uman na palpa ni Pablo
12Diliꞌ kami mabekenbeken maglong seiy: Walaꞌ ya pagsalaꞌ sa bet nami, labi la adti kamayu banwa. Matinaw saba ya kanami anenganeng aw walaꞌ kami paglong sa galuꞌ. Walaꞌ ya eped na tud nami dun ni kamayu, aw walaꞌ nami uman daluga ya katadeng na lyumekat oloꞌ asini tas na lupaꞌ. Manang pigdalug nami ya bet na Tyumanem. Asuntu sa kallat nan, piggagad nan ya anenganeng nami dun ni kadég na kanami imo-unun. 13Aw asini kanami pigsulat, walaꞌ ya pigbetang nami na diliꞌ mayu mabasa aw diliꞌ mayu kalabetan. Aw dumateng pa ya allaw na kalabetan da mayu ya kadakulaꞌ yeiy 14pangkay diliꞌ pa mayu adun kalabetan. Yanagaw dun ni allaw na paglikuꞌ na kanaten Matas na Pangulu na si Jisus, sayaꞌ kami mayu adti asdangan nan kasiling na pagsayaꞌ nami kamayu.
15Aw asuntu na kya-ede-an da ku ya kadég yeiy, migpalpa aku idtu muna na una ta kamu agiyan pada to-o pa kamu ka-untungan. 16Ya tagnaꞌ na palpa ku, na madtu aku ni Macédoniya aw mapit pa aku galu dun ni sayid mayu, aw lekat uman adti Macédoniya lumikuꞌ aku salut dun ni kamayu pada makatabang kamu kanak aw manawagtawag sa pagpanaw ku pasinan adti Judiya. 17Aw asuntu na walaꞌ pakatuluy ya palpa ku, pagaw awun mag-anenganeng adti kamayu na anangaꞌ aku magduwaduwa sa pagkadtu ku dun ni kamayu, aw anangaꞌ walaꞌ pakatuluy ya muna palpa ku. Manang diliꞌ aku kasiling na manga utaw na galu-un na maksay magpakang aw diliꞌ nilan pagtumanen ya kanilan piglong. 18Manang asuntu na to-o kasaligan ya Tyumanem, yanagaw kasaligan uman ya kadég na piglong nami kamayu. 19Kay ya Iseꞌ na Tyumanem na si Jisu-Kristu, yan oloꞌ ya pig-ubat-ubat nami si Silas aw si Timotiyo dun ni kamayu. Aw kya-ede-an mayu na kasaligan saba si Jisus sa kadég na piglong nan aw tengteng nan yeiy imo-un ya pigpakang nan. 20Kay dun ni kan Jisus, nyatuman saba ya kadég na pigpakang na Tyumanem. Yanagaw maglong kitadun “Amén,” kay dun da kitadun tandeꞌ na alag matinaw ya piglong nan. Aw dun ni kanaten paglong, nyadeyen tadun ya Tyumanem. 21Aw ya Tyumanem, yan ya migpakasalig sa kanaten pagpakasambuk kan Kristu. Aw yan uman ya mig-atag kanami sa katundanan sa pagka-apostol aw katulus na un mag-ubat-ubat sa tingeg nan adti manga utaw. 22Aw pigpa-eyaꞌ nan ya kanan Ispiritu adti kanaten anenganeng na yan ya palangad eket na madawat tadun ya kadég na pigpakang nan kanaten.
23Na, migsapaꞌ aku adti asdangan na Tyumanem na matinaw ya kanaken piglong. Yan ya du-an na walaꞌ da aku likuꞌ dun ni Corinto, kay diliꞌ aku malim na kumedel ya ginawa mayu magi sa pagsagda ku kamayu salut. 24Aw diliꞌ kami uman malim magbaya-bayaꞌ kamayu kay kya-ede-an nami na masalig da ya pagpangintu-u mayu. Kaliman nami oloꞌ na tabangan kamu pada to-o pa kamu magleya.
Currently Selected:
2 Corinto 1: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
