2 Corinto 2

1Yanagaw pig-anenganeng ku na diliꞌ pa aku mawun dun ni kamayu pagaw kadugangan baling ya kakalatan na ginawa mayu. 2Kay kun ka-atagan ta kamu na kakalatan na ginawa, na, singalan pa ya magpaleya kanaken? Kamu saba oloꞌ. 3Aw yan ya du-an na migsulat aku kamayu idtu muna, pada kun makakawun aku dun, diliꞌ kamu maka-atag kanak sa kakalatan na ginawa. Kay kamu galu ya magpaleya kanak. Aw kya-ede-an ku na kun magleya aku, magleya kamu uman. 4Sa pagsulat ku kamayu idtu muna, walaꞌ katingen ya anenganeng ku aw nyangkataktak ya luwaꞌ ku asuntu na to-o migkalat ya kanak ginawa. Aw bekeꞌ na tud ku na atagan ta kamu na kakalatan na ginawa, manang ya kanak kaliman na ka-ede-an mayu na to-o ku kamu pigginawa͡an.

Ya pagpasinsiya sa eped

5Na, kun awun utaw dun ni kamayu na nyakasalaꞌ, bekeꞌ ku oloꞌ ya kya-atagan nan na kakalatan na ginawa manang dala uman ya kadég mayu. Manang diliꞌ aku malim na kadugangan ya puluglima mayu. 6Idtu muna, pigkasambukan na anenganeng mayu na pitulun ya utaw yan. Manang umbaꞌ da ya pagpitul mayu kanan. 7Pasinsiyayi la mayu sakanan aw pakabagsega ya ginawa nan, pagaw to-o sakanan kabegatan aw malagak baling ya pag-iman nan. 8Yanagaw nyanginayuꞌ aku adti kamayu na pakitaꞌ mayu kanan na kenneꞌ mayu sakanan pigginawa͡an. 9Aw ini uman ya sambuk na du-an na migsulat aku kamayu idtu muna, kay kaliman ku kapulba͡an kun pigdalug mayu ya kadég na pigpalna-u ku kamayu. 10Yanagaw kun singalan ya pigpasinsiya͡an mayu, pigpasinsiya͡an da ku uman sakanan. Gayed aku magpasinsiya, kay yeiy saba ya pagkaliman ni Kristu aw awun ma-untung mayu dun. 11Kay kun magpasinsiya͡ay kitadun, diliꞌ kitadun kagawayan ni Satanas aw diliꞌ nan uman degen. Kay kya-ede-an da saba tadun ya kanan kapandayan.

Ya kakaypengan ni Pablo kan Tito

12Na, sa pagdateng ku adti syudad na Troas na un magpa-edeꞌ sa Madyaw na Ubat-ubat kan Kristu, kya-ede-an ku na pigtagilan da dadan na Tyumanem ya anenganeng na manga utaw dun ni banwa yan. 13Manang walaꞌ katingen ya kanak anenganeng kay walaꞌ ku kita-a ya kanaten inulug na si Tito. Yanagaw nyanabi aku sa manga mangintu-uway dun aw migpadeleg aku sa kanak pagpanaw pasinan adti Macédoniya.

Ya pagpa-edeꞌ sa Madyaw na Ubat-ubat

14Na, pigpasalamatan ku ya Tyumanem na yan ya migma-una kanaten asuntu na nyakasambuk kitadun kan Kristu sa pagdeg nan kan Satanas. Aw magi kanami, migpadeleg ya pagpa-edeꞌ sa Madyaw na Ubat-ubat kan Kristu adti kadég na manga utaw pangkay ayin na banwa, kasiling na manimboꞌ na lyumegeb ya boꞌ nan. 15Asuntu sa pagpalna-u nami sa Madyaw na Ubat-ubat kan Kristu, kasiling kami na insénso na pigsunug na to-o manimboꞌ na magpakatutuk sa Tyumanem. Kabo-an yeiy na manga utaw na pigpaluwaꞌ nan, aw ya manga utaw uman na un pa ka-eletan adti Tyumanem. 16Adti manga utaw na walaꞌ pangintu-u, kasiling kami na matumboꞌ na makamatay, manang adti manga utaw na nyangintu-u la, kasiling kami na manimboꞌ na maka-atag sa ginawa. Singalan kaꞌ ya umbaꞌ na makabatug sa imo-unun yeiy? 17Aw diliꞌ kami kasiling na eped na pig-imoꞌ nilan panguwalta oloꞌ ya pag-ubat-ubat sa tingeg na Tyumanem. Manang yan saba ya tengteng tud nami ya pigsuguꞌ kanami na Tyumanem na yan ya pag-ubat-ubat sa kanan tingeg. Aw ya paglong nami adti manga utaw magi sa katundanan ni Kristu, kyinitaꞌ saba yeiy alag na Tyumanem.

Currently Selected:

2 Corinto 2: klgv

Highlight

Copy

Compare