Matiu 18
18
Gha Ọkpọlọ Se?
(Mak 9:33-37; Luk 9:46-48)
1Ẹghẹ ni ọre avbe erhuanegbe na bu Jesu rre, iran nọ rẹn wẹẹ, “Gha ọ kpọlọ sẹ vbe Arriọba ẹrinmwi?”
2Rẹn keghi tie ọvbokhan ọkpa, ọ rhie ẹre mudia ye odaro iran. 3Ọ wẹẹ, “Ne I khama uwa, vbe ẹ i re te uwa fiwerriẹ ne uwa do gha ye vbe ibiẹka, wa i sẹtin la Arriọba ẹrinmwi. 4Ọmwa ne ọ mu egbe ẹre rriotọ ọ na do gha ye vbe ọvbokhan na, ọrọre ne ọ kpọlọ sẹ vbe Arriọba ẹrinmwi. 5Ọmwa ne ọ vbe rhan obọ miẹn egbe ọvbokhan nekherhe na vbe eni mwẹ, ọ rhan obọ miẹn mwẹ.
Edanmwẹ Orukhọ Ne A Ru
(Mak 9:42-48; Luk 17:1-2)
6“Ne ọmwaikọmwa gha ya ye ọkpa vbe uwu iran ne giẹrẹ ni ya mwẹ yi na ba odẹ mwẹ ku, ọ gha ma nẹẹn sẹ ne a de olọ ye ọre urhu, ne a dinmwi ẹn ye uwu amẹ okun. 7Ohan agbọn to mwẹ rhunmwuda avbe emwi ne ọ de ọmwa odẹ ni rrọọ. Ẹ i mwẹ ne emwi ni si ọmwa fi orukhọ ghẹ sunu. Sokpan u miẹn vbe ọ gha ba so ọmwa ne ọ la obọ ẹre sunu hẹẹ.
8“Deghẹ obọ ruẹ ra owẹ ruẹ ra ya a bibi odẹ, fian ẹn mu fua, u ya obọ ọkpa ra owẹ ọkpa la uwu ẹfe, ọre ọ maa sẹ ne a mu ẹn mu obọ eva ra owẹ eva fi uwu erhẹn etẹbitẹ. 9Deghẹ aro ruẹ ọre ọ ra ya de odẹ, wọlọe rhie fua. U ya aro ọkpa la ẹfe ọre ọ maa sẹ ne u gha mwẹ aro eva ne a mu ẹn fi uwu erhẹn ẹrinmwi ne ehianmwẹ ivin.
Itan Ohuan Ne O Wiri
(Luk 15:3-7)
10“Wa ghẹ zan ọkpa vbe uwu iran ne giẹrẹ na. Ne I tama uwa, ẹghẹ hia ọre odibosa iran ya mudia ye odaro Erha mwẹ ne ọ rre ẹrinmwi. [ 11Rhunmwuda te Ovbi Ọmwa rre do miẹn iran ni wiri fan.] 12Vbe uwa ro ẹmwẹ na hẹẹ? Ọmwa ne ọ mwẹ ohuan iyisẹn, deghẹ ọkpa wiri vbọ, de emwi ne ọ gha ru? Te ọ gha sẹ ọkpa i rrọ vbe iyisẹn ni dekẹe rae ye ehe ne iran na rri irunmwu ne ọ ya gualọ ohuan ne ọ wiri nii. 13Ọ gha miẹn ọẹn, ẹko ẹre ghi rhiẹnrhiẹn uan ba ẹmwẹ ọkpa ne ọ te wi nii sẹ ẹmwẹ ọkpa i rrọ vbe iyisẹn ni ma wii. 14Erriọ ọre ọ ye zẹẹ erha uwa ne ọ rre ẹrinmwi i ho ne a miẹn ọkpa ne ọ wiri vbe uwu iran ne giẹrẹ na.
Ọtẹn Ne Ọ Ru Emwi Khọọ
15“Ọtuẹn gha ru uẹ emwi khọ, bu ẹre gha khian, ya rhie ma rẹn. Sokpan wẹ vbe ọre ọkpa ghi gba ta ẹre ọ ghe uwu owa. a deghẹ ọ rhie ehọ nuẹn ta yi, te usi atua ye ẹmwẹ iku uwẹ vbe ọre. 16Sokpan deghẹ ọ ma zẹ ye uẹ re. rhie arhin ọkpa ra eva ba egbe, ne a miẹn ehe na miẹn arhin eva ra eha ne ọ sẹ osẹe ye ẹzọ ne a gu ọmwa ni gui zẹẹ vbe ne a gbẹn ọẹn ye otọ. 17Sokpan deghẹ ọ ma vbe zẹ ye iran ẹre, ya gui ẹzọ ruẹ hia ma esọsi. Deghẹ ọ ma vbe zẹ ye esọsi re, u ghi wa kae ba ọrriọvbe ra iran ni koko igho uhunmwu.
