1 Corinto 16

Ya tabang na kuwalta na un padala adti mangintu-uway adti Jérusalim

1Na, tubagen ku ya usip mayu sa atag mayu na kuwalta adti manga mangintu-uway na awun ni Jérusalim. Daluga mayu ya piglong ku adti manga mangintu-uway na nyanimba dun ni kanilan manga banwa na awun ni probinsiya na Galasiya: 2Kada Linggo, ya tagsambuksambuk kamayu dadan magtani sa kuwalta na lekat adti manga pagkamangan mayu. Tipuna mayu yan pada sa pagdateng ku dun ni kamayu dadan da nyatagilan. 3Pagkatigkas yan, sa pagdateng ku adti kamayu, kun singalan ya pigpamalliꞌ mayu na un mag-ated sa kuwalta adti Jérusalim, padala͡an ku silan na manga sulat na magpakilala kanilan adti manga mangintu-uway dun. 4Manang kun ka-ilangan na madtu aku ni Jérusalim, na, dumengan da silan kanak.

Ya manga palpa ni Pablo

5Manang sa diliꞌ pa aku madtu ni tampid mayu, agiyan ku una ya probinsiya na Macédoniya. 6Aw ya kanak palpa, basi madugaydugay pa aku meyaꞌ dun ni tampid mayu. Kay un pa ku palabayen ya manga bulan na to-o manikiꞌ, aw magpatabang uman aku kamayu sa kanaken kapelekan pangkay ayin ya banwa na un ku kadtuwan. 7Kay diliꞌ aku malim na dagawdagaw aku oloꞌ dun ni sayid mayu. Kaliman ku na meyaꞌ pa dun ni kamayu na madugaydugay kun tumbay na kanaten Matas na Pangulu. 8Manang adun, asini pa aku pag-eyaꞌ ni Épéso taman na Pista na Péntékostés, 9kay pig-uwangan da na Tyumanem ya dakulaꞌ na selat na un aku magpa-edeꞌ sa Madyaw na Ubat-ubat asini pangkay madég ya manga utaw na mig-ampang kanak.

10Aw kun dumateng da si Timotiyo dun ni kamayu, dawata mayu sakanan pada diliꞌ sakanan magdeꞌ kamayu. Kay sambuk uman sakanan na mig-imoꞌ sa imo-unun na kanaten Matas na Pangulu kasiling ku. 11Yanagaw diliꞌ mayu pagtumbay na awun magna-naꞌ kanan dun ni kamayu. Pakadyawa mayu aw tabangi mayu sakanan pada awun kalinaw na kanan paglikuꞌ adi kanak. Kay pigtagadan ku sakanan eped nan ya manga inulug tadun.

12Na, si Apolos uman na kanaten inulug, to-o aku nyanginayuꞌ kanan na magad sa manga inulug tadun na mawun dun ni kamayu. Manang walaꞌ kunu ya palpa nan na madtu adun. Yanagaw mawun da kunu sakanan kun awun da selat nan.

Ya katigkasan na sulat

13Magpakatanaw kamu! Gayed mayu pakasaliga ya kamayu pagpangintu-u kan Jisu-Kristu! Diliꞌ kamu magkallek, aw pakabagsega ya kamayu ginawa. 14Aw pangkay unu ya imo-un mayu, paggaginawa͡ay kamu.

15Na, kay manga inulug ku, nya-edeꞌ kamu na ya tagnaꞌ na mangintu-uway dun ni probinsiya na Akaya yan si Éstipanas aw ya kanan manga ka-epedanan dun ni balay. Aw kya-ede-an tadun na pigtibulluk nilan ya kanilan anenganeng sa pagtabang adti manga mangintu-uway. 16Nyanginayuꞌ aku na magpasakup kamu sa manga utaw na kasiling na bet nilan aw sa kadég uman na nyatibulluk adti imo-unun na Tyumanem. 17Aw dakulaꞌ ya pagleya ku na dyumateng adi si Éstipanas aw si Fortunato aw si Akayko kay silan ya syumayu kamayu migtabang kanak asuntu na walaꞌ kamu pakakadi. 18To-o nilan pigpakaga͡an ya ginawa ku kasiling na pig-imoꞌ nilan adti kamayu idtu muna. Ya manga utaw yeiy umbaꞌ silan basa͡an.

19Na, nyangumusta kamayu ya manga mangintu-uway na migkatipun nyanimba adti kanilan manga syudad asini probinsiya na Asia. Maynan uman si Akila aw si Priscilla aw ya manga mangintu-uway na migkatipun adti kanilan balay, kay alag kamu nyakasambuk adti kan Kristu na kanaten Matas na Pangulu. 20Aw ya kadég na inulug tadun asini Épéso na nyangintu-u kan Kristu, nyangumusta silan adti kamayu. Aw diliꞌ mayu pagkalingawan ya pagpangumusta͡ay kay mangkaylug ya kadég mayu adti kan Kristu.

21Aku si Pablo ya migsulat sa pangumusta yeiy.

22Pangkay singalan na walaꞌ ya pagginawa sa kanaten Matas na Pangulu, katullunan saba sakanan.

Kay Matas na Pangulu, likuꞌ da kaw!

23Ayin pa aku galu na awun gayed ni kamayu ya grasya ni Jisus na kanaten Matas na Pangulu. 24Pigginawa͡an ku ya kadég mayu kay nyakasambuk da kitadun dun ni kan Kristu Jisus. Amén.

Currently Selected:

1 Corinto 16: klgv

Highlight

Copy

Compare