Matiu 19
19
Jesu Guan Kan Ẹmwẹ Ọdọ Vbe Amwẹ Ni Se Egbe Rae
(Mak 10:1-12)
1Jesi ghi guan avbe ẹmwẹ na fo nẹ, ọ keghi kpao vbe Galili rre, ọ na gha rrie iyeke nọkpa ọghe ẹzẹ Jọdan. 2Emwa ni bun keghi vẹ lelẹe, ọ keghi mu iran egbe rran vbe evba.
3Avbe Farisi ni gualọ ẹre ẹmwẹ ne unu keghi rre, iran nọ rẹn wẹẹ, “Uhi ima fan obọ ẹre ne okpia ra ne ọ gha khu amwẹ ọnrẹn ba ẹmwẹ emwi ne ọ rhirhi khọn rẹn?”
4Jesu wanniẹn tama iran wẹẹ, “Wa ma he tie ebe ẹre nọ kha re wẹẹ, ‘Vbe omuhẹn Ayi ne ọ yi ọmwa yi iran ọdọ vbe amwẹ. 5Ọna ọre ọ siẹ ne okpia gha na sẹ erha ẹe kevbe iye ẹe rae, ọ ghi zẹ obọ lele amwẹ ọnrẹn, iran eva ghi do khian ọkpa.’ 6Rhunmwuda ọnii, iran i ghi re eva ọvbehe, iran khian ọkpa nẹ. Emwi ne Osanobua ya khian ọkpa nẹ, ọ ma kei ne ọmwa rhọkpa wannọ ẹn.”
7Avbe Farisi keghi nọ rẹn wẹẹ, “Vbọzẹ ne Mosis ghi na wẹ ne okpia gbẹn ebe rhie ye amwẹ ọnrẹn obọ ighe rẹn khu ẹe, ne ọ we ẹre gha rrie?”
8Jesu wanniẹn tama iran wẹẹ, “Rhunmwuda ighe wa lọghọ gbe ne a ma ẹre emwi, ọre Mosis na fan obọ ẹre ne uwa, ne uwa gha khulo amwẹ uwa. Sokpan ẹ i te ye erriọ ẹghẹ ne a na bu agbọn. 9Ne I tama uwa nian, ọmwa ne ọ rhirhi khu amwẹ ọnrẹn vbe ẹ i re te ọ ru oghẹ, ighe ọ na vbe rhie okhuo ọvbehe, ọ ghẹ re.”
10Avbe erhuanegbe ẹre tama rẹn wẹẹ, “A deghẹ erriọ ẹmwẹ ọdọ vbe amwẹ ye, a ma zẹdẹ rhie okhuo ọre ọwa fu egbe sẹ.”
11Jesu wanniẹn tama iran wẹẹ, “Iruẹmwi na i re ọ ghe umiẹnmwumiẹn vbe ẹ i re iran ne Osanobua rhie ẹre na. 12Rhunmwuda emwi ughughan ọre ọ si ẹe ne ọmwa i na sẹtin rhie okhuo, eso rrọọ ne a biẹ ọre ọghẹrriẹnoguan, eso rrọọ ne emwa ne agbọn ya khian vberriọ, emwa eso rrọọ ni rhunmwuda Arriọba Osanobua wẹ iran i rhie okhuo hiehie. A gie ne ẹtin ẹnrẹn ghi sẹ ọ rhan obọ miẹn iruemwi na.”
Jesu Fiangbe Ibiẹka Ne Giẹrẹ
(Mak 10:13-16; Luk 18:15-17)
13Emwa eso keghi viọ ibiẹka giẹrẹ bu Jesu rre ne ọ viọ obọ yan iran na erhunmwu. Sokpan avbe erhuanegbe kegha gu iran gui. 14Jesu keghi kha wẹẹ, “Gie avbe ibiẹka bu mwẹ gha dee, ghẹ de gbe iran odẹ rhunmwuda avbe iran orre ọ yan Arriọba Osanobua.”
15Ọ ghi viọ obọ yan iran nẹ, ọ na si okhian.