Emwi Ne A Fan Obọ Ẹre Kevbe Ne A Ma Fan Obọ Ẹre
18“Ne I tama uwa hia nian, emwi ne uwa fan obọ ẹre vbe agbọn, a vbe fan obọ ẹre vbe ẹrinmwi. Emwi ne uwa ma vbe fan obọ ẹre vbe agbọn, a ma vbe fan obọ ẹre vbe ẹrinmwi.
19“Ne I vbe rhie tẹe wẹẹ, wa eva gha sẹtin ku ekhọe gbe ya na erhunmwu nọ emwi ọkpa, Erha mwẹ ne ọ rre ẹrinmwi gha ruẹe ne uwa. 20Rhunmwuda arhin eva ra eha gha si uhunmwu koko nẹ vbe eni mwẹ, mẹ wa gu iran rre evba.”
Itan Ọguọmwadia Ne Ẹ I Yabọ
21Pita keghi bu Jesu gha dee, ọ nọ rẹn wẹẹ, “Inu igba ọre I gha yabọ ọtẹn mwẹ sẹ vbe ọ gha ho mwẹ ẹmwẹ? Igba ihinrọn nọ ra?”
22Jesu wanniẹn tama rẹn wẹẹ, “Ẹn o, ẹ i re igba ihinrọn sokpan igba ihinrọn vbe ihe ekigbe sẹ iyenẹ. 23Rhunmwuda, a ye Arriọba ẹrinmwi gie ọba ọkpa ne ọ wẹ ne avbe eguọmwadia ẹre viọ ebe ne iran gbẹnnẹ igho yi gie irẹn ne iran ghe ẹre. 24Ọwarọkpa vbe ọ wa da suẹn, iran mu ọguọmwadia ọkpa ne ọ rri ẹre osa enaira arriaisẹn vbe ihe arriaisẹn inu ihe ne ọ khin, bu ẹre rre. 25Ọ ma miẹn igho ya ha osa rhunmwuda ọnii, arowa ẹre na wẹ ne a khiẹn ọẹn khiẹn amwẹ ọnrẹn kevbe ivbi ẹre kevbe emwi hia ne ọ mwẹ ya ha osa ni. 26Ọguọmwadia na keghi fan fi guẹ vbe odaro arowa ẹre, ọ rinmwian ẹn wẹẹ, ‘Lahọ ziengbe mẹ, I gha ha osa na hia nuẹn.’ 27Ohan rẹn keghi wa to arowa ẹre ni, ọ keghi ya igho ni hia ma rẹn, ọ na wẹ ne ọ gha rrie.
28“Okpia na ghi ladian, ọ dekun ọguọmwadia ne ihua ẹre ọkpa ne ọ mwẹ ọre osa enaira eso. Ọ keghi de obọ muẹn, ọ na gha wọ ẹre ẹho, ọ tama rẹn wẹẹ, ‘Ha mwẹ osa ne u rriọ mwẹ rẹ.’ 29Ọguọmwadia ne ihua ẹre ni keghi fan fi iguẹ, ọ rinmwian ẹn wẹẹ, ‘Lahọ ziengbe mẹ, I gha ha osa na hia nuẹn.’ 30Sokpan, ọ ma kue. Ọ keghi ya muẹn khui ye eghan ne ọ gha rre evba ọ te do ha osa ni. 31Eguọmwadia ne ihua ẹre ghi miẹn emwi ne ọ sunu, egbe keghi wọọ iran, iran na ya gbẹngbẹn emwi na hia ma arowa iran. 32Arowa nii keghi tie ọguọmwadia nii, la owa, ọ khama rẹn wẹẹ, ‘Wẹ ne ẹwobi ọviẹn ọmwa, mẹ ya osa ne u rriọ mwẹ re hia ma ruẹn rhunmwuda ighe u rinmwian mwẹ. 33Ọ te kei ne uwẹ vbe tohan ọguọmwadia ne ihua zẹ vbene imẹ tohan ruẹn.’ 34Ohu keghi mu arowa ẹre nii, ọ na ya mu ọguọmwadia ni fi eghan, ne a gha rri ọre oya vbe evba rhinrin ọ te do ha osa hia ne ọ ru.”
35Jesu keghi gbe ẹe wanniẹn wẹẹ, “Erriọ zẹẹ. Erha mwẹ ne ọ rre ẹrinmwi ra ru uwa, adeghẹ dọmwadẹ ọghọe vbe uwu uwa ma fan ekhọe rua yabọ ọtẹn ọnrẹn.”
Currently Selected:
Matiu 18: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
