Matiu 17
17
O Fi Egbe Werriẹ
(Mak 9:2-13; Luk 9:28-36)
1Ikpẹdẹ ehan ghi gberra nẹ, Jesu keghi rhie Pita kevbe etiọnrẹn Jems kevbe Jọn ọkpa ba egbe gha rrie uhunmwu oke. 2Ọ keghi sirra iran fi egbe werriẹ, aro ẹre kegha fi wain wain vbe owẹn, ukpọn rẹn keghi fuọfua vbe ukpa. 3Erhuanegbe eha nii keghi bẹghe vbe Mosis kevbe Elaija gu Jesu guan. 4Pita keghi kha wẹẹ, “Nọyaẹnmwa, ọ maa gbe ni ima na rre emwa na, a deghẹ u ho, I gha bọ eko eha ye emwa, ọkpa ọghe uwẹ, ọkpa ọghe Mosis kevbe nọkpa ọghe Elaija.”
5Vbene ọ wa guan ni, okuku ne ọ fi wain wain keghi rhu gue iran, urhu ọkpa keghi ke uwu okuku nii guan ladian wẹẹ, “Ọna ọre ovbi mwẹ ne I ho ẹmwẹ ọnrẹn kevbe ne ọ ghan, wa danmwehọ ẹre.”
6Ugbẹn vbe avbe erhuanegbe họn urhu na, iran keghi runran, iran dele viọ aro rhu otọ. 7Jesu keghi khian bu iran rre, ọ ya obọ kan iran, ọ wẹẹ, “Wa kpaegbe, wa ghẹ gie ohan mu uwa.” 8Ugbẹn vbe iran ghi tọn aro mu, iran ma ghi bẹghe ọmwa ọvbehe gberra Jesu ọkpa.
9Iran ghi tuorre ke uhunmwu oke dee, Jesu tama iran wẹẹ, “Wa ghẹ ta umian ne uwa miẹn na ma ọmwa rhọkpa, a te do huẹn Ovbi Ọmwa kpao vbe orinmwi.”
10Ẹkpo ni ọre avbe erhuanegbe na nọọn Jesu wẹẹ, “Vbọzẹ ne iran ni ma emwa Uhi na kha wẹ Elaija ọ gha ka rre?”
11Jesu wanniẹn tama iran wẹẹ, “Ẹmwata Elaija ogha ka re ne ọ do mwamwa emwi hia ye otọ. 12Sokpan, ne I tama uwa wẹẹ, Elaija rre nẹ, Sokpan emwa ma rẹn ọnrẹn, iran keghi ruẹe vbe ne ọ khọn iran. Erriọ zẹ iran ra vbe ru Ovbi Ọmwa khọọ.”
13Avbe erhuanegbe keghi do rẹn ighe Jọn ne Ọsamẹ ọre ọ kha.
Jesu Sinmwi Ọvbokhan Okpia Ne Ọ Mwẹ Orhiọn Esu
(Mak 9:14-29; Luk 9:37-43a)
14Iran ghi ke odọ rre do vba emwa ni gbe ẹbu ye evba, okpia ọkpa keghi bu Jesu gha dee, ọ diguẹ nẹẹn ọ wẹẹ, 15“Lahọ tohan ovbi mwẹ nokpia! Ọwa ọre ọ mu ẹn, ẹghẹ hia ọre ọ ya mu ẹn fi uwu erhẹn kevbe uwu amẹ. 16I rhie ẹre bu avbe erhuanegbe gha dee sokpan iran ma sẹtin sinmwi ẹn.”
17Jesu keghi wanniẹn wẹẹ, “Wa ne ẹ i mwẹ iyayi kevbe ni vbe ba odẹ ku! Vbe i a gha kpee sẹ hẹ vbe ehe ne uwa ye? Vbe i a gha ziengbe ne uwa kpee sẹ hẹ? Rhie ne ọvbokhan gun mwẹ vbe emwa.” 18Jesu keghi khu orhiọn esu ni ladian, egbe na wa rran ọmọ nii vbe ọwarọkpa.
19Avbe erhuanegbe keghi bu Jesu rre vbe ẹkhokho, iran nọ rẹn wẹẹ, “Vbọzẹ ne ima ma na sẹtin khu orhiọn esu ni ladian yi?” [ 20Jesu wanniẹn iran ẹmwẹ wẹẹ, “Rhunmwuda ighe iyayi uwa ma sẹ. Deghẹ wa gele mwẹ iyayi ne ọ kpọlọ sẹ vbe ikpẹ itaba, wa gha sẹtin tama oke na wẹẹ, ‘Kpao vbe emwa gha rrie odọ.’ Ọ ghi gele kpao. A i miẹn emwi ne ẹ i gie uwa ru. 21Sokpan erhunmwu kevbe aguẹ ọkpa ọre ọ sẹtin khu egbe ọna ladian, emwi ọvbehe i rrọọ ne ọ gha sẹtin.]”
Jesu Vbe Dọlegbe Guan Kan Ẹmwẹ Uwu Ẹre
(Mak 9:30-32; Luk 9:43b-45)
22Ugbẹn vbe erhuanegbe hia ghi si egbe koko vbe Galili, Jesu tama iran wẹẹ, “Vbe ọ ma he kpẹe wan, a gha si Ovbi Ọmwa gie iran ne emwa. 23Iran gha gbe ẹe rua, sokpan, vbe ikpẹdẹ ne ogieha, ọ gha rhiọrre.” Ẹmwẹ na keghi gbe iran ne erhuanegbe egbe.
Igho Ọgua Osa Ne A Hae
24Ugbẹn vbe Jesu kevbe avbe erhuanegbe ẹre ghi sẹ Kapaniọn, iran ni koko igho Ọgua Osa keghi bu Pita gha dee, iran nọ ẹnrẹn wẹẹ “Arowa uwa zẹ igho Ọgua Osa yi?”
25Pita wanniẹn tama iran wẹẹ, “Vbọ ghi zẹ.” Ugbẹn vbe Pita ghi la uwu owa, Jesu keghi ka mu ẹmwẹ ni rre, ọ wẹẹ, “Saimọn, vbe uwẹ ro ẹmwẹ na hẹẹ? De emwa ni zẹ igho uhunmwu gie avbe ọba agbọn na yi? Emotọ ra avbe ọrriọvbe?” 26Pita wanniẹn tama rẹn wẹ, “Avbe ọrriọvbe.” Jesu wanniẹn tama rẹn wẹẹ, “Ọnii rhie ma ighe avbe emotọ i zẹ. 27I ma ho ne a zẹdẹ ho iran na ẹmwẹ. Rhunmwuda ọnii, gha rrie odighi ne u fi ẹghọe fi ọ, ehẹn ne ọ rhirhi ka mu, si ẹe ladian. U gha ghe unu ẹnrẹn, u gha miẹn igho ne ọ gha sẹ uẹ ya zẹ ọghomwẹ kevbe ọghe uwa, rhie gha khian, ya ya zẹ igho uhunmwu ima ne iran.”
Currently Selected:
Matiu 17: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