Igbama Ne Ọ Fe
(Mak 10:17-31; Luk 18:18-30)
16Ẹghẹ ọkpa, okpia ọkpa keghi rre do nọ Jesu wẹẹ, “Ọmaemwaemwi, de emwi esi ne I gha ru ne ẹfe ne ẹ i fo gha na sẹ mwẹ obọ?”
17Jesu wanniẹn tama rẹn wẹẹ, “Vbọzẹ ne u na gualọ otọ emwi ne ọ maa vbe obọ mwẹ yi? Ọmwa Ne ọ maa ọkpa kẹkan ọre ọ rrọọ. Deghẹ u hoo ne ẹfe ne ẹ i fo sẹ uẹ obọ, gha mu uhi sẹ.”
18Rẹn keghi vbe nọ Jesu wẹẹ, “De uhi ne ọ khin?” Jesu keghi wanniẹn, “Ghẹ de izigha, ghẹ ghẹẹ, ghẹ rhaa, ghẹ ta ohoghe. 19Ya ọghọ ne erhaa kevbe iye uẹ, u ghi vbe gha ho ẹmwẹ ogieva ruẹ zẹ vbe ne u ho ẹmwẹ egbe ruẹ.”
20Igbama ni tama Jesu wẹẹ, “Mẹ mu ena hia sẹ nẹ. De emwi ọvbehe ne ọ ghi khẹ ke ne I ru?”
21Jesu tama rẹn wẹẹ, “U gha ho ne ọ gba nuẹn fo, ya khiẹnnẹ emwi hia ne u mwẹ, viọ igho ẹre ne avbe ivbiogue, u gha mwẹ ẹfe vbe ẹrinmwi, bu mwẹ gha dee ne u do gha lele mwẹ khian.”
22Ugbẹn vbe igbama nii họn ẹmwẹ na, ọ keghi khua uhunmwu gha rrie, rhunmwuda, ọ wa mwẹ emwi ẹsẹse.
23Jesu keghi tama avbe erhuanegbe ẹre wẹẹ, “Ne I tama uwa, ọ gha lọghọ gbe ọmwa ne ọ fe te do lao Arriọba ẹrinmwi. 24Ne I wa rhie tẹe wẹẹ, ne uhunmwu emwi vbe ẹmila la uvun olodẹ gberra ọre ọ gha kẹẹ sẹ ne ọmwa ne ọ fe la Arriọba Osanobua.” 25Ugbẹn vbe avbe erhuanegbe họn ẹmwẹ na, ọ keghi kpan iran odin. Iran keghi nọọn wẹẹ, “De ọmwa ne ọ ghẹ ghi fe khekherriọ?” 26Jesu keghi ghe iran, ọ wẹẹ, “Emwi ne ẹ i gia ru ọre ọna khin ne emwa ne agbọn sokpan a i miẹn emwi ne ẹ i gie Osanobua ru.”
27Pita keghi wa gbe ẹre ẹho rua ma Jesu wẹẹ, “Ma ni sẹ emwi hia rae do gha lele uẹ na, de emwi ne ọ ra sẹ ima obọ?”
28Jesu keghi tama iran wẹẹ, Ne I tama uwa, ẹghẹ ne Ovbi Ọmwa gha na tota ye ẹkete uyi ẹre vbe Agbọn Ọgbọn ne ọ dee, wa ne iweva ni lele mwẹ na, gha vbe tota ye ẹkete, wa ghi vbe gha bu ohiẹn ẹwae iweva ne ọ rre Izrẹl. 29Debare, ọmwaikọmwa ne ọ sẹ owa rae kevbe etẹn nikpia, etẹn nikhuo, erha ra iye, emọ ra ugbo rhunmwuda mwẹ, ukhukhu iyisẹn avbe emwi na hia gha sẹ ọre obọ deba ẹfe ne ẹ i mwẹ ọfo. 30Sokpan ni bun vbe uwu iran ni ke aro nian gha do khian ni ke iyeke, iran ni te ke iyeke ghi do ke odaro.
Currently Selected:
Matiu 19: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
